1 Isaŋ
An'ɔ Isaŋ ɔyɔnɛ-ɛ, t'ake tɔ pəmar pakaraŋɛnɛ areka ŋɔn-ɛ?
Areka ŋɔcɔkɔ-cɔkɔ ŋa Isaŋ ŋɔ ŋaŋɛ nŋɛ anacic meren wəco camət-maas kɔ kəcamət (85) kəbəp ka meren wəco camət-maŋkəlɛ kɔ kəcamət (95) ntɛ kəkom ka Krist kənacepər mɔ. Isaŋ ɛnamentərnɛ fɛ kəyɔnɛ ka wəcicəs ka areka ŋaŋɛ, mba sapitər səcɔkɔ-cɔkɔ səmentər a fɔr yɔn kiriŋ yɔ kəyi ka Yesu doru kɔ kəfɔtɛ kɔn afi dacɔ kɔ mes mamɔkɔ mɛnacepər (1.1-3). Tecicəs ta areka ŋa Isaŋ tɔlɔtərɛnɛ kəwurɛnɛ kɔ tecicəs ntɛ ambəp dəKawandi ka Isaŋ mɔ. Ancɛm-cɛmnɛ a Isaŋ ɛnacicəs Kawandi kɔn kɔ reka nyɛ maas dare da Efesi, nde ɛnandɛ mɔ: Areka ŋa Isaŋ ŋɔcɔkɔ-cɔkɔ, ŋa mɛrəŋ, kɔ ŋa maas.
Isaŋ ɛnacicɛ alaŋ fəp tɛm ntɛ kəloŋkanɛ ka alaŋ kənayi dəpəcuca pa afum alɔma aŋɛ ancwe «acərɛ» mɔ. Afum akakɔ ŋanccɛm-cɛmnɛ a Yesu Kanu yati ɛnayɔnɛ, bafɔ fum ɛnayi nwɛ ɔyɔnɛ dis kɔ mecir pəyi antɔf kəroŋ mɔ. It'ɔsɔŋɛ Isaŋ kəcicəs kəsɔŋɛ kəcərɛ a fɔr yɔn kiriŋ mes ma kəyi doru ka Yesu kənacepər haŋ nkɔnsərka pəcgbuŋɛnɛ Yesu waca wɔn yati (1.1-3). Isaŋ ɛnacic areka ŋaŋɛ ntɛ tɔŋsɔŋɛ pəlas pəbotu pɔn mɔ (1 Isaŋ 1.4), pəsɔŋɛ alaŋ kətɔciya (1 Isaŋ 2.1), pəbum alaŋ mɛtəksɛ ma yem (1 Isaŋ 2.26), pəyeŋkəs alaŋ bəkəc kəsɔŋɛ ŋa kəcərɛ a ayac ŋa (5.13).
Tokotərɛnɛ ta moloku ma areka
1. Isaŋ ementər areka ŋɔn, k'oloku tes ntɛ tɔsɔŋɛ k'ancic ŋi mɔ (1.1-4).
2. Isaŋ ɛnasɔksər afum ntɛ Kanu kəyɔnɛ pəwaŋkəra mɔ, pəmar pacepərɛnɛ doru kəyi dəpəwaŋkəra pəmɔ tɔkɔ Yesu ɛnacepərɛnɛ di mɔ (1.5-3.10).
3. Ntɛ tɛncəmɛ ti darəŋ mɔ, Isaŋ ɛnacɛm-cɛməs tosom ntɛ tɔyɔnɛ ta kəbɔtərɛnɛ mɔ (3.11-5.12).
4. Moloku mɛlpəs (5.13-21).
1
Toloku ta kiyi wəyeŋ
1 Tɔkɔ tɛnayi kəyɛfɛ dəkəcop, ntɛ sənane, ntɛ sənanəŋkɛ fɔr yosu, ntɛ sənagbɛkərɛ kɔ waca wosu woŋgbuŋsərɛnɛ ti mɔ, ti tɔyɔnɛ toloku ta kiyi wəyeŋ. 2 Awa kiyi wəyeŋ kəmentərnɛ, kɔ sənəŋk ki, səndəŋk sede sa ki, səloku nu kiyi wəyeŋ ka doru o doru, nkɛ kənayi Kas kəsək akɔ kəmentərnɛ su mɔ. 3 Səndəŋkər nəna ntɛ sənanəŋk kɔ səne mɔ, ntɛ tɔŋsɔŋɛ nəna sɔ nətəŋnɛ kɔ səna, patəŋnɛ fəp fosu kɔ Kas kɔ wan kɔn Yesu Krist mɔ. 4 Tatɔkɔ, səna, səncic ti, ntɛ tɔŋsɔŋɛ pəbotu posu pɛlarɛ mɔ.
Kanu pəwaŋkəra pɔ
5 Tosom ntɛ sənanenɛ Krist mɔ, tɔ səndəŋkər nu, ti tɔyɔnɛ Kanu pəwaŋkəra pɔ, kubump nkɛ o nkɛ kəyi fɛ kɔ.
6 Kɔ səloku a səntəŋnɛ kɔ nkɔn mba səckɔt dəkubump-ɛ, kəyemɛ kɔ səndɛ, səyi fɛ kəcyɔ ntɛ kance kəloku mɔ.
7 Mba kɔ səndekɔt pəwaŋkəra disrɛ, pəmɔ tɔkɔ nkɔnsərka eyi pəwaŋkəra mɔ-ɛ, səyi kətəŋnɛ disrɛ kɔ akɔ ŋayi dəpəwaŋkəra mɔ, mecir ma Yesu wan kɔn mendesɔkəs su pəciya fəp.
8 Kɔ səloku a səyɔ fɛ kiciya-ɛ, kətiŋkərnɛ kɔ səndɛ, kance kəyi fɛ su.
9 Kɔ səwosɛ kəcɛŋ kiciya kosu-ɛ, Kanu kəŋyɔ tɔkɔ kənaloku mɔ, kəlomp, kəndeŋaŋnɛnɛ su kiciya kosu, kəsɔkəs su pətɔlomp fəp. 10 Kɔ səloku a sənciya fɛ-ɛ, səsɔŋɛ pəyi pəmɔ Kanu wəyemɛ ɔfɔ, toloku tɔn teyi fɛ su.