Luda yã takada kũ Bisã yão NAANAA 30

1 Kũ Rahila è átɛn nɛ́ i kũ Yakubuoro, à gↄ̃ba kpà kũ a vĩ̀nio. Akũ à pì Yakubunɛ: Ǹ nↄ̀ dↄmagu. Tó mádi e sↄ̃ro, mani gamɛ. 2 Yakubu pↄ fɛ̃̀i à pì: Makũmɛ Luda ũ kũ à n tɛ̃ nɛ́ yá? 3 Akũ Rahila pì: Ma zĩkɛri Bilan dí. Ǹ gɛ́ i kãao à nɛ́nↄ imɛnɛ, mani buri le se a gãi. 4 Akũ à a zĩkɛri Bila kpàa nↄ ũ. Yakubu wùtɛ kãao, 5 akũ à nↄ̀ↄ sì à nɛ́ ì gↄ̃gbɛ̃ ũ. 6 Akũ Rahila pì: Luda tò yã bò kũmao nna à ma yã mà à ma gba nɛ́gↄ̃gbɛ̃. Akũ à tↄ́ kpànɛ Dã. 7 Rahila zĩkɛrii pìi ɛ̀ra à nↄ̀ↄ sì à nɛ́ ì gↄ̃gbɛ̃ ũ dↄ, 8 akũ Rahila pì: Ma ↄsi zↄ̃kↄ̃ↄ kà kũ ma vĩ̀nio ma ↄsi nɛ̀. Akũ à tↄ́ kpànɛ Nafatali.

9 Kũ Lea è a nɛ́'i zɛ̀, akũ à a zĩkɛri Zilipa kpà Yakubua nↄ ũ dↄ. 10 Akũ Lea zĩkɛrii pì nɛ́ ì gↄ̃gbɛ̃ ũ kũ Yakubuo. 11 Akũ Lea pì: Mìnnamɛ. Akũ à tↄ́ kpànɛ Gada. 12 Akũ Lea zĩkɛrii pì nɛ́ ì gↄ̃gbɛ̃ ũ dↄ kũ Yakubuo. 13 Akũ Lea pì: Ma pↄ kɛ̀ nna, zaakũ nↄgbɛ̃nↄ ni pi pↄnnaden ma ũ. Akũ à tↄ́ kpànɛ Asa.

14 Rubɛni bò ésekɛ̃gↄrↄa à yenyĩ ɛzɛ è sɛ̃̀n, akũ à bòbo à sùo a da Leanɛ. Akũ Rahila pìnɛ: Ǹ n nɛ́ yenyĩ ɛzɛ pì dãmɛnɛ. 15 Lea pìnɛ: Kũ n ma gↄ̃ sìma, abire dí mↄ́mmaro, akũ ń ye ǹ ma nɛ́ yenyĩ ɛzɛ sí dↄ yá? Rahila pì: Tó n kpàma, mↄkↄ̃mmɛ ĩni i kãao gbãra.

16 Kũ Yakubu tɛn su kũ burao ↄkↄsi, Lea bò à gɛ̀ɛ à dàalɛ à pì: Makũmɛ mani wutɛ kũnwo gbãra, zaakũ ma n sãkã ma nɛ́ yenyĩ ɛzɛ yãimɛ. Akũ à ì kãao gwãani birea. 17 Luda Lea wɛ́kɛ sì, akũ à nↄ̀ↄ sì à Sãani ì kũ Yakubuo. 18 Akũ Lea pì: Luda láada kpàma, kũ ma a zĩkɛrii kpà ma zãa yãi. Akũ à tↄ́ kpànɛ Isaka. 19 Lea ɛ̀ra à nↄ̀ↄ sì dↄ à Tori ì, 20 akũ à pì: Luda gba mana dàmɛnɛ. Adikĩna sà ma zã ni ma kpe ta, zaakũ ma nɛ́gↄ̃gbɛ̃nↄ ì kãao mɛ̀n suddo. Akũ à tↄ́ kpànɛ Zɛbuluni. 21 Kũ à kɛ̀ saa à nɛ́nↄgbɛ̃ ì, akũ à tↄ́ kpànɛ Dina.

22 Akũ Rahila yã dↄ̀ Ludan à a wɛ́kɛ sì, akũ à kɛ̀ nɛ́rande ũ. 23 À nↄ̀ↄ sì à nɛ́gↄ̃gbɛ̃ ì, akũ à pì: Luda wé'i bòmɛnɛ. 24 Akũ à tↄ́ kpànɛ Yusufu à pì: Dikiri ɛra à nɛ́gↄ̃gbɛ̃ pãnde karamɛnɛ dↄ.

