1 Ntɛ antəŋnɛ oŋ a səbɛkɛ debil kəkɔ ka atɔf ŋa Itali mɔ, k’asɔŋ Pol kɔ afum alɔma akɔ ŋanayi dəbili mɔ wəsɔdar wəpɔŋ wəlɔma nwɛ aŋc-we Yuliyus mɔ. Wəbum ka wəbɛ wəka Rom ɛnayɔnɛ, k’asom kɔ kəkɛkəs ŋa. 2 Kɔ səmbɛkɛ dəbil kəyɛfɛ ka dare da Adaramit kəkɔ ka cəgbɛp ca Asi kɔ səŋkɔ səpɛ. Aristarko wəMasedon wəka dare da Tɛsaloni ɛnayi su dacɔ.

3 Dɔckɔsɔk kɔ səmbɛrɛ Sidɔŋ. Yuliyus nwɛ ɔŋc-yɔ Pol mes mɔtɔt mɔ, owosɛ kɔ kəkɔ ndena anapa ɔn kəkɔ-tɛnər ŋa kəmar kəlɔma. 4 Ntɛ səyɛfɛ dəndo mɔ, kɔ səsumpər kəca ka Sipər bawo səŋc-gbofnɛ afef. 5 Ntɛ səŋcali kəba nkɛ mɛŋc moŋsut tɔf ya Silisi kɔ Paŋfili mɔ, kɔ səŋkɔ sətor dare da Mira, atɔf ŋa Lisi. 6 Dəndo kɔ wəbɛ wəsɔdar ɔsɔtɔ dəndo abil nŋɛ ŋanakɔ-yɛfɛ dare da Alɛksandər kəkɔ ka Itali mɔ, k’ɛmbɛk su ŋi disrɛ. 7 Mataka mɛlarəm disrɛ səc-kɔt mɛtɛn dəkəba. Pəcuca disrɛ pɔ sənadebəp Sinidi, mba ntɛ afef ŋɛnatɔ-wosɛ su kəkɔ pəbɔlɛ mɔ, kɔ səsumpər agbɛp ŋa atɔf ŋa Krɛt, kɔ səŋcepər Salmɔn. 8 Kɔ səŋgbofnɛ dobo dadɔkɔ pəcuca disrɛ, kɔ səŋkɔ səbəp kəfo kaŋkɔ aŋwe «Cətənta Cətɔt,» ta pəmbɔlɛnɛ di kɔ dare da Laseya.

9 Ntɛ tɛm tɛlarəm teŋc-cepər, akɔ kəkɔtɛnɛ abil kəŋc-yɔ kəyɔ dəm wɛy-wɛy mɔ, kɔ mata ma kəsuŋ meŋcepər-ɛ. Kɔ Pol eŋgbiŋər ŋa: 10 «Anapa, inəŋk fɔ kəkɔt kosu kaŋkɛ kəyɔ wɛy-wɛy. Abil kɔ yɛcaməs yɔkɔ yeyi ŋi disrɛ mɔ yendelɛcɛ, səna aŋɛ səyi ŋi disrɛ mɔ yati sətɔrɔ.» 11 Mba wəbɛ wəsɔdar pəlaŋ wəgbɛk abil kɔ wəka ŋi, ta ewe moloku ma Pol daka-ɛ. 12 Ntɛ tendeŋərnɛ ti mɔ, kətənta kənatesɛ fɛ kəcəpərɛnɛ dɛrəŋ. Kɔ ayi a abil ŋaŋɔkɔ disrɛ alarəm ŋaloku kəyɛfɛ ka di ŋabɛlər Fenik, kətənta ka Krɛt nkɛ kəŋkəŋkənɛ afef ŋɛdɛrəŋ mɔ.

