125
Cũai Ca Sa‑âm Samoât Samơi Bữn Plot Ien
1 Cũai aléq ma sa‑âm Yiang Sursĩ nheq tễ mứt pahỡm,
cũai ki cỡt samoât riang cóh Si-ôn;
tỡ bữn ntrớu noau têq táq yỗn án cacưt tỡ la rasĩc.
2 Samoât cóh ỡt lavíng mpễr vil Yaru-salem,
lứq máh ki tê Yiang Sursĩ ỡt lavíng mpễr proai án,
tễ dỡi nâi toau toâq chumát tái-mantái.
3 Cũai loâi tỡ têq cỡt sốt níc tâm cutễq cũai tanoang o.
Khân alới sốt níc, cŏh lơ cũai tanoang o ễn ễ puai ariang ngê sâuq alới tê.
4 Ơ Yiang Sursĩ ơi! Sễq anhia táq o chóq cũai táq ranáq o,
la cũai ca trĩh parnai anhia.
5 Ma toâq anhia culáh cóng cũai sâuq,
ki sễq anhia culáh cóng yỗn cũai ca calỡih táh ngê anhia hỡ.
Sễq yỗn tỗp I-sarel bữn ỡt ien khễ níc!