78
Lɛ̀ kũ Isarailanↄ yã ó gbáo laakarii
Asafa lɛ̀ɛ.
Ma gbɛ̃nↄ, à ma yãdannɛna ma,
à sã kpá ma yãi.
Mani yã oárɛ kũ yáasio,
mani yã kũ à utɛna zaa zĩ bↄkↄtɛárɛ,
yã kũ o mà akũsↄ̃ ó dↄ̃,
yã kũ ó denↄ bàbawɛrɛ.
Óni yã pì utɛ ó nɛ́nↄnɛro,
óni Dikiri táakilɛna da ó daikorenↄnɛ,
a gbãna kũ yãbonsarɛ kũ à kɛ̀nↄ.
À yã dìtɛ Yakubu burinↄnɛ,
à a doka dà Isarailanↄnɛ,
à dìtɛ ó dizinↄnɛ ò tó ń nɛ́nↄ dↄ̃,
de à gↄ̃ ń buri kũ ò kpɛ́nↄnɛ futɛokarayã ũ,
gbasa ò futɛ ò dada ń nɛ́nↄnɛ se,
de ò le ò Luda náani kɛ,
a yãkɛnanↄ sún sãńguro,
ama onigↄ̃ a yãditɛnanↄ kũna.
Ògↄ̃ de lán ń dizinↄ bàro,
zaakũ ò sãgbãna kɛ̀ ò gì Luda yãi,
ń swɛ̃̀ kú Ludaaro, ò yãpura vĩnɛro.
 
Ɛflaimu burinↄ bi kàzurinↄmɛ,
akũ ò bòru kpɛ zĩ̀i gũn.
10 Odi zɛ kũ Luda bàka kunna kũńwo yãoro,
ò gì tɛ́ a dokaiii.
11 A yãkɛnanↄ sã̀ńgu
kũ yãbonsarɛ kũ à mↄ̀ńnɛnↄ.
12 À daboyãnↄ kɛ̀ ń dizinↄ wára
Zoã wɛ̃tɛ gũn, Misila bùsun.
13 À ísira zↄ̃̀kↄ̃rɛ à bikũ̀ kũńwo,
à tò í gↄ̃̀ zɛna lán bĩni bà.
14 À dòńnɛ arɛ tɛ́luku gũn fãnantɛ̃,
gwãani sↄ̃ kũ tɛ́ gupurao.
15 À gbɛ̀si pàra gbárannan,
à í kpàḿma zↄ̃kↄ̃ lán ísira'i bà.
16 À tò í bòńnɛ gbɛ̀n,
à tò í bàa lɛ̀ lán sɛ̀bɛɛ bà.
 
17 Akũ ò kpɛ́ òtɛn durunna kɛnɛ,
ò gì Luda Musude yã mai gbárannan.
18 Ò Luda lɛ̀ ò gwà kũ nɛ̀sɛ plao,
ò ń pↄyeina pↄ́ble gbɛ̀kaa.
19 Ò Luda vãni bò ò pì:
Luda ni fↄ̃ à ó gbá pↄ́ble gbárannan la yá?
20 Bee kũ à gbɛ̀ɛ lɛ̀, í bò à dàgula,
ani fↄ̃ à pↄ́ble ke nↄ̀bↄ kpáwá dↄ yá?
21 Kũ Dikiri yã pìi mà, à pↄ fɛ̃̀,
akũ tɛ́ fùtɛ à dà Yakubu burinↄla,
à pↄfɛ̃ kìpa Isarailanↄa.
22 Zaakũ odi Luda yã síro,
odi a surabana gbãna náani kɛro.
23 Bee kũ abireo à yã dìtɛ ílukunɛ,
à musu zɛ́ wɛ̃̀,
24 akũ à mana kↄ̀tɛńnɛ ò blè,
à pↄ́ble kũ à bò musu kpàḿma.
25 Ò malaikanↄ pↄ́ble blè,
à zànaa kɛ̀ńnɛ, à gɛ̃̀ ↄla.
26 À tò ĩa gbãna bò ifãboki kpa,
à pɛ̀ gɛ̀nↄmidↄki kpa ĩaa dↄ kũ a gbãnao,
27 akũ à nↄ̀bↄↄ kↄ̀tɛńnɛ dasi lán lukutɛ̃ bà,
bãnↄ dàńla lán ísiralɛ bùsu'atɛ̃ bà.
28 À tò ò kìpakipa ń bùran,
ò gↄ̃̀ kátɛ likana ń kpɛ́nↄi.
29 Luda pↄ́ kũ òtɛni a ni dɛnↄ kpàḿma,
akũ ò blè ò kã̀ gíngin.
30 De a ni kpɛ́ à boḿma,
gↄrↄ kũ pↄ́ble pì kpɛ́ da ń lɛ́n,
31 Luda pↄfɛ̃ fùtɛńyĩ,
à Isaraila gↄ̃ gbãnanↄ dɛ̀dɛ,
à ń kɛfɛnnanↄ lɛ̀ à nɛ̀.
 
