Saráq Ê-sakiel
Santoiq Atỡng
Saráq nâi Ê-sakiel, la cũai tang bỗq Yiang Sursĩ, chĩc sám 580 cumo nhũang dỡi Yê-su. Bo ki án ỡt parnơi cớp cũai I-sarel ca noau cỗp dững chu cruang Ba-bulôn. Bo noau cỗp Ê-sakiel, vil Yaru-salem noâng tỡ yũah ralốh. Ê-sakiel chĩc máh saráq nâi yỗn cũai I-sarel ca ỡt tâng cruang Ba-bulôn, cớp yỗn cũai noâng ỡt tâng vil Yaru-salem.
Ê-sakiel sa‑âm Yiang Sursĩ nheq rangứh rahỡ, cớp Yiang Sursĩ sapáh án yỗn hữm sa‑ữi ranáq salễh, dŏq án atỡng loah cũai proai tễ máh ŏ́c án khoiq hữm. Ê-sakiel catoaih atỡng máh cũai cóq ralêq cỡt mứt pahỡm tamái ễn, cớp chỗi sang noâng yiang canŏ́h. Án atỡng tễ vil Yaru-salem cỡt rúng ralốh, chơ cỡt tamái loah. Án atỡng tễ máh cruang ỡt mpễr ki cóq roap tôt.
Ê-sakiel atỡng tễ táq Dống Sang Toâr tamái, cớp tễ chớc ang‑ữr Yiang Sursĩ ỡt tâng dống sang ki. Án atỡng tễ máh ranáq tampễq cutễq yỗn muoi chít la bar tỗp cũai I-sarel, dếh máh cũai tễ cruang canŏ́h hỡ.
1
Yiang Sursĩ Sapáh Chóq Ê-sakiel Trỗ Muoi
1-3 Cứq la Ê-sakiel con samiang Busi. Tâng tangái sỡng, casâi pỗn, bo cứq sĩap bữn pái chít cumo, tangái cứq bữn sâng sưong Yiang Sursĩ pai chóq cứq, cớp chớc án cỡt sốt tâng mứt pahỡm cứq. Cứq la cũai tễng rit sang Yiang Sursĩ ỡt parnơi cớp tỗp I-sarel noau khoiq cỗp dững chu cruang Ba-bulôn. Bo cứq ỡt cheq crỗng Khê-bar, cứq hữm paloŏng cỡt ariang noau pớh, cớp cứq hữm Yiang Sursĩ sapáh baih. Noau cỗp puo Yê-hôi-akin cớp dững án pỡ cruang Ba-bulôn khoiq dũn sỡng cumo chơ.
4 Bo cứq tapoang achỗn, cứq hữm cuyal rapuq phát tễ angia pỡng. Bữn lalieiq lacang pỡq chu tâng mpứng dĩ cốc ramứl toâr lứq; paloŏng blữ ariang ũih, cớp mpứng dĩ ramứl báiq samoât sapoan. 5 Tâng mpứng dĩ cuyal rapuq ki, cứq hữm mil-mul samoât riang pỗn lám charán salễh lứq.*1:5 Charán salễh ki noau dŏq ramứh ‘chê-rup’ hỡ. Roâp charán ki ariang roâp cũai, 6 ma dũ lám charán ki bữn pỗn lám mieiq cớp pỗn lám khlap. 7 Máh charán ki bữn ayững tanoang, ma talang ayững án cỡt samoât canchop ntroŏq tôl con báiq samoât sapoan. 8 Dũ lám charán ki bữn mieiq cớp khlap; cớp pưn máh khlap án bữn atĩ ariang atĩ cũai. 9 Dũ lám charán ki paliang khlap bar coah atớt cớp charán canŏ́h, cớp miar to mieiq chu pỗn angia. Toâq charán ki pỡq, án pỡq cỡt tỗp, tỡ bữn veh chu léq cớp pỡq tanoang sâng.
10 Dũ lám charán ki bữn pỗn lám mieiq; mieiq ki la mpha nheq. Coah moat cỡt ariang roâp cũai; coah atoam cỡt ariang roâp cula samín; coah avêr cỡt ariang roâp ntroŏq tangcáh; cớp coah clĩ cỡt ariang roâp calang crức. 11 Bar lám khlap paliang atớt cớp khlap charán canŏ́h, ma bar lám khlap ễn acrúq tỗ. 12 Dũ lám charán to moat chu pỗn angia. Yuaq ngkíq, charán ki têq pỡq cỡt tỗp chu ntốq án yoc ễ pỡq, cớp tỡ bữn túh luliaq chu léq noâng.
13 Tâng mpứng dĩ máh charán ki bữn samoât aroam blữ viel tứng-tooc níc. Toâq ũih blữ satũol achỗn, bo ki bữn lalieiq lacang. 14 Máh charán ki sadáih pỡq chu chái lứq samoât lalieiq.
15 Bo cứq ỡt nhêng máh charán ki, cứq hữm carvang yững kĩen ỡt kễng dũ coah charán ki tớt tâng cutễq. 16 Pỗn lám carvang ki la machớng nheq, dũ lám báiq samoât tamáu moat, cớp bữn muoi lám carvang ễn trĩap tâng clống dũ lám carvang ki; 17 táq ngkíq máh carvang ki têq pỡq chu pỗn angia. 18 Máh yững carvang ki toâr cớp salễh lứq, cớp bữn moat chũop yững ki. 19 Toâq máh charán ki pỡq, máh carvang ki parláu tê; cớp khân máh charán ki chỗn tễ cloong cutễq, carvang ki la chỗn tê. 20 Toâq máh charán ki ễ pỡq chu ntốq léq, carvang yững ki la parláu pỡq chu ntốq ki tê, yuaq máh charán ki cỡt sốt máh carvang ki. 21 Toâq máh charán ki pỡq, tỡ la tangứt, tỡ la chỗn, carvang ki táq machớng ki tê.
22 Pỡng plỡ máh charán ki cỡt samoât paloŏng cutrúq báiq bublưoq, o ễ ngcŏh. 23 Pưn paloŏng cutrúq ki máh charán ki ỡt tayứng paliang bar lám khlap atớt cớp khlap charán canŏ́h, cớp bar lám khlap ễn acrúq tỗ. 24 Toâq máh charán ki pâr, cứq sâng sưong án pâr hỗ ariang dỡq mưt canoâq, ariang sưong poâl tahan, cớp ariang sưong Yiang Sursĩ Sốt Toâr Lứq. Tữ máh charán ki tangứt pâr, khlap án carop amut acrúq tỗ, 25 ma cứq sâng sưong tễ paloŏng ca cutrúq pỡng plỡ máh charán ki.
26 Tâng pỡng paloŏng cutrúq ki bữn muoi lám cachơng, ĩn cachơng puo dốq tacu noau táq toâq tamáu moat ramứh sapĩr. Tâng cachơng ki bữn manoaq tacu; roâp án ariang cũai. 27 Roâp án báiq bublưoq samoât sapoan noau tooc, ang‑ữr tễ án claq poang chũop cu ntốq, 28 ma tâng ntốq ki bữn prêng cáng. Chớc ang‑ữr nâi apáh yỗn dáng samoât la Yiang Sursĩ lứq ỡt tâng ntốq ki. Toâq cứq hữm ranáq ki, cứq dớm muoi tatứp. Chơ cứq sâng muoi sưong atỡng cứq.