81
Isarailanↄ dikpɛ lɛ̀ɛ
Asafa lɛ̀ɛ.
1 À ayuwii kɛ Luda ó gbãnaa,
à pↄnna wiki lɛ́ Yakubu burinↄ Ludaa.
2 À lɛ̀ dↄ à bata lɛ́
kũ mↄrↄ'ũ nnao kũ gidigboo.
3 À kuru pɛ́ mↄ dufu bonaao,
à pɛ́ tó mↄ kɛ̀ papana ó dikpɛgↄrↄ,
4 zaakũ à de doka ũ Isarailanↄnɛmɛ,
yã kũ Yakubu burinↄ Luda dìtɛn gwe.
5 À yã pìi dà Yusufu burinↄnɛ
gↄrↄ kũ à vĩ̀ Misila bùsula.
Ò kòto kũ ò dↄ̃ro mà à pì:
6 Ma aso gò á gã̀aa,
ma á ↄ bò ɛ̃bona zĩn.
7 A ↄ́ↄ dↄ̀mɛnɛ warikɛgↄrↄa, akũ ma á bó,
ma weáwa zaa legũvĩnaa gũn,
ma á lɛ́ ma á gwá zaa Mɛriba í kĩnaa.
8 À sã kpá ma gbɛ̃nↄ, mani lɛ́ daáwa,
ákↄ̃nↄ Isarailanↄ, tó áni ma yã ma dé!
9 Àsungↄ̃ buri zĩ̀tↄnↄ tãna vĩ á tɛ́ro,
àsun kútɛ dikiri pãndenɛro.
10 Makũmɛ Dikiri á Luda ũ,
ma á bↄ́tɛ Misila.
À á lɛ́ wɛ̃, mani tó à kã.
11 Ama Isarailanↄ gì ma yã mai,
ma gbɛ̃ pìnↄ dí mì natɛmɛnɛro.
12 Akũ ma ń tó kũ ń sãgbãnakɛo,
ò tɛ́ ń zĩda pↄyeinaai.
13 Tó ò pi Isarailanↄ ni ma yã ma,
tó ma gbɛ̃nↄn tɛ́ ma yãi,
14 de mani ń ibɛrɛnↄ sↄ̃pɛtɛ gↄ̃̀nↄgↄ̃nↄ,
mani ↄ sↄ̃ ń zãngurinↄi.
15 Ma zãngurinↄ ni kã natɛ ma arɛ,
ń wɛ́tãmmana nigↄ̃ lakana vĩro.
16 Gbasa mà á gwa kũ pↄ́blewɛ manao,
mà ɛra mà gbɛ̀ zↄ́'i kpááwa à mↄ́awa.