1 Puo Sa-lamôn mbỡiq táq Dống Sang Toâr tâng vil Yaru-salem, pỡ ntốq Yiang Sursĩ sapáh yỗn puo Davĩt tâng cóh Mô-ria, la ntốq púh saro khong Arau-na tễ tỗp Yê-but. 2 Puo Sa-lamôn tabŏ́q táq tâng casâi bar, cumo pỗn án cỡt puo. 3 Dống Sang Toâr ca puo Sa-lamôn táq, cuti tapoât chít coat, la‑a bar chít coat.*3:3 Tỡ la cuti sám bar chít tapul mễt, cớp la‑a sám takêh mễt. 4 Ntrỡn ca choâng cớp ngoah toong mut dống sang, piang pa bar chít coat, sarỡih muoi culám bar chít coat.†3:4 Tỡ la piang pa sám takêh mễt, sarỡih muoi chít tapoât mễt. Ntrỡn ki Sa-lamôn blom toâq yễng muoi chít. 5 Clống toâr án apooq toâq pian aluang sango, cớp blom toâq yễng o lứq, dếh táq rup nỡm tarễc cớp rup sái-sô. 6 Án pasang Dống Sang Toâr yỗn cỡt nêuq o toâq tamáu moat lứq, cớp toâq yễng tễ cruang Par-vêm. 7 Án ĩt yễng blom prang, santŏ́ng toong, ratâng, cớp cantáih toong Dống Sang Toâr. Tâng ratâng máh cũai chiang khũar táq rup chê-rup. 8 Ma clống tâng Dống Sang Toâr ca noau dŏq Ntốq Yiang Sursĩ Ỡt bữn la‑a li cớp Dống Sang Toâr, piang pa la bar chít coat machớng tê.‡3:8 Tỡ la sám takêh mễt. Án ĩt yễng ntâng hỡn tễ bar chít la muoi tân dŏq blom ratâng Ntốq Yiang Sursĩ Ỡt. 9 Án ĩt yễng sám tadĩ ki-lô dŏq táq máh dếng; cớp ratâng yoah tran pỡng la blom toâq yễng tê.

10 Puo Sa-lamôn ớn máh cũai chiang ĩt tac, táq bar lám rup chê-rup, blom toâq yễng, chơ dŏq bân Ntốq Yiang Sursĩ Ỡt, 11-13 ma yỗn choâng-rachoâng, bar lám rup ki to moat chu ngoah toong. Bar lám chê-rup ki, muoi lám bữn bar lám khlap cuti sỡng coat.§3:11-13 Tỡ la sám bar mễt tadĩ. Bar lám rup ki paliang khlap muoi coah yỗn parchốq parnơi; ma khlap muoi coah ễn tớt cớp ratâng. Bar lám chê-rup paliang khlap pato parnơi la‑a bar chít coat.*3:11-13 Tỡ la sám takêh mễt. 14 Án ĩt aroâiq busín cớp aroâiq canŏ́h yớm santứm satong, ễng, cớp cusâu, dếh chún rup máh chê-rup chóq tâng ki, chơ sangcứt Ntốq Yiang Sursĩ Ỡt.

15 Puo Sa-lamôn táq bar ntreh tanũl sapoan, muoi ntreh cuti pái chít la sỡng coat,†3:15 Tỡ la sám muoi chít tapoât mễt. chơ dŏq coah moat Dống Sang Toâr. Dũ ntreh tanũl noau táq plỡ chóq tâng pứp tanũl sarỡih sỡng coat.‡3:15 Tỡ la sám bar mễt tadĩ. 16 Tâng pỡng tanũl noau pasang toâq sái-sô cớp toâq palâi ỗiq-tâi sapoan muoi culám ŏ́c.§3:16 Rana 16 nâi tâng parnai Hê-brơ tỡ bữn raloaih. 17 Án ayứng máh tanũl ki yáng moat ngoah toong mut Dống Sang Toâr. Tanũl muoi ỡt coah angia pưn án amứh Yakin.*3:17 Tâng parnai Hê-brơ santoiq ‘yakin’ parlong loah la ‘Yiang Sursĩ chóh dŏq’. Tanũl bar ỡt coah angia pỡng án amứh Bô-at.†3:17 Tâng parnai Hê-brơ santoiq ‘bô-at’ parlong loah la ‘Nhơ tễ rêng Yiang Sursĩ’.