Luda yã takada kũ Bisã yão NARONAA 21

Zĩ̀blena Kanaanↄa Nɛgɛvi bùsun

1 Aradi kũ à kú Nɛgɛvi bùsun kína bi Kanaa gbɛ̃mɛ. Kũ à mà Isarailanↄn tɛ́ Atarimu zɛ́n òtɛn su, akũ à bò à dàńlɛ kũ zĩ̀io à ń gbɛ̃kenↄ kũ̀kũ. 2 Akũ Isarailanↄ lɛ́ sɛ̀ Dikirinɛ ò pì: Tó n gbɛ̃ pìnↄ nàwɛrɛ ó ↄĩ, óni ń wɛ̃tɛnↄ kakatɛ mámmam. 3 Dikiri Isarailanↄ yã mà, akũ à Kanaa pìnↄ kpàḿma. Ò ń kákatɛ kũ ń wɛ̃tɛnↄ pínki, akũ ò tↄ́ kpà gu pìinɛ Ɔↄma.

Mↄ̀gotɛ̃ mlɛ̃̀ɛ

4 Kũ ò fùtɛ Oru kpi pì kĩnaa, ò Isira Tɛ̃ra zɛ́ sɛ̀ de ò pã Ɛdↄmunↄ bùsuunɛ. Akũ ò fù mɛnaa zɛ́n 5 ò Luda kũ Musao taari è ò pì: Bↄ́yãi a ó bↄ́tɛ Misila de ò gaga gbárannann? Pↄ́ble kunlo, í kunlo, o zã pↄ́ble gina dín. 6 Akũ Dikiri mlɛ̃̀ pãsĩnↄ zĩ̀ḿma ò ń lɛlɛ, akũ ò gàga dasidasi. 7 Gbɛ̃nↄ sù Musa kĩnaa ò pì: O durunna kɛ̀, zaakũ o Dikiri kũ mↄkↄ̃nwoo taari è. Ǹ kútɛ kɛnɛwɛrɛ de à ó kɛ̃kↄ̃a kũ mlɛ̃̀ dínↄ. Akũ à kútɛ kɛ̀nɛńnɛ. 8 Dikiri pìnɛ: Ǹ mlɛ̃̀ pi ǹ loko lía ǹ pɛ́tɛ. Tó mlɛ̃̀ gbɛ̃ lɛ̀, tó à wɛ́ sɛ̀ à a gwà, ani aafia le. 9 Akũ à mↄ̀gotɛ̃ pì mlɛ̃̀ ũ à lòko lía à pɛ̀tɛ. Tó mlɛ̃̀ gbɛ̃ lɛ̀ akũsↄ̃ à wɛ́ sɛ̀ à mↄ̀gotɛ̃ mlɛ̃̀ɛ pìi gwà, àdi aafia le.

Isarailanↄ pãna Ɛdↄmunↄ kũ Mↄabunↄ bùsunↄnɛ

10 Isarailanↄ dà zɛ́n, akũ ò bùraa kàtɛ Obo. 11 Bona Obo ò gɛ̀ɛ ò bùraa kàtɛ Iyɛ'abarimu gbárannan Mↄabunↄ bùsu ifãboki kpa. 12 Bona gwe ò gɛ̀ɛ ò bùraa kàtɛ Zeredi guvutɛn. 13 Bona gwe ò bùraa kàtɛ Anↄ bara dire, gbáranna kũ à kú Amↄrinↄ bùsu lɛ́zɛkin. Anↄ pìmɛ Mↄabunↄ kũ Amↄrinↄ bùsunↄ lɛ́zɛki ũ. 14 Abire yãin ò pì Dikiri zĩ̀katakada gũn:

Waɛbu kũ à kú Sufa bùsun kũ Anↄ swa'ↄnɛnↄ

15 kũ ń guvutɛ kũ ò tà ari Aranↄo

Mↄabunↄ bùsu lɛ́zɛkin.

16 Bona gwe dↄ ò gɛ̀ɛ Lↄ̀gↄ, gu kũ Dikiri pìn Musanɛ: Ǹ gbɛ̃nↄ kakara mà í kpáḿma. 17 Gwen Isarailanↄ lɛ̀ díkĩna sìn:

Í bo lↄ̀gↄn, gbasa ò lɛ̀ sínɛ,

18 lↄ̀gↄ kũ ó don'arɛdenↄ yↄ̃̀ kũ línↄ,

lↄ̀gↄ kũ kínɛnↄ pà kũ ń gònↄ.

