26
Gbɛ̃ mana aduakɛnaa
Dauda lɛ̀ɛ.
Ǹ yã nna kpáma Dikiri,
zaakũ ma yã kɛ̀ a zɛ́a,
ma n náani kɛ̀ sikaa sari.
Ǹ ma yↄ̃ ǹ ma gwa Dikiri,
ń ma nɛ̀sɛ kũ ma laasunnↄ gwa,
zaakũ n yenyĩ dìgↄ̃ domɛnɛ arɛ,
madì zĩ kɛ n yãpuraa.
Madì vutɛ kũ ɛ́kɛdenↄoro,
madì gɛ̃ manafikidenↄ tɛ́ro.
Ma zã durunnakɛrinↄ kↄ̃kakaranan,
madì vutɛ kũ gbɛ̃ vãninↄoro.
Ma ↄ pìpi ma taarisarikɛ sèeda ũ,
matɛn lika n gbagbakii, Dikiri,
de mà le mà n sáabu kpá lɛ̀sinaa gũn,
mà n yãbonsarɛnↄ kpàkpa kɛ.
Dikiri, má ye n kpɛ́ kũ ndìgↄ̃ kunyĩ,
gu kũ n gakuri dì kipan.
 
Ǹsun ma kakara kũ durunnakɛrinↄoro,
ǹsun ma baka kakara kũ gbɛ̃dɛrinↄ pↄ́oro.
10 Laasun vãni mɛ́ àdigↄ̃ dońnɛ arɛ,
ń ↄ dìgↄ̃ pa kũ ↄdↄnkpɛgbanↄ.
11 Makũ sↄ̃, madì yã kɛ a zɛ́a,
ǹ ma wɛ̃nda gwa, ń ma sura ba.
 
12 Ma zɛki è gu manan,
mani Dikiri sáabu kpá pari kↄ̃kakaranaa gũn.