1 Toâq vớt máh cũai proai I-sarel loŏh tễ cruang Ê-yip-tô, khoiq bữn pỗn culám tacual chít cumo chơ, tâng casâi bar (la casâi Siu) cumo pỗn Sa-lamôn cỡt puo cũai I-sarel, án tabŏ́q táq dống sang. 2 Yáng clống dống sang la cuti tapoât chít coat, la‑a bar chít coat, cớp sarỡih pái chít coat.*6:2 Tỡ la cuti sám bar chít tapul mễt, la‑a sám takêh mễt, cớp sarỡih sám muoi chít la pái mễt tadĩ. 3 Ntrỡn choâng ngoah mut dống sang la bar chít coat, cớp la‑a muoi chít coat,†6:3 Tỡ la cuti sám pỗn mễt tadĩ, cớp la‑a sám takêh mễt. machớng cớp tâng clống Dống Sang Toâr. 4 Viang dống sang bữn ngoah toong alúh, tâng clống la‑a ma coah tiah hễp. 5 Bar coah piang pa cớp coah clĩ dống sang, án táq cỡt máh clống pái tran. 6 Clống tran pưn la‑a sỡng coat, clống mpứng dĩ la‑a tapoât coat, cớp clống tran pỡng la‑a tapul coat.‡6:6 Tỡ la sám bar mễt cớp pái chít sen-ti-mễt, cớp sám bar mễt tapul chít sen-ti-mễt, cớp sám pái mễt cớp muoi chít sen-ti-mễt. Cớp tâng dống sang án táq dŏq ntốq ien aloap, yuaq án tỡ ễq tốc ratâng.

7 Tamáu ễ táq dống sang, noau tốc pỡ ntốq píq tamáu, toâq táq dống sang tỡ bữn sâng sưong parnúh, tanốc, tỡ la crơng canŏ́h táq toâq tac.

8 Ngoah mut chu tran pưn§6:8 Santoiq ‘tran pưn’ nâi tâng parnai Hê-brơ pai ‘tran mpứng dĩ’. to cớp dống sang chu angia coah pưn; chơ bữn ngcál ntruang chỗn chu tran bar cớp tran pái. 9 Toâq puo Sa-lamôn táq dống sang moâm chơ, án ĩt aluang sê-da táq chỗih cớp táq ariang sarưng. 10 Máh clống noau aloap cỡt pái tran, dũ tran sarỡih sỡng coat,*6:10 Tỡ la bar mễt cớp bar sen-ti-mễt. to tễ dống sang toâq tanoâp aluang sê-da, ma amóh cớp ratâng dống sang.

11 Yiang Sursĩ atỡng puo Sa-lamôn neq: 12 “Tễ ranáq mới ễ táq dống sang nâi, khân mới táq puai máh phễp rit cớp santoiq cứq patâp, cứq táq ariang cứq khoiq ữq cớp Davĩt mpoaq mới. 13 Cứq ễ ỡt cớp cũai I-sarel, la cũai proai cứq, tâng dống sang mới ntôm táq sanua, cớp cứq tỡ bữn táh tỗp alới.”

14 Ngkíq puo Sa-lamôn táq moâm Dống Sang Toâr.

15 Ratâng yáng clống Dống Sang Toâr tễ pưn toau toâq sarưng noau apooq toâq aluang sê-da; tâng tapang noau sữn aluang sango. 16 Tâng clống dống sang ỡt yoah pỡng bữn Ntốq Yiang Sursĩ Ỡt; cuti bar chít coat,†6:16 Tỡ la cuti sám takêh mễt. sangkít tễ pưn toau toâq pỡng toâq pian aluang sê-da. 17 Ntốq Tễng Rit yáng moat Ntốq Yiang Sursĩ Ỡt la cuti pỗn chít coat.‡6:17 Tỡ la cuti sám muoi chít tacual mễt. 18 Tâng pian aluang sê-da noau khũar pachĩr cỡt rup aluoi cớp piar aluang. Tâng máh ratâng coah clống noau apooq nheq toâq aluang sê-da dŏq tỡ yỗn hữm tamáu.

