35
Gbɛ̃ mana ↄ́ↄdↄna Dikirinɛ
Dauda lɛ̀ɛ.
1 Dikiri, ǹ íbɛrɛ sɛ́ kũ ma ibɛrɛnↄo,
ǹ zĩ̀ ká kũ gbɛ̃ kũ òtɛn zĩ̀ ká kũmaonↄ.
2 Ǹ n sɛ̃gbako kũ n zĩ̀kabↄnↄ sɛ́tɛ,
ǹ futɛ ǹ kpámai.
3 Ǹ n sári kũ n fɛ̃nɛdao sɛ́ dↄ,
ǹ gɛ́ ǹ da gbɛ̃ kũ òtɛn pɛ́tɛmainↄlɛ.
Ǹ omɛnɛ ma surabariimɛ n ũ.
4 Gbɛ̃ kũ òtɛni ma wɛtɛ ò ma dɛnↄ,
ǹ tó ò kpɛ li, wé'i ń kũ.
Gbɛ̃ kũ òtɛn kisira gↄ̃gↄ̃mainↄ,
ǹ tó ò fua, mà ń kpɛ e.
5 Ògↄ̃ de lán ése ũkã kũ ĩa sɛ̀tɛ bà,
Dikiri Malaika pɛ́ḿma.
6 Ń zɛ́ gↄ̃ gusira ũ kũ guzãrɛɛo,
Dikiri Malaika ↄ sↄ̃ńyĩ.
7 Zaakũ ò wɛ̀ɛɛ yↄ̃̀mɛnɛ pã,
mádi yãke kɛńnɛro, akũ ò bàa kpàkpamɛnɛ.
8 Ǹ tó kisira ń le kãnto,
ǹ tó bà kũ ò kpàkpamɛnɛ ń kũ
de ò lɛ́tɛ wɛ̀ɛ kũ ò yↄ̃̀ↄ pìi gũn.
9 Ma pↄ ni gbasa à kɛ Dikiria nna,
mani pↄnna kɛ kũ à ma sura bà yãi.
10 Mani pi kũ nɛ̀sɛdoo,
Dikiri, dí mɛ́ à de lán n bàa?
Ndì takasidenↄ sí gbãnamↄnnɛrinↄa,
ndì wɛ̃ndadenↄ bo ń wɛ́tãmmarinↄ ↄĩ.
11 Sèeda ɛ́kɛdenↄ dì futɛmai,
òdi yã kũ má a yã dↄ̃ro lalama.
12 Òdi yã mana fĩna bomɛnɛ kũ yã vãnio,
akũ ma gↄ̃ boado ũ.
13 Tó ò gyã kɛ̀ sↄ̃, ma uta kasa dà,
ma ma zĩda bùsa kũ lɛ́yĩnaao,
ma adua kɛ̀ńnɛ lakanaa sari,
14 lákũ ò de ma gbɛ̃nna ke ma danɛ ũ bà.
Ma kure má mìpɛtɛna kũ pↄsirao,
lákũ ma dan matɛn wɛ̃nda kɛnɛɛ bà.
15 Ama kũ ma gɛ̃̀ɛ sì,
ò lìkamai kũ pↄnnao,
ò ma kɛ pã ò lɛ̀tɛma,
ò ma yaka lakanaa sari.
16 Ò ma fobò pãsĩpãsĩ,
ò saka pìtima.
17 Dikiri, ĩnigↄ̃ ma gwa lɛ ari bↄrɛɛ?
Músu pìnↄ tɛni ma kɛ yákiyaki,
ǹ ma síḿma màgↄ̃ kú wɛ̃̀ndiio.
18 Mani n sáabu kpá pari kↄ̃kakarana gũn,
mani n tↄ́ kpá gbɛ̃nↄ wára.
19 Ǹsun tó ma ibɛrɛnↄ ma yáa dↄro,
ǹsun tó gbɛ̃ kũ ò zã̀magu pãnↄ
ma gwa kũ wɛ́ vãnioro.
20 Yã nna dì bo ń lɛ́nlo,
òdi yã di yãketesaridenↄa.
21 Òdi lɛ́ atɛ̃ ò pi:
Ɛ̃hɛ̃, ɛ̃hɛ̃, ó wɛ́ è.
22 Dikiri, n wɛ́ è, ǹsungↄ̃ yĩtɛnaro,
ma Dikiri, ǹsungↄ̃ zã̀ kũmaoro.
23 Ma Luda, ǹ futɛ ǹ zɛ kũmao,
ma Dikiri, ǹ tó yã bo kũmao nna.
24 Ndì yã kɛ a zɛ́a,
Dikiri ma Luda, ǹ yã nna kpáma,
ǹsun tó ò ma yáa dↄro.
25 Ǹsun tó ò o ń swɛ̃̀n ò ma nɛro,
ǹsun tó ò pi ò ma mↄ bɛ̃nɛro.
26 Lákũ òtɛn pↄnna kɛ ma wɛ́tãmmanaa musu nà,
ǹ tó wé'i ń kũ, mà ń kpɛ e.
Lákũ òtɛn zↄ̃kↄ̃kɛ mↄmɛnɛ nà,
ǹ wé'i daḿma ǹ ń kpe bo.
27 Gbɛ̃ kũ ma bona mana dì kɛńnɛ nnanↄ
ǹ tó ò pↄnna kɛ ò ayuwii kɛ.
Gbɛ̃ kũ ma bona aafiaa dì káńgunↄ
ǹ tó ògↄ̃ pi baala'i, Dikiri mɛ́ à zↄ̃kↄ̃.
28 Makũ sↄ̃, mani n náani yã o,
manigↄ̃ n sáabu kpá gↄrↄ sĩnda pínki.