9
Bwese weesugiru
1 Yeremi u nɛɛ,
nɑ̀ n dɑɑ kuru mɔ gbɑburɔ, kon dɑɑ dɑwɑ ten mi,
n nɛn tɔmbu deri nɑ n kɑ bu tondinɛ.
Domi be kpuro bɑ sɑ̃ɑwɑ nge sɑkɑrɑ kowobu.
Mɑ bɑ kuɑ nɑɑnɛ sɑrirugibu.
2 Yinni Gusunɔ u geruɑ u nɛɛ,
bɑ rɑ n nɔɔ dɛ̃ɛrɑwɑ bu kɑ weesu ko.
Bɑ ku rɑ tem mɛ kpɑre dee dee gem sɔɔ,
sere kɑ weesu.
Wee siyɑ su kuɑ ben dɑm.
Bɑ rɑ n nuku kɔ̃suru mɔ̀wɑ bɑ n dɔɔ.
Mɛyɑ bɑ ku rɑ nɛ, Yinni Gusunɔ wure.
3 Bɑɑwure u rɑ n win kpɑɑsi tɑki dimɔwɑ.
Bɑ ǹ nɑɑnɛ mɔɔsinɛ.
Bɑ rɑ n kɔrumɔtɔnu kuɑnɑmmɛwɑ,
kpɑ bɑ n weesu sɔ̃ɔnɑmɔ.
4 Kpɑ bɑ n nɔni wɔ̃kunɑmɔ.
Bɑ ku rɑ gem sɔ̃ɔnɛ,
kpɑ bɑ n ben nɔɔ dɛ̃ɛrimɔ bu kɑ weesu ko.
Mɛyɑ bɑ rɑ n mɛɛrimɔ nge mɛ bɑ koo kɑ kɔ̃sɑ ko.
5 Bɑ rɑ tii wɛ̃ kɔ̃sɑn kobu kɑ weesu sɔɔ
sere bɑ yinɑ bu mɑn wurɑ.
6 Nɛ, Gusunɔ, wɔllu kɑ tem Yinni, nɑ nɛɛ,
wee, kon bu sɔwɑ n ben lɑɑkɑri mɛɛri.
Domi nɑ ǹ yɛ̃ ye kon kɑ nɛn tɔn beni ko
ben nuku kɔ̃surun sɔ̃.
7 Wee, tɔn ben yɑrɑ yɑ sɑ̃ɑwɑ nge sɛ̃ɛ dɛ̃ɛguu
ge gɑ rɑ go.
Weesɑ bɑ rɑ n mɔ̀,
kpɑ bɑ n ben berusebu bɔri yɛndun gɑri sɔ̃ɔmɔ.
Adɑmɑ ben gɔ̃ruɔ, yinɑ bɑ rɑ n bu bɛrie.
8 Yenibɑn sɔ̃, kon bu sɛɛyɑsiɑ
kpɑ n bu mɔru kɔsie.
Nɛ, Yinni Gusunɔwɑ nɑ yeni geruɑ.
Wuri kɑ swĩin sɑnɑm
9 Yeremi u nɛɛ,
kon guunu kɑ mi bɑ rɑ rɑɑ yɑɑ sɑbenu kpɑre swĩiyɑ.
Domi nu gberɑ, goo ku rɑ mɑɑ sɑre mi,
bɑ ku rɑ mɑɑ yɑɑ sɑbenun wuri nɔ mi.
Mɑ gunɔsu kɑ gbeeku yɛɛ yi duki yɑkikirɑ min di.
Gɑ̃ɑnu kun mɑɑ wɑ̃ɑ mi.
10 Yinni Gusunɔ u nɛɛ,
u koo de Yerusɑlɛmu yu ko bɑnsu,
kpɑ yu ko gbeeku bɔ̃nun wɑ̃ɑ yeru.
Mɛyɑ u koo mɑɑ de Yudɑbɑn wusu su ko bɑnsu.
11 Wɑrɑ u bwisi mɔ u kɑ ye tubusiɑ.
Yinni Gusunɔ ù n kɑ yɛ̃ro gɑri kuɑ,
u geruo yèn sɔ̃ tem mɛ, mu kuɑ bɑnsu
mi goo ku rɑ mɑɑ sɑre.
