Akayëta and Andoɗakel aŋ
Lilaya in
Ar ỹëgwëk akayëta aŋo an Ŝaŋ këno w̃acënd. Ɓend kë h̃atëgu ecan ecan gër ngwën ɓeŋ ỹëgw ko ang w̃asindëra baŋo Axwën Yesu ak. Eni kemënaxën gër ekwëta ỹëgwënaxën baɓi okëreceŋ ok gayik asoro bani sorond në end Yesu Kërisët. Amëd aŋo, anëỹali banëɓi nëỹalind ɓela ɓën eno calend Emun end Ɓërom eŋ, ɓari abani w̃a na eni di mondako. Akayëta aŋo kë sëƴalind mëne Kaxanu afenin fenin këɓi ɓacosa ɓakëɓënaxik ɓër kë xemënalind ekwëta ed xwëta këno ɓën, do gë ɓër kënëɓi law̃ëra në end andiyen andexëm ɓën. Er ex gër akayëta in:
Ecëma ed ɓamara ɓanjongëɓaki el: 1.1-8.
End owun or Kaxanu do gë or Axwën Yesu eŋ: 4.1–5.14.
End ɓeñigënaxik ɓenjongemat do gë ɓulunda iw̃ënëk eŋ: 6.1–7.17.
End eñigënaxik enjongekinëm do gë okereloŋ ocongiɓat eŋ: 8.1–9.21.
End ikayëta ind meleka do gë otede oki eŋ: 10.1–11.19.
End Sindan do gë ɓulunda ir Kaxanu eŋ: 12.1-18.
End ɓandixa ɓand ɓemacar eŋ: 13.1-18.
End oyëkan or ɓëw̃ënëk do gë kiti ind kë ƴowënd eŋ: 14.1-20.
End ɓeñigënaxik do gë ɓetëm eŋ: 15.1–16.21.
End kiti ind ɓër këŋo w̃erelind Kaxanu eŋ: 17.1–19.21.
End owun or ɓëniy wëli eŋ: 20.1-6.
End kiti ind ŝaɓucara do gë ind ɓëŝësëk eŋ: 20.7-15.
End ngwën ingaŝax do gë omakaw ond Yesu eŋ: 21.1–22.21.
1
Lilaya in
1 Gër akayëta aŋo ex ɓendeƴ ɓend nangën këŋo Yesu Kërisët në oɗakeli Ŝaŋ, ariyenin arexëm ɓeŋ, and law̃ënëgu këŋo meleka irexëm gër ndexëm aŋ. Kaxanu nangën baŋo ɓeŋo eɓi tëfëtanaxën ɓëriyenin ɓërexëm ɓën eni nangaxën mëne gogo kë h̃atëgu. 2 Ata Ŝaŋ ex ar reƴak osede olo an, gë ɗek ɓend wat baxo ɓeŋo, do Yesu Kërisët rek mëne eyeƴan ed ɗal ed Kaxanu dëŋ ex. 3 Nëngandëraleɓi, ar kë fënënd an, gë ɓër kë ɓaxëtënd, do kë sëfënd eyeƴan ed xaniwëk gër Kaxanu ɓën gayikwa gogo kë h̃ata.
End ɓamara ɓanjongëɓaki eŋ
4 Wëno Ŝaŋ këŋun ỹëgwënëlind wën ɓërëw̃ak ɓër ex gër ɓamara ɓanjongëɓaki ɓand gër ebar ed Asi ɓën. Ar hik, hi bax do ko ƴelind an, yëlëleŋun oyekax ol do gë oɓetak ol. Ɓangoc ɓanjongëɓaki ɓand ex gër lëngw ir añëpara and owun orexëm ɓaŋ, 5 do gë Yesu Kërisët, mëŋ ar ex sede ir mokwëta an, aỹanar ar xanik gër ecës an, do emun end ɓemun ɓend gër ebar ro eŋ, yëlëlenun oyekax ol do gë oɓetak ol!
