87
Santoiq Khễn Vil Si-ôn*87:0 Cansái ũat tễ tỗp con samiang Cô-ra. Vil Yaru-salem noau dŏq Vil Si-ôn hỡ.
1 Yiang Sursĩ khoiq ayứng vil án tâng cóh Si-ôn la cóh miar khong án.
2 Yiang Sursĩ ayooq vil Si-ôn clữi nheq tễ ntốq canŏ́h tâng cruang I-sarel.
3 Yiang Sursĩ atỡng ramứh o tễ anhia ca ỡt tâng vil án neq:
4 “Toâq cứq chĩc dŏq máh ramứh cũai trĩh cứq,
lứq cứq chĩc dếh ramứh cũai tâng máh cruang Ê-yip-tô,†87:4 Tâng parnai Hê-brơ noau chĩc ‘cruang Rahap’ ma ramứh ‘Rahap’ sacâm tễ cruang Ê-yip-tô. Ba-bulôn, Phi-li-tin, Ti-rơ, cớp Ê-thia-bi.
Cứq noap máh cũai ki samoât riang alới canỡt tâng vil Si-ôn tê.”
5 Cớp bữn noau pai tễ vil Si-ôn neq: “Cũai tễ dũ cruang la samoât alới canỡt tâng vil ki tê.
Cớp Yiang Sursĩ Sốt Toâr Lứq bán kĩaq alới tâng vil ki.”
6 Toâq Yiang Sursĩ chĩc dŏq ramứh dũ náq cũai,
ki án chĩc neq: “Dếh máh cũai nâi la khoiq canỡt tâng vil Si-ôn tê.”
7 Ngkíq alới ũat cớp puan sarai, dếh pai neq:
“Tâng vil Si-ôn nâi, hếq bữn ŏ́c bốn puan.”