11
Ntốq Yỗn Cũai Tanoang O Poâng*11:0 Cansái ũat tễ Davĩt. Yỗn án ca sốt tỗp ũat.
1 Yiang Sursĩ la ntốq cứq poâng.
Yuaq nŏ́q máh cũai yoc ễ pai cứq neq: “Lúh chái, chỗn chu cóh samoât riang chớm pâr.”
2 Yuaq cũai loâi ĩt tamĩang yoc ễ pán chóq cũai tanoang o tễ ntốq canám.
3 Khân cũai loâi ma pupứt nheq rit cruang,
ki ntrớu cũai tanoang o têq táq?
4 Yiang Sursĩ ỡt tâng ntốq án sốt tâng paloŏng.
Cớp án bữn chớc toâr lứq tâng pỡng cớp tâng pưn.
Moat Yiang Sursĩ tapoang asễng nhêng salĩq níc chu cutễq nâi.
Án dáng dũ ranáq máh cũai táq.
5 Yiang Sursĩ chim cũai tanoang o cớp cũai tỡ bữn tanoang o.
Ma án kêt lứq cũai loâi cớp cũai dốq táq yớu.
6 Yiang Sursĩ ễ yỗn ũih cớp mữ sễng tễ paloŏng pĩeiq tâng máh tỗ cũai loâi.
Án sambrĩaq alới na ũih hang cớp na cuyal cutâu par‑át lứq.
7 Yuaq Yiang Sursĩ la tanoang o, cớp án táq ranáq o níc,
ngkíq nỡ‑ra cũai tanoang o bữn ỡt choâng moat án.