10
Wɛ́kɛna Ludaa à yãkpatɛ kɛ bisãsirinↄnɛ
1 Dikiri, bↄ́yãi ń zɛna zã̀zãa?
À kɛ̀ dera ndì n zĩda utɛ warikɛgↄrↄaa?
2 Gbɛ̃ vãni dì gbãnasaride wɛtɛ à dɛ zĩdabi gũn,
àdi manafiki kɛnɛ à a kũ.
3 Gbɛ̃ vãni dì a pↄ́nidɛnanↄ ĩa dã,
àdi sãnkarade sáabu kpá àdi Dikiri tↄ́ yaka.
4 Gbɛ̃ vãni zĩdabi mɛ́ à tò àdi Dikiri ki wɛtɛro,
à Luda laasun vĩro.
5 Yã kũ àdi kɛ pínki dì bonɛ manamɛ,
àdi a zĩda kara, àdi n doka daro,
àdi lɛ́zuki kɛ a ibɛrɛnↄa.
6 Àdi pi áni kpágularo,
ánigↄ̃ kú kũ pↄnnao warikɛnaa sari.
7 Ɛ́kɛ kũ gbɛ̃kanaao kũ yã pãsĩo a lɛ́ pà,
àlesi pãsĩ kũ yã vãnio mɛ́ àdigↄ̃ da a lɛ́n.
8 Àdi natɛ taarisaridenɛ lakutu kpɛ
de à le à a dɛ asiri gũn,
àdi àleside kpákpa gukpado.
9 Àdi natɛ gbɛ̃nↄnɛ asiri gũn lán músu bà,
àdi natɛ lákpɛn de à le à gbãnasaride kũ.
Tó à a kũ̀, àdi a gátɛ kũ a bàao.
10 Gbɛ̃ kũ à a lè à kũ̀ dìgↄ̃ wutɛna sùum,
gbãna mɛ́ à a nɛ̀.
11 Gbɛ̃ vãni dì pi Luda dì yã tàasi káro,
àdi ↄ kú a wɛ́amɛ àdi gu ero.
12 Dikiri, ǹ futɛ ǹ su kũ n gbãnao,
Luda, ǹgↄ̃ takasidenↄ tàasi ká.
13 Luda, bↄ́yãin gbɛ̃ vãni dì dↄkɛ kũnwo lɛɛ?
Àdi pi a swɛ̃̀ɛ gũn ĩni wari dↄáwaro.
14 Bee kũ abireo ndì gbɛ̃nↄ yã'ũmmana e sãnsãn,
ndì ń pↄsira yã da de ǹ le ǹ ↄ daḿma.
Gbãnasaride dì a zĩda kpámma,
tonɛ kũ à gwàri vĩro kpànyĩriimɛ n ũ.
15 Ǹ gbɛ̃ vãninↄ kũ gbɛ̃ pãsĩnↄ gã̀sã ɛ́ńnɛ,
ǹ ń yã vãni kũ òtɛn da ò dↄ̃ro ɛraḿma.
16 Dikiri dìgↄ̃ kí ble gↄrↄ sĩnda pínki,
a yãdarisarinↄ ni kakatɛ a bùsun.
17 Dikiri dì takasidenↄ wɛ́kɛna sí,
àdi ń gba swɛ̃̀ɛ, àdi sã kpá ń ↄ́ↄ dↄi.
18 Àdi zɛ kũ tonɛ kũ à gwàri vĩronↄ
kũ gbɛ̃ kũ òtɛn wɛ́ tãḿmanↄ,
de bisãsiri kũ à de bùsutiti ũ
sún tó swɛ̃̀ kɛ̃ gbɛ̃nↄgu doro yãi.