13 Kɔ afef ŋepic ŋɛyɛfɛ kəwur kəca-kətɔt, kɔ ŋaŋcɛm-cɛmnɛ a ŋantam kəyɔ tɛfaŋ taŋan. Kɔ ŋayekti abɛla ŋaŋan kɔ ŋasolnɛ dobo da Krɛt, ŋagbɛpɛnɛ di. 14 Pəwon fɛ kɔ afef ŋɔpɔn ŋɔkɔ aŋc-we «Ɛrakilɔŋ» mɔ ŋowur kəyɛfɛ ka mɔrɔ ma dare. 15 Kɔ afef ŋaŋɔkɔ ŋɛyɛfɛ kəcɛrŋɛnɛ abil ta antam sɔ kəcəmɛ afef ŋaŋɔkɔ kiriŋ-ɛ, kɔ səsaknɛ kɔ ŋeŋkekərɛ su nde ŋɛnafaŋ mɔ. 16 Səyi kəcepər mokuru mɛfɛt mɔlɔma tantɔf, mmɛ aŋc-we Koda mɔ, kɔ səntam pəcuca disrɛ kəcəmbərəs abil. 17 Ntɛ səliŋərnɛ ŋi mɔ, kɔ aŋɛ ŋayi kəbəc abil disrɛ mɔ ŋaŋkotɛ ŋi bənda yɔkɔ yɛnayɔnɛ yɛmɛŋkərnɛ mɔ, ŋac-nesɛ kəkɔ-loŋɛ agbɛp ŋa atɔf ŋa Siriti, bawo kɛrɛrɛ ka asəŋc kəyi di. Kɔ ŋaŋgbal aŋka, mba afef ŋosolɛ ŋa. 18 Ntɛ afef ŋɛnanaŋkanɛ kəyikəc su mɔ, dɔckɔsɔk kɔ ŋaŋgbaləs yɛcaməs yɔlɔma dəkəba. 19 Tataka ta maas, kɔ abəc a debil ŋasumpər gbalaŋi ba abil dəwaca waŋan kɔ ŋaŋgbal yi dəkəba. 20 Mataka mɛlarəm disrɛ dec kɔ cɔs yoŋc-wur fɛ, afef ŋɛc-bɛk oŋ kəbɛk dəm, tɛləpəs kɔ səwurɛ mera kəyi sɔ doru.

21 Ŋanadi fɛ yeri kəyɛfɛ ntɛ pənawon mɔ. Itɔ kɔ Pol ɛyɛfɛ k’ɛŋcəmɛ ŋa dacɔ, k’oloku: «Anapa, pəc-yɔnɛ fɔ nəcəŋkəl im ta nəyɛfɛ Krɛt nəyekti abɛla-ɛ, nədenabumnɛ pəcuy pampɛ pɔsɔtɔ su, kɔ ca nyɛ yɔsɔlər su mɔ. 22 Mba ndɛkəl oŋ, intola a aŋcəpəs nu bəkəc, bawo ali fum ɔfɔfi nu dacɔ, mɛnɛ abil ŋendelɛcɛ. 23 Itɔ nnɔ pibi mɛlɛkɛ mɔlɔma ma Kanu nkɛ iyɔnɛ wəkɔn kɔ nkɛ iŋkor-koru mɔ, mowurərn’ em. 24 Kɔ molok’ im: ‹Ta mənesɛ, Pol! Mɛnɛ məcəmɛ fɔr ya wəbɛ ka tɔf ya Rom fəp kiriŋ, tetam tɔ Kanu kəsakɛ akaŋɛ nəyi abil ŋaŋɛ disrɛ mɔ fəp kəyi doru.› 25 Nəcəpəsnɛ bəkəc arkun, bawo ilaŋ tɔkɔ Kanu kəlokun’ em mɔ tendeyi. 26 Mba mɛnɛ pakɔ-loŋɛ mokuru mɔlɔma.»

27 Pibi pa wəco kɔ maŋkəlɛ p’ anakɔ pafɛcərɛnɛ su kəba ka Adiriya. Pibi dacɔ kɔ akɔtɛnɛ abil ŋaŋcərɛ a alɔtərnɛ antɔf ŋowosu. 28 Kɔ ŋantorɛ paka pelel pakotər pi kəbənda, kɔ ŋanəŋk fɔ putukum pɛmbəp mɛtər wəco maas kɔ camət-tin. Kɔ ŋaŋcɔŋnɛ kiriŋ kɔ ŋawak sɔ, kɔ ŋanəŋk fɔ pətukum pɛmbəp mɛtər wəco mɛrəŋ kɔ camət-mɛrəŋ. 29 Ntɛ ŋanesɛnɛ abil kəcaŋərɛnɛ masar mɔ, itɔ ŋanagbalɛ aŋka maŋkəlɛ tadarəŋ, kɔ ŋandɛ ŋac-kar pəwaŋkəra, mba pəc-won ŋa. 30 Mba ntɛ abəc a debil ŋanafaŋ kəyɛksər abil mɔ, kɔ ŋantorɛ agbaŋkɛ, ŋac-loku a ŋakɔ ŋagbal aŋka tekiriŋ ta abil. 31 Kɔ Pol oloku wəbɛ wəsɔdar kɔ asɔdar, «Kɔ afum akaŋɛ ŋantɔyi debil-ɛ, nəfɔtam kəyi doru.» 32 Kɔ asɔdar ŋaŋcopu bənda ya agbaŋkɛ, kɔ ŋasak ŋi kɔ ŋɛntɛmpɛnɛ.

