1 Lákũ Yesu tɛn bo Luda ↄnn nà, a ìbanↄ doke pìnɛ: Dannɛri, ǹ gwa lákũ ò kpɛ́ mana dí takanↄ bò nà kũ gbɛ̀ mana dí takanↄ. 2 Akũ Yesu pìnɛ: N kpɛ́ zↄ̃kↄ̃ dínↄ è pínki yá? Gbɛ̀ ke kú gu dí kũ oni tó dikↄ̃aro, oni gboro pínkimɛ.

3 Yesu vutɛna Kùkpɛ sĩ̀sĩgɛrɛɛi arɛdↄkↄ̃ana kũ Luda ↄnnwo, akũ Pita kũ Yamisio kũ Yuhanao kũ Anduruo a gbɛ̀ka gusarɛ ò pì: 4 Ǹ owɛrɛ, bↄrɛn yã dínↄ ni kɛɛ? Bↄ́ mɛ́ anigↄ̃ de a pínki kɛgↄrↄ sèeda ũu? 5 Akũ Yesu pìńnɛ: À laakari kɛ, àsun tó ò á sãtɛro. 6 Oni su dasi kũ ma tↄ́o, onigↄ̃ pi Arumasihumɛ ń ũ oni gbɛ̃nↄ sãtɛ dasi. 7 Tó a zĩ̀nↄ baaruu mà kũ a òpiio, àsun bídi kɛro. Sé abirekũnↄ kɛ, ama andunia lakana kpɛ́. 8 Buri kũ burio ni futɛkↄ̃i, lɛmɛ dↄ bùsu kũ bùsuuo. Zĩtɛ yĩgãyĩgãna nigↄ̃ kú gukenↄn kũ nàao. Yã dínↄmɛ nↄ̀wãwã naana ũ.

9 À laakari kɛ. Oni á kũkũ ò á na yãkpatɛkɛrinↄnɛ ń ↄĩ, oni á gbɛ̃gbɛ̃ aduakɛkpɛnↄ gũn. Oni á zɛ bùsu gbɛ̃ zↄ̃kↄ̃nↄ kũ kínanↄ arɛ ma yãi, de àgↄ̃ deńnɛ ma sèedadenↄ ũ. 10 Sé ò ma baaru nna waazi kɛ buri pínki ma gĩa. 11 Tó ò gɛ̀ɛ kãáo yãkpatɛkɛkia, àsun gĩnakɛ à bídi kɛ yã kũ áni oaro. Yã kũ Luda dàárɛ á lɛ́n gↄrↄ kũ̀a à o, zaakũ ákↄ̃nↄ mɛ́ áni yã oro, Luda Ninimɛ. 12 Vĩ̀ni kũ dakũnanↄ ni kↄ̃ kpáḿma ò dɛ. Denↄ ni bo ń nɛ́nↄ kpɛ. Nɛ́nↄ ni bo ń denↄ kũ ń danↄ kpɛ ò ń dɛ. 13 Gbɛ̃ sĩnda pínki ni zãágu ma yãi, ama gbɛ̃ kũ à zɛna gbãna ari a gↄrↄ lɛ́a ni surabana le.

14 Tó a tɛ̃̀ guyakari è gu kũ à de àgↄ̃ kunlo, kyókɛri gↄ̃ dↄ̃, gbɛ̃ kũ ò kú Yudeanↄ bàa sí ò mì pɛ́ kpinↄa. 15 Gbɛ̃ kũ à kú a kpɛ́ musu sún kipa à gɛ̃ kpɛ́ gũn à pↄ́ke sɛ́ à booro. 16 Gbɛ̃ kũ à kú bura sún ɛra bɛ à a uta sɛ́ro. 17 Waiyoo nↄ̀sindarenↄ kũ nɛ́randenↄ gↄrↄ birea. 18 À adua kɛ de yã pì sún kɛ bunsirɛ gↄrↄro, 19 zaakũ wɛ́tãmma nigↄ̃ kun gↄrↄ pìnↄa. Zaa gↄrↄ kũ Luda andunia kɛ̀ ari gbãra a taka dí kɛro, ani sↄ̃ kɛ zikiro. 20 Tó Dikiri dí gↄrↄ pìnↄ lagoro, de gbɛ̃ke ni boro. Ama à gↄrↄ pìnↄ làgo a gbɛ̃ kũ à ń sɛ́nↄ yãimɛ.

21 Gↄrↄ birea tó gbɛ̃ke pìárɛ, à Arumasihu gwa la kesↄ̃ à Arumasihu gwa zã̀ dire, àsun síro. 22 Zaakũ Arumasihu ɛ́kɛnↄ kũ annabi ɛ́kɛnↄ ni su ò sèedanↄ kũ daboyãnↄ kɛ, de ò gbɛ̃ kũ Luda ń sɛ́nↄ sãtɛo, tó ani sí kɛ. 23 À laakari kɛ. Ma gĩnakɛ ma yã pínki òárɛ zaa káaku kↄ̀.

24 Gↄrↄ pìnↄ wɛ́tãmmanaa gbɛra ifãntɛ̃ ni sira kũ, mↄvura ni í kɛro, 25 susunɛnↄ ni woro ludambɛ, gbãna kũ ò kú musunↄ ni yĩgã, 26 gbasa ò Bisãsiri Nɛ́ suna e ludambɛ lukun kũ gbãna zↄ̃kↄ̃ↄo kũ gakurio. 27 Ani a malaikanↄ zĩ andunia kusuru siikↄ̃ gũn, de ò gbɛ̃ kũ Luda ń sɛ́nↄ kakara zaa andunia lɛ́ díkũ kũ a lɛ́ direkũo.

28 À yã dada kaka lía. Tó a ↄnɛnↄ í kpàkpa àtɛn lá bↄ̀tↄ kú, á dↄ̃ kũ guwãnagↄrↄ kà kãni. 29 Lɛmɛ sↄ̃, tó a è yã pìnↄ tɛn kɛ, àgↄ̃ dↄ̃ kũ a sunaa kà kãni, à kú kpɛ́lɛlɛa. 30 Yãpuran matɛn oárɛ gↄrↄ dí gbɛ̃nↄ ni gɛ̃tɛro ari yã pìnↄ gɛ́ kɛo pínki. 31 Musu kũ zĩtɛo ni gɛ̃tɛ, ama ma yãnↄn gɛ̃tɛna vĩro. 32 Gbɛ̃ke a gↄrↄ ke a gↄrↄ zaka dↄ̃ro, bee malaika kũ ò kú musunↄ ke Luda Nɛ́, sé De Luda.

33 À laakari kɛ, á wɛ́ gↄ̃ dↄ, zaakũ á dↄ̃ gↄrↄ kũ ani suro. 34 A de lán gbɛ̃ kũ àtɛn gɛ́ wɛ̃tɛa bà. À a bɛ tò a zĩkɛrinↄnɛ baadi kũ a zĩo, akũ à pì a gudãkpãriinɛ á wɛ́ gↄ̃ dↄ. 35 Ákↄ̃nↄ sↄ̃, á dↄ̃ gↄrↄ kũ bede ni suro, ↄkↄsin yá, lizãndon yá, kolɛzuon yá, ke gudↄo. A yã mɛ́ à tò á wɛ́ gↄ̃ dↄ, 36 de àsun su kãnto à á le átɛn i oro yãi. 37 Yã kũ matɛn oárɛ matɛn o gbɛ̃ sĩnda pínkinɛmɛ, à wɛ́ gↄ̃ dↄ.