12 Yinni Gusunɔ u mɑɑ nɛɛ, yeni yɑ koorɑwɑ yèn sɔ̃ nɛn tɔmbu bɑ nɛn woodɑbɑ deri ye nɑ bu wɛ̃, mɑ bɑ ǹ nɛn gere wure, bɑ ǹ kɑ ye sɔmburu kue. 13 Mɑ bɑ ben tiin kĩru swĩi bɑ bũu wi bɑ mɔ̀ Bɑɑli sɑ̃wɑ nge mɛ ben bɑɑbɑbɑ bɑ bu sɔ̃ɔsi. 14 Yen sɔ̃nɑ nɛ, Gusunɔ Isirelibɑn Yinni, nɛ wi nɑ wɔllu kɑ tem mɔ, nɑ nɛɛ, wee, kon bu dɑ̃ɑ kiku gɑgu*dɑ̃ɑ kiku gɑgu - Dɑ̃ɑ kiku gerɑ bɑ rɑ soku ɑbusɛnti. ge gɑ sosu diisiɑ, kpɑ n bu nim mɛ mu dɛ̃ɛ mɔ nɔrusiɑ. 15 Kpɑ n de bu yɑrinɑ bu dɑ bwese tukunun suunu sɔɔ, mi be kɑ ben bɑɑbɑbɑ bɑ ǹ dɑɑ yɛ̃. Kon de bu bu go kɑ tɑkobi, kpɑ bu bu kɑm koosiɑ mɑm mɑm. 16 Nɛ, Gusunɔ wɔllu kɑ tem Yinniwɑ nɑ yeni geruɑ.
Yeremi u nɛɛ,
i doo i tɔn kurɔ be bɑ rɑ gɔɔ swĩ kɑsumɑ.
I doo i yen gonibɑ sokumɑ
17 bu nɑ fuuku bu sun gɔɔ wuri kuɑ,
kpɑ bɛsɛn nɔni yĩresu su koku.
18 Domi wuri nɔɔrɑ Siɔniɔ.
Bɑ mɔ̀, wee, bɑ sun gurɑ,
seku bɑkɑrɑ sun deemɑ.
N kuɑ tilɑsi su kɑ bɛsɛn tem deri.
Wee bɑ bɛsɛn yɛnusu kɔsukɑ.
19 Bɛɛ kurɔbu, i Yinni Gusunɔn gɑri nɔɔwɔ.
Kpɑ i swɑɑ dɑki i nɔ ye u gerumɔ.
I bɛɛn wɔndiɑbɑ wuri sɔ̃ɔsio,
i gɔɔ wuri sɔ̃ɔsinɔ.
20 Domi gɔɔ u sun kɑ̃ɑsi sɑɑ fɛnɛntin di,
mɑ u duɑ sere sinɑ kpɑɑrɔ.
Mɛyɑ u mɑɑ bii be bɑ bɔsu swɛɛ sɔɔ goomɔ,
kɑ sere mɑɑ ɑluwɑɑsibɑ mi bɑ rɑ gesi mɛnnɛ kpuro.
21 Yinni Gusunɔ u nɛɛ,
tɔmbɑ koo wɔruku bu gbisuku,
kpɑ ben gonu nu n tɛrie yɑkɑsɔ nge nɑɑ bisu,
ǹ kun mɛ nge dobi yi yi geɑ yinɑ bɑ deri gberɔ.
Bɑ ǹ mɑɑ yi suɑmɔ.
À n kĩ ɑ n bwisi gee mɔ,
ɑ Gusunɔ gio
22 Yen sɔ̃, bwisigii u ku woo kɑnɑ win bwisin sɔ̃.
Dɑmgii u ku mɑɑ woo kɑnɑ win dɑm sɔ̃.
Mɛyɑ dukiɑgii u ku woo kɑnɑ win dukiɑn sɔ̃.
23 Adɑmɑ wi u kĩ u woo kɑnɑ,
u woo kɑnɔ yèn sɔ̃ u bwisi mɔ u kɑ mɑn tubu,
mɑ u yɛ̃ mɑ nɛnɑ nɑ sɑ̃ɑ Yinni Gusunɔ.
Nɑ sɑ̃ɑwɑ nɑɑnɛgii wi u rɑ siri dee dee,
kpɑ u de durom mu n wɑ̃ɑ tem sɔɔ.
Tɔn benin bweserɑ bɑ rɑ mɑn wɛ̃re.
Nɛ, Yinni Gusunɔwɑ nɑ yeni geruɑ.
Kirɔ
Yuu be bɑ ǹ Gusunɔ yɛ̃n sɔ̃
24 Wee tɔ̃ru gɑrɑ sisi tè sɔɔ kon bu kɑm koosiɑ be bɑ bɑngo mɔ wɑsi sɔɔ mɑ bɑ ku rɑ nɛn ɑrukɑwɑni yibie. 25 Beyɑ Egibitigibu, kɑ Yudɑbɑ, kɑ Edɔmubɑ, kɑ Amɔnibɑ, kɑ Mɔɑbubɑ, kɑ be bɑ rɑ ben wii bɑɑrun seri kɔni, kɑ sere be bɑ wɑ̃ɑ gbɑburɔ. Domi bwese tuku ni kpuro kɑ mɑm Isirelibɑn tii, bɑ sɑ̃ɑwɑ bɑngo sɑribɑ ben gɔ̃rusɔ.