33 Ŋayi kəkar dec kəsɔk, kɔ Pol ewenɛ fəp fosu kəkɔ-di yeri, k’oloku: «Mɔkɔ tataka ta wəco kɔ maŋkəlɛ ntɛ nəyi kəkar, ta nəndi yeri mɔ. 34 Intola nu oŋ kədi yeri, bawo pəmar nədi yi ntɛ tɔŋsɔŋɛ nəyacnɛ mɔ. Ali wəkin nu dacɔ, kəfon kɔn da dəromp kəfɔ-sɔlər kɔ!» 35 Ntɛ Pol elip kəloku tatɔkɔ mɔ, k’ɛlɛk kəcom k’eyek-yekəs Kanu fɔr ya afum fəp kiriŋ, k’entepi ki, k’ɛyɛfɛ ki kəsɔm. 36 Kɔ fəp fəŋcəp bəkəc kɔ ŋayɛfɛ kəsɔm cəcom. 37 Sənayi afum masar mɛrəŋ wəco camət-mɛrəŋ kɔ camət-tin (276) akɔ ŋanayi abil ŋaŋɔkɔ disrɛ mɔ. 38 Ntɛ fəp fənɛmbərɛ mɔ, kɔ ŋaŋgbal malɔ mɛləpəs dəkəba ntɛ tɔŋsɔŋɛ abil ŋɛbɛrɛnɛ kəfoy mɔ.

39 Ntɛ dec dɔsɔk mɔ, abəc a debil ŋananɛpəl fɛ antɔf, mba ŋananəŋk kɛrɛrɛ, kɔ ŋaŋcɛm-cɛmnɛ kəcɔŋəs abil haŋ ŋabəp ki. 40 Kɔ ŋasikəli aŋka kɔ yontor dəkəba, kɔ ŋasikəlɛnɛ sɔ bənda ya yas nyɛ aŋc-gbɛkɛ abil mɔ. Kɔ ŋayekti abɛla abil dəkəro, kɔ afef ŋɛlɛk ŋa, kɔ ŋɔŋcɔŋəs abil kəca ka dəkɛrɛrɛ. 41 Mba kɔ ŋaŋkɔ ŋapət kɛrɛrɛ acir mɛrəŋ dacɔ, kɔ kəro ka abil kəmətnɛ dɛsəŋc, ŋɛntam fɛ sɔ kəcɔŋnɛ kiriŋ. Kɔ yam yɔpɔŋ yender yosut abil ŋaŋan kɔ ŋɛləsər ŋi tadarəŋ.

42 Kɔ asɔdar ŋaŋcɛm-cɛmnɛ kədif ka kɛlmani-e, ta wəlɔma pəŋɛrəŋ pəyɛksər ŋa. 43 Mba wəbɛ wəsɔdar nwɛ ɛnacɛm-cɛmnɛ kəmar Pol ta efi dəkəba mɔ, ɛyaməsər asɔdar kəyɔ ka tɛfaŋ taŋan, k’oloku akɔ ŋanacərɛ kəŋɛrəŋ mɔ ŋanuŋkɛnɛ kətor dəkəba ŋaŋɛrəŋ ntɛ tɔŋsɔŋɛ ŋapɛ kare mɔ. 44 Afum aləpəs akɔ ŋandelɛk cəbam kɔ cəpom ca abil ŋaŋɛrəŋ ŋabəp ŋa dəndo kare. Kɔ afum fəp ŋampɛ kare, ali wəkin tes tɛnasɔtɔ fɛ.