Choâiq Thỡ Muoi Phau-lô Chĩc
Yỗn Cũai Tâng Vil
Tê-salô-naca
Santoiq Atỡng
Phau-lô chĩc choâiq thỡ nâi cơiq sa‑óh tỗp sa‑âm tâng vil Tê-salô-naca, cruang Ma-sadôn. Án chĩc sám 51 cumo noap tễ tangái Yê-su canỡt. Phau-lô cỡt samoât cũai trứh cuplốq yỗn bữn máh cũai sa‑âm Yiang Sursĩ tâng ntốq án trứh. Ma máh cũai I-sarel kêt án cớp yớu án, cớp alới tuih aloŏh alới tễ vil. Ntun ki, Phau-lô ớn Ti-muthê chu sa‑óh loah tỗp sa‑âm tâng vil Tê-salô-naca. Bo án ỡt tâng vil Côr-ntô, Phau-lô sâng han tễ tỗp sa‑âm táq ranáq Yiang Sursĩ tâng vil Tê-salô-naca.
Tâng choâiq thỡ nâi Phau-lô anhoac catoaih tỗp sa‑âm. Án sa‑ỡn Yiang Sursĩ cỗ nhơ tỗp sa‑âm tâng vil Tê-salô-naca bữn ŏ́c sa‑âm cớp ŏ́c saryóq yớu. Án ta‑ỡi máh santoiq alới blớh án tễ ranáq Yê-su sễng loah trỗ bar. Khân bữn cũai sa‑âm ca cuchĩt nhũang tangái Yê-su sễng loah trỗ bar, cũai ki bữn tamoong mantái tỡ? Noâng maléq dũn nŏ́q Yê-su toâq loah? Cớp Phau-lô atỡng tỗp sa‑âm cóq cutóng táq ranáq Yiang Sursĩ bo noâng ỡt acoan Yê-su toâq loah.
1
1 Cứq la Phau-lô chĩc choâiq thỡ nâi cơiq sa‑óh tỗp sa‑âm ỡt tâng vil Tê-salô-naca. Cớp alới bar náq Si-la cớp Ti-muthê cơiq parnai sa‑óh anhia tê. Anhia bữn muoi mứt cớp Yiang Sursĩ, Mpoaq hái, cớp Yê-su Crĩt, Ncháu hái. Cứq sễq Yiang Sursĩ chuai miat anhia cớp yỗn anhia ỡt bán sũan ien khễ níc.
Phau-lô Sa‑ỡn Bữn Cũai Sa‑âm Tâng Vil Tê-salô-naca
2 Bo hếq câu, hếq sa‑ỡn Yiang Sursĩ cỗ tễ nheq tữh anhia, cớp hếq tỡ bữn khlĩr câu yỗn anhia. 3 Hếq sanhữ níc yáng moat Yiang Sursĩ, Mpoaq hái, anhia táq ranáq puai ngê sa‑âm Yiang Sursĩ. Hếq sanhữ anhia ayooq yớu sa‑ữi lứq; ngkíq anhia táq cutóng lứq chuai yớu. Cớp hếq sanhữ anhia yống pacái lứq ŏ́c anhia ngcuang la Yê-su Crĩt, Ncháu hái, toâq loah pỡ cutễq nâi. 4 Sễm ai ơi! Hếq dáng chơ Yiang Sursĩ ayooq lứq anhia, cớp án khoiq rưoh anhia yỗn ỡt muoi mứt cớp án. 5 Toâq hếq dững parnai o tễ Yiang Sursĩ toâq pỡ anhia, parnai ki cỡt blễng hỡn tễ parnai cũai dốq táq ntỡng, yuaq Raviei Yiang Sursĩ yỗn anhia dáng samoât samơi parnai ki la pĩeiq lứq. Anhia khoiq hữm chơ máh ranáq hếq táq bo hếq ỡt cớp anhia, cỗ hếq sâng ayooq anhia. 6 Ngkíq anhia khoiq tũoiq hếq machớng anhia tũoiq Ncháu hái tê. Tam anhia ramóh sa‑ữi ramứh túh coat, ma noâng anhia bữn mứt bũi roap parnai hếq atỡng, yuaq Raviei Yiang Sursĩ toâp yỗn anhia bữn ŏ́c ki. 7 Anhia táq ngkíq, anhia la samoât riang ngôl yỗn dũ náq cũai sa‑âm tâng cruang Ma-sadôn cớp cruang Achai. 8 Lứq parnai o tễ Ncháu trŏ́h la‑ữt la‑ữi tễ anhia, tỡ bữn tâng cruang Ma-sadôn cớp cruang Achai sâng, ma lứq parnai noau atỡng tễ anhia sa‑âm Yiang Sursĩ, parnai ki khoiq pláh dũ ntốq chơ. Ngkíq hếq tỡ bữn túh atỡng noâng alới ki tễ anhia, 9 yuaq dũ náq alới khoiq dáng chơ cớp atỡng loah hếq tễ anhia. Alới pai anhia khoiq tabỡp tabéh hếq o lứq bo hếq toâq pỡ anhia. Alới pai anhia khoiq táh nheq crơng sang yiang sâuq, chơ píh chu Yiang Sursĩ. Alới pai sanua anhia táq ranáq Yiang Sursĩ ễn, án ca Yiang pĩeiq lứq cớp Yiang tamoong mantái níc. 10 Cớp anhia ngcuang Con Yiang Sursĩ sễng loah tễ paloŏng. Con án la Yê-su, án ca Yiang Sursĩ khoiq yỗn tamoong loah tễ cuchĩt, Án chuai amoong hái yỗn vớt tễ ŏ́c túh coat toâq Yiang Sursĩ táq cũai nỡ‑ra.