51
Sùrukpana Ludaa
Lɛ̀ kũ Dauda dà gↄrↄ kũ annabi Natã gɛ̀ɛ a kĩnaa a zinakɛna kũ Basɛbao gbɛra
Luda, ǹ ma wɛ̃nda gwa n yenyĩ gũn,
ǹ ma taarinↄ gogo n mana zↄ̃kↄ̃ yãi.
Ǹ ma durunna kɛ̃ma mà gↄ̃ swáswa,
ǹ ma durunna kɛ̃ma míↄmiↄ.
 
Má a taarinↄ dↄ̃ sà,
ma durunna dìgↄ̃ sãmaguro.
Mↄkↄ̃mmɛ ma durunna kɛ̀nnɛ,
ma yã kũ ń yeiro kɛ̀.
Tó n yã ò, n yã nigↄ̃ zɛ́ vĩ,
tó n yãkpatɛ kɛ̀ kũmao, n yã nigↄ̃ nna.
Zaa ma da nɛ̀sɛn má vãni,
má durunna vĩ zaa ma ina gↄrↄmɛ.
Nɛ̀sɛmana mɛ́ àdi kángu,
ǹ ↄ̃ndↄ̃ damɛnɛ ma swɛ̃̀ɛ gũn.
 
Ǹ ma zú o kũ sakoo mà pu swáswa,
ǹ ma nɛ̀sɛ pípimɛnɛ mà gↄ̃ púu táitai.
Ǹ tó mà pↄnna kɛ kũ yáadↄnaao,
ǹ tó ma wá kũ n bùsanↄ were.
Ǹsun ma durunnanↄ yã daro,
ǹ ma yã vãninↄ bo ǹ zukũna pínki.
 
10 Luda, ǹ nɛ̀sɛpura damɛnɛ,
ǹ ɛra ǹ tó ma laakari gↄ̃ kpatɛna.
11 Ǹsun ma zukũnaro,
ǹsun n Nini símaro.
12 Ǹ ɛra ǹ tó ma pↄ kɛ nna
kũ n ma sura bà yãi.
Ǹ ma nini gba màgↄ̃ n yã ma,
13 gbasa mà n yã dada yãvãnikɛrinↄnɛ,
durunnakɛrinↄ ni ɛra ò arɛ dↄmma.
 
14 Ǹ ma bo gbɛ̃dɛna yãn,
Luda, Luda ma surabarii,
mani lɛ̀ sí n yãkɛna a zɛ́a musu.
15 Dikiri, ǹ ma gba lɛ́
mà n sáabu kpá.
16 Sa'onaa dì kɛnnɛ nnaro,
tó lɛnlo de ma ò.
Sa'opↄ kũ òdi ká tɛ́n à tɛ́ kũ dì kánguro.
17 Sa kũ matɛn ommamɛ ma nɛ̀sɛyĩda ũ,
ndì wɛ̃ndade sùrude gya boro.
 
18 Luda, ǹ arubarika da Zaiↄ̃gu
n pↄyeina mana gũn,
ǹ Yurusalɛmu bĩni gba gbãna,
19 gbasa sa'ona a zɛ́a ni kángu
kũ sa'opↄ kũ òdi ká tɛ́n à tɛ́ kũo,
oni sa o kũ zùsanɛnↄ n gbagbakia.