32 Bee kũ abireo ò kpɛ́ òtɛn durunna kɛ,
bee kũ a yãbonsarɛkɛnanↄ, odi a náani kɛro.
33 Akũ à ń wɛ̃̀ndii kɛ̀ńnɛ pã lán lɛ́'ĩa bà,
à tò sunyĩ ń lé.
34 Tó à ń gbɛ̃kenↄ dɛ̀dɛ, òdi a ki wɛtɛ,
òdi ɛra ò arɛ dↄa kũ wãnao.
35 Akũ ò dↄ̀n sà kũ Ludamɛ ń gbɛ̀si ũ,
ò dↄ̃̀ kũ Luda Musudemɛ ń surabari ũ.
36 Gↄrↄ kũ̀a sà òdi lɛ́ maa,
òdi ɛ́kɛ tonɛ,
37 ń swɛ̃̀ kúaro,
ò a bàka kunna kũńwo yã gbòro.
38 Àpi sↄ̃ à ń wɛ̃nda gwà,
à ń durunnanↄ kɛ̃̀ḿma, adi ń kakatɛro.
Àdigↄ̃ a zĩda milɛ ble baala'i,
àdi a pↄfɛ̃kipammana ↄ lago.
39 À ń bisãsirikɛ dↄ̃̀ḿma,
kũ òdi gɛ̃tɛ sunaa sari lán ĩa bà.
 
40 Ò sãgbãna kɛ̀nɛ gbárannan gɛ̃̀n ũgbangbaa!
Ò a pↄ yàkanɛ sɛ̃̀ntɛ gwe à kɛ̀ dasi.
41 Ò Luda lɛ̀ ò gwà, ò Luda lɛ̀ ò gwà,
ò Isarailanↄ Luda kũ à kú adonaa fɛ̃̀.
42 A iko gbãna sã̀ńgu,
lákũ à ń sí ń ibɛrɛnↄa nà,
43 lákũ à daboyãnↄ kɛ̀ Misila nà,
akũsↄ̃ à yãbonsarɛnↄ kɛ̀ Zoã bùsun.
44 À ń swa ínↄ lì aru ũ,
akũ odi fↄ̃ ò a í mì doro.
45 À ífĩninↄ kàńgu, ò ń soso,
kũ kaso kũ ò kisira kpàńyĩnↄ.
46 À tò kwanↄ ń bú pↄ́blewɛnↄ blè,
à sutɛ̃nↄ kà ń burapↄnↄn.
47 À tò legũgbɛ ń geepi líkpɛnↄ kɛ̀ búgubugu,
zàga'ĩa ń kaka línↄ ɛ̀'ɛ.
48 À ń pↄ́kãdenↄ kàkatɛ kũ legũgbɛɛo,
sura pɛ̀tɛ ń kpàsanↄa.
49 À a pↄfɛ̃ zↄ̃kↄ̃ↄ bòboḿma,
à kɛ̀ ĩni kũńwo kũ pↄfɛ̃o kũ pɛ̃tɛ̃o,
à malaika kisiradenↄ gbàrɛḿma.
50 À a pↄfɛ̃ zɛ́ wɛ̃̀, adi gí ganɛ doro,
à gagagyã kàńgu.
51 À Misila daudunↄ dɛ̀dɛ ń pínki,
Hamu buri nɛ́gↄ̃gbɛ̃ káakunↄ gàga.
52 Ama à bò kũ a gbɛ̃nↄ lán sãnↄ bà,
à dòńnɛ arɛ gbárannan lán sã kpàsanↄ bà.
53 À tɛ́ kũńwo kũ laakariio kpátɛna vĩna sari,
ń ibɛrɛnↄ sↄ̃, ísira dàńla.
54 À kà kũńwo a bùsu lɛ́n,
gusĩsĩde kũ à sì kũ a gbãnaoo pìi.
55 À pɛ̀ńnɛ burinↄa,
akũ à ń bùsuu kpàatɛtɛńnɛ ń pↄ́ ũ,
à ↄnn kpàkpa Isaraila burinↄa.
 