Yesu Kërisët, mëŋ ar h̃an këɓo, racët këɓo gër ɓeñëŋënax ɓendeɓi gë oŝat orexëm an, 6 do ar ɓar këɓo hi këne gër owun orexëm an, ar ri këɓo ɓëŝaɗaxan ɓër Sëm irexëm Kaxanu an, xwënëk din ir din enjaran eŋ do gë panga iŋ! Amen!
7 Nëkoyino ga ko fedawënd gë ɓaŋar ɓaŋ:
Ala ar ex yo awat këŋo wat,
ado ɓër xwëŝ baŋo ɓën dëŋ awat këno wat
do ɗek ɓenëng ɓend ex gër ebar ro ɓeŋ,
arenita këni ỹana eni denitand në endexëm.
Iyo, amen!
8 Ata Axwën Kaxanu re ko: «Wëno ex aỹanar an, wëno ex afelatar an. Wëno ex ar hik, hi bax do kë ƴelind an; wëno ex ar xorëk ɓeỹ ɗek an.»
End ecanaya ed Axwën Yesu eŋ
9 Wëno Ŝaŋ, aɓaỹe irewën hi këme, ga ɓar këne gër toro, gër owun do gër ekemënali ed end Yesu Kërisët. Gër oŝir or këni w̃acënd Patëmos hi bame gayik afemëra këme femërand eyeƴan ed Kaxanu eŋ, do ga këme reƴarand osede or Yesu eŋ. 10 Ata fedaw ko Angoc Amënëk aŋ gër ndam, yatir oganjar. Wël këme oniw̃ ang ofarix or kereloŋ fo gand epoƴ edam 11 ga kë re: «Er këƴ watënd in, ñëgwël në akayëta do eƴ ɗaw̃ëneli gër ɓamara ɓanjongëɓaki ɓaŋo: Efes, gë Sëmirën, gë Perëgam, gë Catir, gë Sarëd, gë Filadelëfi do gë Lawodise.»
12 Ata ga ŝena këme mowat ar baxe yeƴanelind mondako an, wat këme oɗambo od kaŋe. 13 Do mërëxand ir oɗambo oko, wat këmo ar ang asëñiw̃ ar ala. Er ŝuɗa baxo ocuɗ od gëŝëc do xapa baxo apëxw and kaŋe gër emëkw. 14 Omban ond gër gaf irexëm oŋ feŝëk ang gwëtene fo, ang okëɓina fo, do ɓangës ɓaŋ kë ỹegënd ang eñan fo. 15 Osapar orexëm oŋ kë watind ang ƴawale ir fëtëk në angoɗux fo, do oniw̃ ol kë rëmënd ang oỹëm fo. 16 Ala ajo, lëkaya ko gër ataxan and liw̃ ow̃al ocongoxi, gër etëỹ edexëm ŝanëguk duxuma ir fëco ah̃ak fëco ah̃ak, do dëxas in kë ỹegënd ang eñan gë ɗek panga indexëm ak. 17 Ata ga këmo nëkon, wëc këme këruɗ gër osapar orexëm. Ata h̃ëmba ke gë ataxan and liw̃ aŋ do re ko: «Këreƴ yëdara na! Wëno ex aỹanar an, wëno ex afelatar an, 18 wëno ex aɓëngw an. Aŝës ŝës bame ɓarikan gërëgako aɓëngw eme din ir din. Wëno lëkayak ɓacoketaya ɓand ecës, do gë ɓand wur ir ɓëŝësëk ɓaŋ. 19 Awa ñëgwël ɗe er wat këƴ in, gë er ex in do gë er kë ɓëtëgu in. 20 End ow̃al ocongoxi or wat keƴ gër ataxan and liw̃ andam eŋ do gë end oɗambo ocongoki od kaŋe eŋ cëŋ, nëkoɗ er w̃acayak in: ow̃al ocongoxi oŋ exëni ɓëlaw̃ënel ɓër hik gër ɓamara ɓanjongëɓaki ɓën do oɗambo ocongoki ok ex ɓamara ɓanjongëɓaki ɓaŋo.»