71
Mare zↄ̃kↄ̃ aduakɛnaa
1 Dikiri, mↄkↄ̃nn ma nanyĩ,
ǹsun tó wé'i ma kũ zikiro.
2 Ǹ ma bo ǹ ma mì sí n manakɛna yãi,
ǹ sã kpámai ǹ ma sura ba.
3 Ǹgↄ̃ de ma utɛki gbɛ̀ kũ manigↄ̃ gɛ́ utɛn ũ.
N dìtɛ ǹ ma sura ba,
ma gbɛ̀si kũ ma zɛki gbãnaoomɛ n ũ fá!
4 Ma Luda, ǹ ma bo yãvãnikɛrinↄ ↄĩ,
ǹ ma sí gbɛ̃ vãni pãsĩnↄa.
5 Mↄkↄ̃nn ma wɛ́ dↄnyĩ, Dikiri Luda,
mↄkↄ̃nn má n náani vĩ zaa ma kɛfɛnnakɛgↄrↄa.
6 Ma gbãna lèmma zaa ma igↄrↄ,
mↄkↄ̃n mɛ́ n ma bo ma da nɛ̀sɛn.
N táakin madìgↄ̃ lɛ́.
7 Ma kunna de yãbonsarɛ ũ gbɛ̃nↄnɛ dasi,
zaakũ mↄkↄ̃mmɛ ma utɛki gbãna ũ.
8 N táakilɛna dìgↄ̃ da ma lɛ́n,
madìgↄ̃ n manakɛ bo kↄnkↄ kũ ↄkↄsio.
9 Ǹsun pã kpámai ma zĩkũkɛna yãiro,
ǹsun ma zukũna ma gbãna lakana yãiro.
10 Zaakũ ma ibɛrɛnↄ tɛni ma pi,
ma wɛtɛrinↄ tɛn lɛ́ kpákũsũmai ma wɛ̃̀ndi bona yãi.
11 Ò pì: Luda gìimɛ, ò pɛ́a ò kũ,
gbɛ̃ke kun kũ à a sura baro.
12 Luda, ǹsungↄ̃ kú kũmao zã̀ro,
ma Luda, ǹ kɛ likalika ǹ mↄ́ ǹ kpámai.
13 Ǹ tó wé'i gbɛ̃ kũ òtɛn yã dimanↄ kũ
de ò kakatɛ,
ǹ tó sↄ̃sↄ̃na da gbɛ̃ kũ òtɛn wɛ́ tãmanↄla
de ń tↄ́ yaka.
14 Makũ sↄ̃, ma wɛ́ nigↄ̃ dↄnyĩ,
manigↄ̃ n táaki lɛ́ màgↄ̃ gɛ́.
15 N manakɛna nigↄ̃ da ma lɛ́n gↄrↄ sĩnda pínki
kũ n surabana kũ má a lɛ́ dↄ̃roo.
16 Mani su mà n zↄ̃kↄ̃kɛyãnↄ o Dikiri Luda
n mɛ̀n do manakɛn mani da gbɛ̃nↄnɛ.
17 N yã dàmɛnɛ zaa ma kɛfɛnnakɛgↄrↄa,
Luda, ari tera matɛni n yãbonsarɛnↄ o'o.
18 Bee kũ ma zĩ kũ̀, ma mìkã pura,
ǹsun ma tónlo, Luda,
de mà le mà n gbãna baba teradenↄnɛ,
mà n gbãnakɛyã da gbɛ̃ kũ òtɛn futɛnↄnɛ ń pínki.
19 Luda, n manakɛnaa zↄ̃̀ susunɛnↄa,
n yã zↄ̃kↄ̃ↄ kɛ̀, dín oni lɛkↄ̃a kũnwoo?
20 N tò wari pãsĩ ma le dasidasi,
ama ĩni ɛra ǹ ma gba wɛ̃̀ndii dↄ,
ĩni ɛra ǹ ma bo zĩtɛ.
21 Ĩni ma bɛ̀ɛrɛ karamɛnɛ,
ĩni ɛra ǹ ma laakari kpátɛmɛnɛ dↄ.
22 Ma Luda, mani n sáabu kpá
kũ mↄrↄↄo n náani yãi.
Isarailanↄ Luda kũ ń kú adona,
mani n táaki lɛ́ kũ gidigboo.
23 Ayuwii nigↄ̃ dↄ ma lɛ́n,
makũ kũ n ma mìi sì mani n táaki lɛ́.
24 Manigↄ̃ n manakɛna o gↄrↄ sĩnda pínki,
zaakũ wé'i gbɛ̃ kũ ò ma wɛtɛ kũ vãnionↄ kũ̀,
ò gↄ̃̀ bídi gũn.