Saráq Ũat Khễn Yiang Sursĩ
Santoiq Atỡng
Saráq Ũat Khễn nâi bữn sa‑ữi náq cũai chĩc, cớp tâng sa‑ữi cumo tê. Tâng saráq nâi bữn cansái ũat khễn cớp santoiq câu sễq. Máh cũai chĩc saráq nâi bữn neq: Davĩt chĩc 73 pún; Asap chĩc 12 pún; máh con samiang Cô-ra chĩc 12 pún; Sa-lamôn chĩc 2 pún; Môi-se chĩc muoi pún; cớp E-than chĩc muoi pún.
Máh cũai I-sarel dốq ũat máh cansái ũat khễn cớp máh santoiq câu sễq tâng saráq nâi bo alới sang toam Yiang Sursĩ. Ngkíq, tâng tâm saráq nâi bữn neq:
• Cansái ũat dŏq câu sễq Yiang Sursĩ bán curiaq.
• Cansái ũat dŏq câu sễq Yiang Sursĩ chuai yỗn têq vớt tễ máh ŏ́c túh coat.
• Cansái ũat dŏq ngin kho máh ŏ́c lôih.
• Cansái ũat dŏq sa‑ỡn Yiang Sursĩ khoiq chuai alới tễ mbŏ́q.
• Cansái ũat dŏq sa‑ỡn Yiang Sursĩ yỗn máh ramứh o án khoiq tễng.
• Cansái ũat rasễq yỗn Yiang Sursĩ pupứt máh cũai par‑ũal.
Máh santoiq câu tâng saráq nâi alới ĩt tâc níc. Alới ũat bo alới chỗn pỡ Dống Sang Toâr, tỡ la bo alới sang toam Yiang Sursĩ. Saráq nâi cỡt mun ca bữn kia lứq yỗn cruang alới. Saráq Ũat Khễn nâi máh cũai ĩt tâc níc yỗn toau toâq dỡi Yê-su, cớp dỡi sanua tê. Saráq nâi cỡt cansái Yê-su dŏq hái ũat khễn Yiang Sursĩ tái-mantái.
Pún Muoi
1
Cũai Tanoang O Cớp Cũai Loâi
1 Bốn lứq cũai ca tỡ bữn puai parnai cũai loâi,
tỡ la táq puai ariang cũai lôih dốq táq,
tỡ la tũoiq alới ca dốq ayê ra‑ac Yiang Sursĩ.
2 Ma cũai ki sâng bũi hỡr lứq cớp phễp rit Yiang Sursĩ.
Cớp án ỡt chanchớm tễ phễp rit ki nheq sadâu tangái.
3 Cũai ki la ariang aluang noau chóh cheq dỡq tũm;
toâq catữ án cỡt palâi cớp sala án la tỡ nai roŏh.
Dũ ranáq án táq la cỡt kia nheq.
4 Ma máh cũai loâi tỡ bữn cỡt ngkíq;
ma alới cỡt samoât alức cuyal phát sapâr dững chu ntốq canŏ́h.
5 Toâq tangái Yiang Sursĩ rablớh máh cũai,
tangái ki Yiang Sursĩ pác aloŏh cũai loâi tễ cũai tanoang o.
6 Lứq samoât, Yiang Sursĩ bán kĩaq cũai tanoang o,
ma máh cũai loâi, nỡ‑ra Yiang Sursĩ pupứt alới.