YE YA DƐƐRE KA YE YA Ǹ DƐƐRE
11
Yɑɑ ye yɑ sɑ̃ɑ seseru
1 Yinni Gusunɔ u Mɔwisi kɑ Aroni sɔ̃ɔwɑ u nɛɛ, 2 bu Isirelibɑ sɔ̃ɔwɔ bu nɛɛ, yɛɛ yi bɑ koo kpĩ bu di wee. 3 Bɑ koo kpĩ bu yɑɑ di ye yɑ nɑɑ kɑburosu mɔ mɑ yɑ rɑ tukɑ ko. 4 Adɑmɑ bɑ ǹ yɛɛ dimɔ yi yi rɑ tukɑ ko tɔnɑ mɑ yi ǹ nɑɑ kɑburosu mɔ. Nge mɛyɑ bɑ ǹ yooyoo temmɔ yèn sɔ̃ gɑ ǹ nɑɑ kɑburosu mɔ bɑɑ mɛ gɑ rɑ tukɑ ko. Bɑ koo gu gɑrisiwɑ yɑɑ disigiɑ. 5 Bɑ ǹ koo yɑɑ ye bɑ mɔ̀ dɑmɑɑ*dɑmɑɑ - Dɑmɑɑ ye, yɑ kɑ sɑɑtɑburu weenɛ. tem bɑɑ mɛ yɑ rɑ tukɑ ko yèn sɔ̃ yɑ ǹ nɑɑ kɑburosu mɔ. 6 Mɛyɑ bɑ ǹ koo mɑɑ wukun yɑɑ tem domi gɑ ǹ nɑɑ kɑburosu mɔ bɑɑ mɛ gɑ rɑ tukɑ ko. Bɑ koo gu gɑrisiwɑ yɑɑ disigiɑ. 7 Mɛyɑ bɑ ǹ koo mɑɑ kurusɔ di. Gɑ nɑɑ kɑburosu mɔ ɑdɑmɑ gɑ ku rɑ tukɑ ko. Bɑ koo gu gɑrisiwɑ yɑɑ disigiɑ. 8 Bu ku yɛɛ yi di, bu ku mɑɑ yin gonu bɑbɑ. Bɑ koo yi gɑrisiwɑ disigii.
9 Yɛɛ yi yi mɑɑ wɑ̃ɑ dɑɑnɔ kɑ nim wɔ̃kuɔ, yi yi wɑ̃ɑ nim sɔɔ gesi kpuro yi bɑ koo di wee. Yiyɑ yi yi kɛ̃ɛritii mɔ kɑ kokosu sɑnnu. 10 Adɑmɑ yi yi kun kɛ̃ɛritii mɔ kɑ kokosu sɑnnu, bɑ koo yi gɑrisiwɑ disigii. 11 Bɑ ǹ koo yi di. Mɛyɑ bu ku mɑɑ yin gonu bɑbɑ. 12 Yɛɛ yi yi gesi wɑ̃ɑ nim wɔ̃ku sɔɔ, kɑ dɑɑnɔ, mɑ yi ǹ kɛ̃ɛritii kɑ koko si mɔ, bɑ koo yi gɑrisiwɑ disigii.
13 Gunɔsu sɔɔ, si bɑ koo gɑrisi disigisu wee, siyɑ gunɔ bɑkeru kɑ sere mɑɑ si su rɑ swɛ̃ɛ di kɑ si su rɑ yɑɑ di 14 kɑ yɑberekunu kɑ sere si su kɑ nu weenɛ 15 kɑ gbɑnɑmgbɑɑnu kɑ mɑɑ si su kɑ nu weenɛ 16 kɑ tɑɑtɑɑnu kɑ booro kɑ sere si su kɑ su weenɛ kɑ kɑsɑ kɑ si su kɑ ye weenɛ, 17 kɑ booro bweseru gɑru kɑ nim kpɑkpɑyɛ, kɑ booro dɑ̃ɑ kɔ̃ɔru 18 kɑ gunɔ gbɑmgbɑyɑku kɑ gunɔ si su rɑ swɛ̃ɛ din bweseru 19 kɑ swɑ̃ɑ wĩɑku kɑ si su kɑ ye weenɛ kɑ kɔ̃ɔ.
20 I ku mɑɑ kɔkɔmii ni nu kɑsɑ kɑ nɑɑsu mɔ di. 21 Adɑmɑ ni sɔɔ, i ko i kpĩ i di ni nu rɑ yɔ̃ɔku tem sɔɔ 22 nge tweɑ kɑ gbɔɔ kɑ ni nu kɑ ye weenɛ. 23 Adɑmɑ ni nu tie nu kɑsɑ kɑ nɑɑsu mɔ mi, i ku nu di.
Ye yɑ rɑ tɔnu ko disigii
24 Yɛɛ gɛɛ wɑ̃ɑ yìn goru tɔnu ù n bɑbɑ u koo ko disigii. U ko n disi mɔwɑ sere kɑ tɔ̃ɔ ten yokɑɔ. 25 Wi u yin goru sɔɔwɑ, u koo win yɑ̃nu teɑwɑ. Kpɑ u n wɑ̃ɑ disi sɔɔ sere kɑ yokɑɔ. 26-28 Yɛɛ yi i ko i gɑrisi disigii yi wee. Yiyɑ yi yi ǹ nɑɑ kɑburosu mɔ kɑ yi yi ku rɑ tukɑ ko kɑ sere yi yi nɑɑsu nnɛ mɔ yi sĩimɔ kɑ nɑɑ sɛ̃nu. Wi u yin gɑɑ bɑbɑ u disi duurɑwɑ mi sere kɑ tɔ̃ɔ ten yokɑɔ. Wi u mɑɑ yin goru sɔɔwɑ u koo win yɑ̃nu teɑwɑ kpɑ u n disi mɔ sere kɑ tɔ̃ɔ ten yokɑɔ.
