110
Yiang Sursĩ Cớp Puo Án Khoiq Rưoh*110:0 Cansái ũat tễ Davĩt.
1 Yiang Sursĩ khoiq atỡng chóq Puo cứq, la Ncháu cứq, neq:
“Mới tacu coah atoam cứq toau toâq tangái léq
cứq chiau alới ca yoc ễ cachĩt mới ỡt pưn talang ayững mới.”
2 Puo ơi! Lứq Yiang Sursĩ chiau chớc toâr lứq pỡ anhia,
yỗn anhia cỡt sốt tâng vil Si-ôn cớp vil ca yơng hỡn tễ ki hỡ.
Lứq anhia ndỡm nheq tữh alới ca ễ táq anhia.
3 Tâng tangái anhia rachíl alới ễ táq anhia,
máh proai anhia sâng bũi pahỡm lứq ễ puai anhia.
Bo ki anhia sớp tampâc ariang puo,
cớp anhia bữn rêng tamái ễn cu rangái
samoât dỡq latac tâng tarưp tễ cláih.†110:3 Rana 3 nâi tỡ bữn raloaih tâng parnai Hê-brơ.
4 Yiang Sursĩ khoiq thễ dũan, cớp án tỡ nai ralêq.
Án pai neq: “Mới la cũai tễng rit sang Yiang Sursĩ sốt dũ dỡi,
puai chớc Manchi-sadéc.”‡110:4 Manchi-sadéc la manoaq cũai ca A-praham ramóh bo dỡi mbŏ́q. Nhêng tâng Saráq Tễ Dâu 14:18-20.
5 Puo ơi! Yiang Sursĩ lứq ỡt coah atoam anhia dŏq chuai anhia.
Ngkíq, án chíl riap nheq máh puo tâng tangái án sâng cutâu mứt chóq alới.
6 Cớp nỡ‑ra án rablớh dũ cruang cũai,
cớp táq yỗn cruang ki poân moang sac cũai cuchĩt,
bo án pupứt máh puo tâng cốc cutễq nâi.
7 Ma puo nâi nguaiq dỡq hoi kễng rana bân án pỡq.
Ngkíq án bữn riap, cỗ nhơ tễ chớc toâr lứq án khoiq roap.