6
Bɑ koo Isirelibɑ kpeerɑsiɑ
1 Bɔ̃rurobɑ bɛɛ be i wɑ̃ɑ Siɔniɔ bɔri yɛndu sɔɔ,
kɑ bɛɛ be i sɔ̃ Sɑmɑrin guurɔ kɑ toro sindu.
Mɑ i tɑmɑɑ i sɑ̃ɑ bwese te tɑ kpɑ̃ɑru bon wirugibu.
Mɑ Isirelibɑ bɑ somiru mɑrɑ bɛɛn min di.
2 I doo Kɑlinɛɔ i wɑ.
Min di, kpɑ i dɑ Hɑmɑtiɔ wuu bɔkɔ gen mi.
Kpɑ i sɑrɑ i dɑ Gɑtiɔ Filisitibɑn temɔ.
Ben wuu si, su bɛɛ Isirelibɑ kɑ Yudɑbɑn wusu geɑ turɑ?
Ben tem mɛ, mu bɛɛn tem kpɑ̃ɑru turɑ?
3 Wee i ǹ kĩ wɑhɑlɑn tɔ̃ru tu bɛɛ nɑɑwɑ.
Mɑ i sere tii dɑɑ kɔ̃sɑ gɑwemɔ.
Mɑ yɑ bɑndu dii bɛɛn suunu sɔɔ.
4 Mɑ i kpĩ sɑu kpin yee burɑnu sɔɔ, nì bɑ burɑru kuɑ kɑ suunu donnu.
I tii yɑ̃ɑ kpɛmminu kɑ nɑɑ kpɛmi yi yi gum mɔ gɔsiɑmmɛ gɔ̃sun di i temmɔ.
5 I mɔrɔkunu soomɔ i womusu mɔ̀ bwisikunu sɑriru sɔɔ.
Mɑ i tɑmɑɑ i nin soberu yɛ̃wɑ nge Dɑfidi.
6 I tɑm nɔrumɔ kɑ nɔri bɛkɛ.
I tii gum turɑregim sɑwɑmɔ.
Mɑ i ǹ nuki sɑnkire yèn sɔ̃ bɛɛn bweseru tɑ koo kɑm ko.
7 Yen sɔ̃nɑ bɑ koo gbi bu bɛɛ yoru mwɛɛri bu kɑ doonɑ
kpɑ bɛɛn nuku dobun kuuki kɑ bɛɛn tɔ̃ɔ bɑkɑ dim mu kpe.
Sɑmɑri yɑ koo kɑm ko
8 Gusunɔ wɔllu kɑ tem Yinni u bɔ̃ruɑ kɑ win tiin wɑ̃ɑru u nɛɛ,
u ǹ bɛɛ Isirelibɑn tii suɑbu kĩ.
U mɑɑ bɛɛn sinɑ kpɑɑnu tusɑ.
U koo de bu Sɑmɑri mwɑ kɑ ye yɑ wɑ̃ɑ ye sɔɔ kpuro.
9 Tɔmbu wɔkuru bɑ̀ n tie yɛnu gɑgu sɔɔ, bɑ koo gbiwɑ. 10 Goo ù n win tɔnun goru suɑ yɛnun di u kɑ yɑrɑ u dɔɔ u dɔ̃ɔ mɛni, u koo wi u wɑ̃ɑ yɛnu sɔɔwɔ bikiɑ u nɛɛ, goo mɑɑ tie u wɑ̃ɑ kɑ wunɛ?
Kpɑ yɛ̃ro u nùn wisi u nɛɛ, goo sɑri.
Kpɑ wini u nɛɛ, ɑ mɑrio. N ǹ weenɛ su Gusunɔn yĩsiru siɑ sɑɑ yeni sɔɔ kpɑ u sun sĩiremɑ.
11 Domi Yinni Gusunɔ u woodɑ yeni wɛ̃ u nɛɛ,
u koo yɛnusu kpuro kɔsukuwɑ, bɑkɑsu kɑ piiminu.
Nɑsɑrɑ kɑm
12 Bɑ rɑ dumi yɑkie kpee sɑɑrɑ wɔllɔ?
Bɑ rɑ kɑ nɛɛ wuku mi?
Adɑmɑ wee bɛɛ i gem gɔsiɑ dɛ̃ɛ.
Mɑ i geɑ gɔsiɑ gɑ̃ɑ sosurɑnu.
13 Bɛɛ i nuku dobu mɔ̀ kɑm sɔɔ, mɑ i gerumɔ i mɔ̀, bɛɛn tiin dɑmɑ i kɑ nɑsɑrɑ wɑ. 14 Yen sɔ̃nɑ Gusunɔ wɔllu kɑ tem Yinni u nɛɛ, u koo de bwese tukuru gɑru tu bɛɛ seesi. Kpɑ tu bɛɛ dɑm dɔre sɑɑ Hɑmɑtin duu yerun di sere n kɑ dɑ nim torɑɔ ye yɑ wɑ̃ɑ gbɑburun berɑ giɑ mi gɑ̃ɑnu ku rɑ kpi.