Bona gbárannan ò gɛ̀ɛ Matana. 19 Matana gbɛra Naliɛli, Naliɛli gbɛra Bamↄ. 20 Bamↄ gbɛra guvutɛ kũ à kú Mↄabunↄ bùsun, gu kũ Pisiga mìsↄ̃ntɛ arɛ dↄ gbárannaa.

Zĩ̀blena Siↄ̃ kũ Oguooa

21 Isarailanↄ gbɛ̃nↄ zĩ̀ Amↄrinↄ kína Siↄ̃a ò pì: 22 Ǹ ó gba zɛ́ ò gɛ̃tɛ n bùsuua. Óni pã buranↄ ke geepi líkpɛlaro, óni á lↄ̀gↄ'i miro. Ónigↄ̃ tɛ́ kína zɛ́da gũmmɛ ari ò gɛ́ gɛ̃tɛo n bùsula. 23 Siↄ̃ dí ń gba zɛ́ ò gɛ̃tɛ a bùsuuaro. À a zĩ̀karinↄ kàkara ń pínki, ò bↄ̀tɛ òtɛn gɛ́ńyĩ gbárannan. Kũ ò kà Yaza, ò zĩ̀i kà kũ Isarailanↄ, 24 akũ Isarailanↄ ń dɛdɛ kũ fɛ̃nɛdao ò ń bùsuu sìḿma zaa Anↄ ari Yabokui Amↄninↄ bùsun, zaakũ Amↄninↄ bùsu lɛ́zɛki pì pãsĩ, àdi sí gɛ̃nlo. 25 Isarailanↄ Amↄri wɛ̃tɛnↄ sì pínki kũ Ɛsɛbↄ̃o kũ a lakutunↄ pínki, akũ ò vùtɛn. 26 Ɛsɛbↄ̃mɛ Amↄrinↄ kína Siↄ̃ wɛ́ra ũ. Siↄ̃ zĩ̀i kà yã kũ Mↄabunↄ kína káakuo, akũ à a bùsuu sìa ari Anↄ swai. 27 Abire yãin kɛrɛnↄ dì pi:

À mↄ́ Ɛsɛbↄ̃,

ò Siↄ̃ wɛ́ra pì kɛkɛ ò kátɛ!

28 Tɛ́ bò Ɛsɛbↄ̃ yã,

zĩ̀karinↄ bò Siↄ̃ wɛ̃tɛ pìi gũn,

ò Mↄabunↄ bùsu wɛ́ra Ara kàkatɛ

Anↄ mìi sĩ̀sĩ gbɛ̃ pìnↄ.

29 Waiyoo Mↄabunↄ!

Kɛmↄsi gbàgbarinↄ, a kakatɛmɛ!

Kɛmↄsi tò á gↄ̃gbɛ̃nↄ fã̀kↄ̃a,

à á nↄgbɛ̃nↄ kpà Amↄrinↄ kína Siↄ̃a zĩ̀zↄnↄ ũ.

30 Akũ o ń fú,

o ń dɛdɛ zaa Ɛsɛbↄ̃ ari Dibↄ̃.

O ń kákatɛ ari Nↄfa kũ Mɛdɛbao.

31 Lɛn Isarailanↄ vùtɛ Amↄrinↄ bùsun lɛ. 32 Musa gbɛ̃nↄ zĩ̀ Yaza asiri gwa, akũ Isarailanↄ gwe sì kũ a lakutunↄ pínki, ò pɛ̀ Amↄri kũ ò kú gwenↄa.

33 Akũ Isarailanↄ lìtɛ ò Basã zɛ́ sɛ̀. Akũ Basã kína Ogu gɛ̀ɛńyĩ kũ a zĩ̀karinↄ ń pínki ò zĩ̀i kà kũńwo Ɛdɛrɛi. 34 Dikiri pì Musanɛ: Ǹsun vĩna kɛnɛro, zaakũ ma a nànnɛ n ↄĩ kũ a gbɛ̃nↄ kũ a bùsuuo pínki. Ǹ kɛnɛ lákũ n kɛ̀ Amↄrinↄ kína Siↄ̃ kũ à kí blè Ɛsɛbↄ̃nɛ nà. 35 Akũ ò Ogu dɛ̀ kũ a nɛ́nↄ kũ a zĩ̀karinↄ ń pínki, bee gbɛ̃ mɛ̀n do dí boro, akũ ò a bùsuu pìi sì.