56 Akũ ò Luda yↄ̃̀ ò gwà ò gì a yã mai,
ò Luda Musude yãditɛnanↄ kũnaro.
57 Ò ɛ̀ra ò bò a kpɛ lán ń denↄ bà,
ò náani vĩro lán sá kotinaa bà.
58 Ò a pↄ fɛ̃̀ kũ ń sa'okinↄo,
ò a nɛ̀sɛgↄ̃ba fùtɛ kũ ń tãnanↄ.
59 Kũ Luda dↄ̃̀ lɛ, akũ a pↄ fɛ̃̀,
à gì Isarailanↄi pãsĩpãsĩ.
60 À a bizakuta tò zaa Silo gwe,
a bɛ kũ à dↄ̀ bisãsirinↄ tɛ́ pìi.
61 À tò ń wɛtɛrinↄ sù ò a àkpatii sɛ̀,
àkũmɛ a gbãna kũ a gakuribokio ũ.
62 À tò ò a gbɛ̃nↄ dɛ̀dɛ kũ fɛ̃nɛdao,
a pↄ fɛ̃̀ buri kũ ń sɛ́i.
63 Ń kɛfɛnnanↄ tɛ́ kũ̀ zĩ̀i gũn,
ń nↄkparenↄ dí le ò zãkɛlɛɛ sì doro.
64 Ò ń sa'orinↄ dɛ̀dɛ kũ fɛ̃nɛdao,
ń gyaanↄnↄ dí fↄ̃ ò ↄ́ↄ dↄ̀ro.
 
65 Akũ Dikiri fùtɛ sà lán i'orii bà,
lán gↄ̃sa kũ à vù kũ wɛ̃'io bà.
66 À ń wɛtɛrinↄ gbɛ̃̀, ò bòru kpɛ,
à tò ò gↄ̃̀ kũ wé'io gↄrↄ sĩnda pínki.
67 À gì Ɛflaimu burinↄi,
adi Yusufu buri pì sɛ́ doro.
68 Yuda burin à sɛ̀ sà
kũ Zaiↄ̃ kpi kũ à yeiio.
69 À a kúki bò musumusu gwe,
anigↄ̃ kun gↄrↄ sĩnda pínki lán andunia katɛnaa bà.
70 Akũ à a zↄ̀bleri Dauda sɛ̀,
à a bò sãkpasan.
71 À a bò sãdãnan, à dò Isarailanↄnɛ arɛ,
Luda gbɛ̃ Yakubu burinↄ kínamɛ.
72 Dauda ń kpá a kpɛ kũ nɛ̀sɛdoo,
à dòńnɛ arɛ kũ a ↄ arubarikadeo.