Yakubu pↄ́nↄ dãna Labãnɛ

25 Kũ Rahila Yusufu ì, Yakubu pì Labãnɛ: Ǹ ma gbarɛ mà tá ma bùsun. 26 Ma zĩ kɛ̀nnɛ ma nↄnↄ kũ ma nɛ́nↄ yãi. Ǹ ń kpáma mà tá, zaakũ ń dↄ̃ lákũ ma zĩ kɛ̀nnɛ nà. 27 Akũ Labã pìnɛ: Tó ma n pↄnna lè, ǹ gↄ̃ kũmao la. Ma màsoo kɛ̀ ma è Dikiri arubarikaa kɛ̀magu n yãi. 28 Ǹ n làada omɛnɛ, mani kpámma. 29 Yakubu pìnɛ: Ń dↄ̃ lákũ ma zĩ kɛ̀nnɛ nà. Ń dↄ̃ lákũ n pↄ́kãdenↄ kɛ̀ ma ↄĩ nà, 30 zaakũ a fíti kũ ń vĩ zaade mádi suro kàra manamana. Dikiri arubarikaa dàngu gu kũ ma gɛn n bɛa pínki. Bↄrɛn mani ma zĩda bɛ zĩ kɛ sↄ̃ↄ? 31 Labã à là à pì: Bↄ́n mani fĩna boonnɛɛ? Yakubu wèa à pì: Ǹsun pↄ́ke kpámaro, ama ǹ yã dí kɛmɛnɛ, manigↄ̃ n pↄ́nↄ dãnnɛ. 32 Ǹ tó mà gɛ̃ n pↄ́nↄ tɛ́ gbãra mà sã bakibakinↄ kũ a totontotonnↄ plɛplɛ ma làada ũ kũ sãnɛ bↄ̀rↄ siranↄ kũ blè bakibakinↄ kũ a totontotonnↄo. 33 Tó n ma làadaa gwà gɛna gↄrↄ arɛ, ĩni dↄ̃ tó má yãpura vĩ. Blè kũ à kun bakibakiro akũ à totontotonlo, ke sãnɛ bↄ̀rↄ kũ à siraro, ɛ̃hɛ̃ ma kpãni òmɛ. 34 Labã pì: Tↄ̀! Àgↄ̃ de lákũ n ò nà. 35 Zĩ kũ̀a Labã a blèkofĩni bakibakinↄ sɛ̀ kũ a wãnzãndenↄ kũ blèda totontotonnↄ kũ a bakibakinↄ, pↄ́ kũ ò pura vĩnↄ pínki kũ sãnɛ bↄ̀rↄ siranↄ pínki, à ń ná a nɛ́gↄ̃gbɛ̃nↄnɛ ń ↄĩ. 36 Akũ à zàaa bò ń dagura kũ Yakubuo lán gↄrↄ aakↄ̃ tá bà, akũ Yakubu tɛn Labã pↄ kparanↄ dã.

37 Yakubu lí buri aakↄ̃ gã̀ búsunↄ zↄ̃̀zↄ̃ à ń wãnzãn kpàkpa à ń wãnzãn kɛ̀ púu. 38 Akũ à lí kũ à ń wãnzãn kɛ̀aa pìnↄ pɛ̀tɛpɛtɛ pↄ́nↄ gó ímibↄnↄ gũn, pↄ́ kũ òtɛn su í minↄ wɛ́n, zaakũ gwen òdi kpákpa on. 39 Tó ò kpákpa ò lí pìnↄ sarɛ, akũ òdigↄ̃ nɛ́ wãnzãndenↄ i kũ a totontotonnↄ kũ a bakibakinↄo. 40 Yakubu dì pↄ́nɛ pìnↄ plɛplɛ adona àdi a wãnzãndenↄ kũ a siranↄ ká Labã pↄ́nↄ gũn. Lɛmɛ à a zĩda kpàsaa bò lɛ, adi ká Labã pↄ́nↄ gũnlo. 41 Tó pↄ́buri mananↄ fùtɛ kũ kpákpa'onaao, Yakubu dì lí pìnↄ pɛ́tɛpɛtɛ pↄ́nↄ arɛ gó ímibↄↄ pìnↄ gũn, de ò kpákpa o ń sarɛ. 42 Tó pↄ ginanↄmɛ sↄ̃, àdi lí pɛ́tɛpɛtɛńnɛro. Lɛn pↄ ginanↄ gↄ̃̀ Labã pↄ́ ũ lɛ, akũ pↄ́buri mananↄ gↄ̃̀ Yakubu pↄ́ ũ. 43 Akũ Yakubu aruzɛkɛ dìgↄ̃ kara manamana, a pↄ́nↄ dasi kũ̀ kũ nↄgbɛ̃ zĩkɛrinↄ kũ gↄ̃gbɛ̃ zĩkɛrinↄ kũ lakuminↄ kũ zaakinↄo.