29 Yɛɛ yi yi kɑbirimɔ sɔɔ wee yi i ko i gɑrisi disigii. Yiyɑ gunɔ yɑntɑru kɑ gunɔ kiikiiru kɑ dɛbɑ kɑ ye yɑ kɑ ye weenɛ kpuro 30 kɑ duurubɛɛku kɑ sureru kɑ korombɔɔru kɑ sokoro kɑ sunɔ nɑki. 31 Yi kpurowɑ i ko i gɑrisi disigii yɛɛ yi yi kɑbirimɔ sɔɔ. Wi u yin gɑɑn goru bɑbɑ u ko n disi mɔwɑ sere kɑ tɔ̃ɔ ten yokɑɔ. 32 Yin gɑɑn goru tɑ̀ n wɔri dendi yɑ̃nu sɔɔ ni bɑ kuɑ kɑ dɑ̃ɑ ǹ kun mɛ kɑ bekuru ǹ kun mɛ kɑ gɔnɑ ǹ kun mɛ kɑ sɑɑki, dendi yɑ̃ɑ ni, nu disi duurɑwɑ mi. Bɑ koo nu dokewɑ nim sɔɔ sere kɑ tɔ̃ɔ ten yokɑɔ. Yen biru nu sere dɛɛrɑ. 33 Yen gɑɑ yɑ̀ n wekeru gɑru wɔri te bɑ kuɑ kɑ sɔndu, ye yɑ wɑ̃ɑ mi sɔɔ kpuro yɑ disi duurɑwɑ mi. Bɑ koo weke te kɔrɑwɑ. Bɑ̀ n nim doke weke te sɔɔ, mɑ nim mɛ, mu tɑ̃rɑ dĩɑnu sɔɔ ǹ kun mɛ nɔrurɑ gɑɑ sɔɔ, bɑ koo ye kpuro gɑrisiwɑ disi. 34 Bɑ̀ n nim doke weke te sɔɔ, mɑ nim mɛ, mu dɑ̃ɑre dĩɑnu sɔɔ ǹ kun mɛ nɔrurɑ gɑɑ sɔɔ, bɑ koo ye kpuro gɑrisiwɑ disi bɑɑ ǹ n weke tere sɔɔn nɑ yɑ wɑ̃ɑ. 35 Mi yɑɑ yen goru tɑ wɔri kpuro gesi, doo koo yerɔ ǹ kun mɛ pɛ̃ɛ wɔ̃ɔ yerɔ, bɑ koo ye kpuro kɔsukuwɑ. Domi ye kpuro yɑ disi duurɑwɑ mi. 36 Yɑɑ goo te, tɑ̀ n wɔri dɔkɔ sɔɔ ǹ kun mɛ dɑɑrɔ, i ǹ ko i nim mɛ gɑrisi disi. Adɑmɑ wi u tu bɑbɑ u disi duurɑwɑ. 37 Tɑ̀ n wɔri dĩɑ bwese te bɑ koo duure sɔɔ, dĩɑ bwese te, tɑ ǹ disi duure. 38 Adɑmɑ bɑ̀ n dɑɑ dĩɑ bwese te wɑsɑn nɑ bu kɑ di, tɑ disi duurɑwɑ mi.
39 Yɑɑ ye bɑ rɑ di yɑ̀ n kɑ tii gu, wi u yen goru bɑbɑ, yɛ̃ro u disi duurɑwɑ mi sere n kɑ ko tɔ̃ɔ ten yokɑ. 40 Wi u yen yɑɑ temɑ ǹ kun mɛ u yen goru sɔɔwɑ, u koo win yɑ̃nu teɑwɑ kpɑ u n disi mɔ sere kɑ tɔ̃ɔ ten yokɑɔ.
41 I ku yɛɛ yi yi kɑbirimɔn yɑɑ tem 42 kɑ yi yi rɑ kɑ nukuru sĩ kɑ yi yi kɑbirimɔ kɑ nɑɑsu nnɛ ǹ kun mɛ yi yi nɑɑ dɑbinu mɔ. I ko ye kpuro deriwɑ mɑm mɑm. 43 I ku de yɛɛ yin bweseru yi bɛɛ ko disigibu. 44 Domi nɛ Gusunɔ nɑ sɑ̃ɑwɑ bɛɛn Yinni. I ko i tii dɛɛrɑsiɑ kpɑ i n dɛɛre. Domi nɑ sɑ̃ɑwɑ Dɛɛro. Yen sɔ̃nɑ i ǹ ko i tii disi doke kɑ yɛɛ yi yi kɑbirimɔ. 45 Nɛnɑ nɑ bɛɛ yɑrɑmɑ Egibitin di nɑ n kɑ sɑ̃ɑ bɛɛn Yinni. Yen sɔ̃, i de i n dɛɛre. Domi nɑ dɛɛre.
46 Woodɑ yeni kpurowɑ nɑ yi yɛɛ kpuron sɔ̃ kɑ gunɔsu kɑ yɛɛ yi yi wɑ̃ɑ nimɔ kɑ sere yi yi kɑbirimɔ. 47 Yerɑ yɑ koo de i n dɑ yɑɑ wunɑnɛ ye bɑ koo kɑ yɑ̃kuru ko kɑ ye bɑ ǹ kɑ yɑ̃kuru mɔ̀. Mɛyɑ mɑɑ yɑ koo bɛɛ sɔ̃ɔsi yɑɑ ye i ko i di kɑ ye i ǹ dimɔ.