Choâiq Thỡ Cơiq Yỗn Cũai
Hê-brơ
Santoiq Atỡng
Saráq nâi cũai chĩc cơiq sa‑óh máh cũai Hê-brơ (cũai I-sarel). Tỡ bữn noau dáng ramứh cũai ca chĩc saráq nâi, ma án chĩc sám 64 toâq 68 cumo ntun Yê-su canỡt. Bo ki noau táq túh coat lứq máh cũai sa‑âm, toau bữn cũai tỡ ễq sa‑âm noâng. Saráq nâi aliam alới yỗn sa‑âm pacái lứq ễn, cớp atỡng Yê-su toâp la Con Yiang Sursĩ.
Noau chĩc tễ pái ŏ́c toâr tễ Yê-su Crĩt la neq: Muoi, Yê-su la Con Yiang Sursĩ ca tamoong mantái. Án trĩh Mpoaq án, cớp án chĩuq tanhĩr dũ ramứh túh arức. Án bữn chớc toâr hỡn tễ máh cũai tang bỗq Yiang Sursĩ, tễ máh ranễng Yiang Sursĩ, cớp tễ Môi-se hỡ. Bar, Yê-su toâp la cũai tễng rit sang mantái níc, cớp bữn chớc toâr hỡn tễ máh cũai tễng rit sang canŏ́h. Pái, ống Yê-su toâp têq chuai amoong nheq tữh cũai sa‑âm yỗn têq vớt tễ ŏ́c lôih cớp ŏ́c cuchĩt. Yê-su yỗn ŏ́c tamoong mantái.
Tâng pún muoi chít la muoi noau atỡng tễ máh cũai sa‑âm Yiang Sursĩ samoât samơi. Cớp noau pai neq hỡ: Tỡ bữn noau têq táq yỗn bũi pahỡm Yiang Sursĩ, khân tỡ bữn sa‑âm.
1
Yiang Sursĩ Atỡng Nhơ Con Án
Tễ mbŏ́q Yiang Sursĩ atỡng achúc achiac hái sa‑ữi trỗ cớp sa‑ữi ramứh nhơ cũai tang bỗq án. Ma tâng dỡi parsốt nâi, án atỡng hái nhơ Con án toâp. Yiang Sursĩ yỗn Con án ndỡm nheq tữh ramứh, cớp nhơ tễ án Yiang Sursĩ tễng dũ ramứh tâng paloŏng cớp cutễq. Ang‑ữr tễ Con la machớng ang‑ữr tễ Yiang Sursĩ tê. Án machớng tháng Yiang Sursĩ, cớp dũ ramứh ca cỡt tâng cutễq nâi, la cỗ nhơ tễ parnai Con Yiang Sursĩ. Moâm án táq yỗn bráh mứt pahỡm cũai na án pupứt máh lôih alới, chơ án chỗn loah chu paloŏng cớp tacu coah atoam Yiang Sursĩ, la Puo tâng paloŏng.
Con Yiang Sursĩ Toâr Hỡn Tễ Ranễng Yiang Sursĩ
Con Yiang Sursĩ la toâr hỡn tễ ranễng Yiang Sursĩ tễ paloŏng, machớng ramứh noau dŏq án la o hỡn tễ ramứh noau dŏq ranễng ki. Tỡ bữn ranễng aléq ma Yiang Sursĩ ngin pai neq:
“Mới la Con cứq.
Tangái nâi cứq lứq cỡt Mpoaq mới.”
Cớp Yiang Sursĩ tỡ bữn pai tễ ranễng aléq neq:
“Cứq la Mpoaq án. Án la Con cứq.” 1:5 Ũat Khễn 2:7
Ma bo Yiang Sursĩ ễ yỗn Con clúng án toâq pỡ cutễq nâi, án pai neq:
“Nheq tữh ranễng Yiang Sursĩ cóq sang toam Con ki.”
Cớp Yiang Sursĩ pai tễ ranễng án neq:
“Án yỗn ranễng án tễ paloŏng cỡt samoât cuyal,
cớp án yỗn alới ca táq ranáq án cỡt samoât pla ũih.” 1:7 Ũat Khễn 104:4
Ma Yiang Sursĩ pai chóq Con án neq:
“Yiang Sursĩ ơi, sốt dỡi lơi cumo, la sốt níc pỡ mới!
Mới táq sốt tanoang o lứq.
Mới ayooq máh ramứh tanoang o.
Ma mới kêt máh ramứh sâuq.
Yuaq ngkíq, Yiang Sursĩ la Yiang mới,
án rưoh mới cớp yỗn mới bữn ŏ́c bốn
hỡn nheq tễ máh yớu mới.” 1:9 Ũat Khễn 6-7
10 Cớp Yiang Sursĩ pai ễn neq:
“Ncháu ơi! Tễ dâu lứq mới tễng cốc cutễq nâi,
cớp paloŏng la atĩ mới tễng.
11 Paloŏng cutễq nỡ‑ra cỡt pứt,
ma mới tỡ nai cỡt pứt.
Paloŏng cutễq cỡt ralốh samoât tampâc anhỗh.
12 Chơ mới pĩen paloŏng cutễq
samoât noau saráu au anhỗh.
Mŏ mới tỡ nai rapĩen,
cớp anhúq mới la noâng níc.” 1:12 Ũat Khễn 102:25-27
13 Yiang Sursĩ tỡ nai atỡng ranễng aléq tâng paloŏng neq:
“Mới tacu coah atoam cứq
toau toâq tangái léq cứq yỗn alới ca yoc ễ cachĩt mới,
ỡt pưn talang ayững mới, cỡt sũl mới.” 1:13 Ũat Khễn 110:1
14 Khân ngkíq, máh ranễng Yiang Sursĩ tễ paloŏng la ntrớu? Ranễng ki la samoât yiang ca táq ranáq yỗn Yiang Sursĩ; chơ án ớn ranễng ki pỡq rachuai máh cũai ca roap ŏ́c chuai amoong.

1:5 1:5 Ũat Khễn 2:7

1:7 1:7 Ũat Khễn 104:4

1:9 1:9 Ũat Khễn 6-7

1:12 1:12 Ũat Khễn 102:25-27

1:13 1:13 Ũat Khễn 110:1