8
Amɔsu u bireru wɑ win
kɑ̃siru sɔɔ tɑ dɑ̃ɑ mɑrum yibɑ
1 Wee ye Yinni Gusunɔ u mɑɑ mɑn sɔ̃ɔsi kɑ̃si teni sɔɔ. Nɑ dɑ̃ɑ mɑrum wɑ bireru sɔɔ mɛ mu ye. 2 Mɑ Yinni Gusunɔ u nɛɛ, mbɑ nɑ wɑɑmɔ mi.
Nɑ nùn wisɑ nɑ nɛɛ, dɑ̃ɑ mɑrumɑ nɑ wɑ mɛ mu ye.
Yerɑ u mɑɑ mɑn sɔ̃ɔwɑ u nɛɛ,
sɑɑ yɑ turɑ u kɑ win tɔmbu Isirelibɑ sɛɛyɑsiɑ.
U ǹ mɑɑ bu suuru kuɑmmɛ.
3 U mɑɑ nɛɛ, yen tɔ̃ɔ te,
sinɑ kpɑɑrun womusu koo gɔsiɑ nuku sɑnkirɑnun womusu.
Kpɑ tɔn dɑbinun gonu nu n tɛrie bɑɑmɑ.
Kpɑ yɑm mu n mɑɑri sɔ̃ɔ sɔ̃ɔ.
Bɑ koo Isirelibɑ sɛɛyɑsiɑ
4 Yinni Gusunɔ u nɛɛ,
i swɑɑ dɑkio bɛɛ be i sɑ̃ɑrobu dɑm dɔremɔ.
Mɑ i bwɛ̃ɛbwɛ̃ɛbu kɑm koosiɑmɔ.
5 I mɔ̀, dommɑ suru kpɑon tɔ̃ɔ bɑkɑrɑ koo kpe.
Kpɑ su wɑ su bɛsɛn ɑlikɑmɑ dɔrɑ.
Dommɑ tɔ̃ɔ wɛ̃rɑrugirɑ koo kpe,
kpɑ su wɑ su bɛsɛn birɑnu wukiɑ.
Sɑ ko sɑkɑku kɑwɑ,
kpɑ su yen gobi sosi.
Sɑ ko kilo gɔsiɑ su kɑ tɔmbu gbɛni.
Kpɑ su doo sĩinu dɔrɑ.
6 Sɑ ko wɔnwɔndobu dwe kɑ gobi,
kpɑ su sɑ̃ɑrobu kɑ bɑrɑnun gobi kɔsinɑ.
7 Nɛ, Yinni Gusunɔ, nɑ bɔ̃ruɑ kɑ nɛn tiin yĩsiru nɑ nɛɛ,
nɑ ǹ bɛɛ Isirelibɑ kɔ̃sɑ ye i kuɑ duɑrimɔ.
8 Bɛɛn tem mu koo yĩiri,
kpɑ bɛɛ nɛn tɔmbu i n gɔɔ wooru sɔ̃.
Tem mɛ kpuro mu koo kuke
kpɑ mu sure nge Egibitin dɑɑrun nim.
9 Yen tɔ̃ɔ te, nɛ, Yinni Gusunɔ kon de sɔ̃ɔ u du sɔ̃ɔ sɔɔ gbɑ̃ɑrɑ
kpɑ yɑm mu tĩrɑ.
10 Kon bɛɛn tɔ̃ɔ bɑkɑnu gɔsiɑ nuku sɑnkirɑnu,
kpɑ bɛɛn womusu su n sɑ̃ɑ weeweenu.
Kpɑ bɛɛn bɑɑwure u sɑɑkibɑ doke u n wii pɔɔru pote nuku sɑnkirɑnun sɔ̃.
Kon de tɔmbu bɑ n nuki sɑnkire tem mɛ sɔɔ
nge be bɑ ben bii teereru bie.
Tɔ̃ɔ te, tɑ ko n sɑ̃ɑwɑ nɔni swɑ̃ɑrugiru.
11 Wee ye nɛ, Yinni Gusunɔ nɑ geruɑ.
Nɑ nɛɛ, kon de gɔ̃ɔru tu du tem mɛ sɔɔ.
N ǹ mɔ dĩɑnun gɔ̃ɔru, n ǹ mɑɑ mɔ nim nɔru.
Adɑmɑ nɛn gɑrin gɔ̃ɔru kɑ yin nim nɔruwɑ i ko i n mɔ.
12 I ko i n yɑrinɛwɑ sɑɑ sɔ̃ɔ yɛ̃sɑn nɔm dwɑru giɑn di n kɑ dɑ sɔ̃ɔ duu yerɔ,
sɑɑ mɑɑ sɔ̃ɔ yɛ̃sɑn nɔm geu giɑn di n kɑ dɑ sɔ̃ɔ yɑri yerɔ,
i n bɔsu bɑɑmɑ, i n kɑsu i nɛn gɑri nɔ.
Adɑmɑ i ǹ wɑsi i yi nɔ.
13 Sɑɑ ye sɔɔ, bɛɛn wɔndiɑ burɔbu kɑ bɛɛn ɑluwɑɑsibɑ bɑ koo gbi nim nɔrun sɑɑbu.
14 Be bɑ bɔ̃rumɔ kɑ Sɑmɑrigibun bũnun yĩsiru bɑ mɔ̀,
kɑ bũu wi u wɑ̃ɑ Dɑnuɔn wɑ̃ɑru,
ǹ kun mɛ kɑ sɑ̃ɑ te bɑ mɔ̀ Beri Sebɑɔ,
be kpurowɑ kon de bu wɔruku,
kpɑ bu kpɑnɑ bu se.