19 Coah clĩ Ntốq Tễng Rit bữn Ntốq Yiang Sursĩ Ỡt; tâng ntốq ki noau dŏq Hĩp Parnai Parkhán. 20 Clống ki cuti bar chít coat, la‑a bar chít coat, sarỡih bar chít coat,§6:20 Tỡ la cuti sám takêh mễt, la‑a sám takêh mễt, sarỡih sám takêh mễt. cớp blom nheq toâq yễng. Cớp án blom dếh prông sang táq toâq aluang sê-da hỡ.*6:20 Rana 20 nâi tỡ bữn raloaih tang parnai Hê-brơ. 21 Tâng Ntốq Tễng Rit noau blom toâq yễng, cớp bữn sái-sô yễng yoang catáng rana mut chu Ntốq Yiang Sursĩ Ỡt; clống nâi noau blom nheq toâq yễng. 22 Chũop Ntốq Tễng Rit noau blom toâq yễng nheq, dếh prông sang tâng clống ki hỡ.

23 Án táq bar lám rup chê-rup toâq aluang o‑li‑vê, cớp dŏq tâng Ntốq Yiang Sursĩ Ỡt. Bar lám chê-rup sarỡih muoi chít coat.†6:23 Tỡ la sarỡih sám pỗn mễt tadĩ. 24-26 Bar lám chê-rup nâi la machớng nheq. Muoi lám bữn bar lám khlap, dũ khlap cuti sỡng coat. Khân paliang khlap mán bữn muoi chít coat.‡6:24-26 Tỡ la bar mễt cớp bar sen-ti-mễt, cớp pỗn mễt tadĩ. 27 Chơ án achúh bar lám chê-rup tâng Ntốq Yiang Sursĩ Ỡt dŏq muoi coah khlap parchốq parnơi bân mpứng dĩ clống, ma muoi coah ễn tớt cớp ratâng. 28 Bar lám chê-rup nâi án blom toâq yễng.

29 Ratâng tâng bar clống tâng Dống Sang Toâr noau khũar pachĩr táq rup chê-rup, nỡm tarễc, cớp piar aluang. 30 Santưn bar clống ki án blom toâq yễng.

31 Bar lám cantáih toong táq toâq aluang o‑li‑vê dŏq catáih Ntốq Yiang Sursĩ Ỡt; khuon ngoah toong ki bữn sỡng canũt. 32 Ngoah toong nâi pasang toâq rup chê-rup, rup nỡm tarễc, cớp rup piar aluang ca cũai chiang khoiq khũar pachĩr. Ngoah toong, rup chê-rup, cớp rup nỡm tarễc án blom toâq yễng. 33 Khuon ngoah toong mut chu clống toâr cỡt pỗn canũt, cớp táq toâq aluang o‑li‑vê. 34 Bữn bar lám cantáih ngoah toong péh táq toâq aluang sango, 35 cớp khũar pachĩr rup chê-rup, nỡm tarễc, cớp piar aluang ca cũai chiang khoiq blom toâq yễng machớng nheq.

36 Án táq nchŏh lavíng viang Dống Sang Toâr, patoi cốc tamáu pái rana, cớp padol chóq aluang sê-da táq caning.

37 Puo Sa-lamôn tabŏ́q táq Dống Sang Toâr tâng casâi bar raclũoq cớp casâi Siu tâng cumo pỗn án cỡt puo. 38 Án táq moâm Dống Sang Toâr ariang án khoiq aloŏh ngê tâng casâi tacual raclũoq cớp casâi Bul, la cumo muoi chít la muoi án cỡt puo. Puo Sa-lamôn táq Dống Sang Toâr nheq tapul cumo nŏ́q moâm.