7
Ǹ yã nna kpáma, Dikiri!
Lɛ̀ kũ Dauda sì Dikirinɛ Biliaminu buri Kusu yã musu.
1 Dikiri ma Luda, ma nanyĩ,
ǹ ma mì sí ǹ ma sura ba
gbɛ̃ kũ ò pɛ̀tɛmainↄ ↄĩ.
2 Tó lɛnlo, oni ma kɛ yákiyaki
lán músuu dì kɛńnɛ nàmɛ,
oni ma kɛ̃kɛ̃kↄ̃rɛ,
gbɛ̃ke ni ma mì síro.
3 Dikiri ma Luda, tó ma taari ke kɛ̀,
tó ma ↄ kú yã vãnin,
4 tó ma a vãni kɛ̀ ma gbɛ̃dakenɛ,
ke tó ma gbãna mↄ̀ ma ibɛrɛɛnɛ pã,
5 ǹ tó ma ibɛrɛ pì pɛ́tɛmai à ma kũ,
à gɛ̀sɛ pɛ́tɛpɛtɛma zĩtɛ,
à ma vĩ bùsu'atɛ̃n.
6 Ǹ futɛ ǹ zɛ kũ pↄfɛ̃o, Dikiri,
ǹ futɛ ma ibɛrɛnↄi ń nɛ̀sɛ kpã̀kpã yãi.
Ǹ vu, ma Luda,
ǹ yã gↄ̃gↄ̃ a zɛ́a.
7 Ǹ tó gbɛ̃nↄ kakaranyĩ,
ǹ kí bleḿma zaa musu.
8 Dikiri, ndì yãkpatɛ kɛ kũ gbɛ̃nↄ.
Dikiri, ǹ tó yã bo kũmao nna ma yãzɛdekɛ lɛ́n.
Luda Musude, ǹ yã kɛmɛnɛ ma nɛ̀sɛpura lɛ́n.
9 Luda, mↄkↄ̃mmɛ mana,
ndì nɛ̀sɛ kũ laasunnwo kpátɛ kɛ.
Ǹ gbɛ̃ vãninↄ pãsĩkɛnaa mì dɛ,
ǹ gbɛ̃ mananↄ gba zɛki.
10 Luda Musudemɛ ma sɛ̃gbako ũ,
àdi gbɛ̃ kũ ń nɛ̀sɛ mananↄ sura ba.
11 Luda dì yãkpatɛ kɛ a zɛ́a,
àdi tó yã gↄ̃ vutɛḿma gↄrↄ sĩnda pínki.
12 Tó gbɛ̃ dí a nɛ̀sɛ litɛro,
Luda dì a fɛ̃nɛda lɛ́ kɛkɛ
àdi a sá kú à kã.
13 Àdi a gↄ̃kɛbↄ kũ àdi ga ińnɛnↄ kɛkɛ,
àdi a kà tɛ́denↄ kpá sála.
14 Ǹ gwa, yã vãni dì nↄ̀ dↄ gbɛ̃n,
akũ àdi wari nↄ̀ sí à nɛ́ i ɛ́kɛ ũ.
15 Àdi wɛ̀ɛ yↄ̃ gbɛ̃nↄnɛ zã̀zã tankutɛ ũ,
akũ àdi zu wɛ̀ɛ kũ à yↄ̃̀ↄ pìi gũn.
16 A àlesi pãsĩ dì doi,
a wɛ́tãna gbɛ̃nↄa dì wí a mìia.
17 Mani Dikiri sáabu kpá a manakɛ yãi,
mani Dikiri Musude tↄ́ bo kũ lɛ̀sinaao.