Tawureta Musa, Buk 2:
Kəwur ka aka Yisrayel Misira Ŋayi Yɛŋən
Moloku ma kəsɔkəs buk ba Musa ba mɛrəŋ: Kəwur
Dəbuk bɔcɔkɔ-cɔkɔ ba tawureta Musa bɔ taruku ta aka Yisrayel poncop, mbɛ aŋwe: «Dəkəcop da Doru.» Sora səlpəs səkɔ səmentər tɔkɔ aka Yisrayel ŋanayi atɔf ŋa Misira tɛm ta Aŋnabi Isifu mɔ.
Ntɛ Isifu kɔ awɛnc aŋa ŋafi mɔ, kɔ kəbɔt kəncop kəpicɛ aka Yisrayel kɔ aka Misira dacɔ. Dəkələpsər da ti, kɔ aka Yisrayel ŋayɔnɛ acar a aka Misira. Kɔ abɛ a Misira ŋancəmbər aka Yisrayel yɛbəc yocuca, ti disrɛ kɔ aka Yisrayel ŋalɔnɛ aka Misira sədare səŋan.
Mba MARIKI nwɛ ɔntɔpələrnɛ afum ɔn mɔ, osom Aŋnabi Musa nde atɔf ŋa Misira ntɛ tɔŋsɔŋɛ aka Yisrayel ŋasɔtɔ kəyi yɛŋən mɔ. Kɔ Kanu kəmentərɛ mes mɛwɛy-wɛy wəco dəwaca wa Musa haŋ kɔ firawona ɛmbɛləs aka Yisrayel. Ntɛ aka Yisrayel ŋancop kəkɔt mɔ, kɔ ŋaŋkɔ ŋabəp kəba ka Cəŋkɔlma nkɛ kəyɔnɛ kələncər ka Misira nkɛ kənafaŋ kəyamsər ŋa kəcepər mɔ. Firawona kɔ asɔdar ɔn ŋasɛp kədifət ŋa dəndo, mba kɔ Kanu kəmentər sɔ dəndo tes tɛwɛy-wɛy, k'eŋgbiti dɔpɔ kəba dacɔ ndɛ aka Yisrayel ŋanacali. Arkun, aran, awut kɔ yɔcɔl yaŋaŋ fəp ŋanacali dəkəba dɔpɔ dowosu kəroŋ. Ntɛ aka Misira ŋanacəmɛ ŋa darəŋ mɔ, kɔ Kanu kəŋgbəpər ŋa domun da dəkəba.
Kəba mokuru, kɔ aka Yisrayel ŋancop kəkɔt dətɛgbərɛ kəkɔ ka atɔf ŋa Kanaŋ nŋɛ Kanu kənasɔŋ temer kəsɔŋ ŋa mɔ. Ŋasɔrɔyi dɔpɔ, kɔ Kanu kəsɔŋ Aŋnabi Musa mosom mɔn wəco nde tɔrɔ ta Sinayi kəroŋ fɔr ya afum kiriŋ. Mba tɛnawon fɛ, kɔ afum ŋaŋgbɛkəl sariyɛ sa Kanu, kɔ ŋasalɛnɛ tɛrəŋka. Ti tɔ Kanu kənasɔŋɛnɛ aka Yisrayel kəkɔt dətɛgbərɛ meren wəco maŋkəlɛ disrɛ, ntɛ tɔŋsɔŋɛ aŋɛ ŋanagbɛkəl Kanu mɔ fəp ŋalip kəfis-fis a ŋacbɛrɛ atɔf ŋa Kanaŋ.
Kəkɔt kaŋkɔ disrɛ, kɔ Kanu kəyi ŋa kiriŋ kəsolɛ ŋa. Nɔrɔ da debeki dɔn dɛnayi ŋa kiriŋ pibi kɔ daŋ. Ntɛ ŋanayɛfɛ kəkɔ mɔ, kɔ ŋantorɛ aŋgbancan. Nɔrɔ da debeki da Kanu dɛnayi aka Yisrayel kiriŋ haŋ kɔ ŋambɛrɛ nde ŋanacəmbərəs mɔ. Towurɛnɛ ta tatɔkɔ tɛnayi meren wəco maŋkəlɛ disrɛ fəp.
Teta defi da Aŋnabi Musa tɔ buk bambɛ boloku tɛlpəs. Ta pəmbɔlɛ kɔ sɔ kəfi-ɛ, k'ɛlɛk aka Yisrayel k'ɔsɔŋ Aŋnabi Yosuwe nwɛ ɛnabɛrsɛnɛ ŋa atɔf ŋa Kanaŋ mɔ.
Kəyi ka Kanu afum ɔn dacɔ, pətəksɛ ŋa dolompu, pəbumɛ ŋa sɔkət, tatɔkɔ fəp towurɛnɛ tɔ tɔyɔnɛ afum a Kanu tɛm tosu tantɛ ayi mɔ. Kanu kəfaŋ kəcəmbər su dɔpɔ dɔtɔt kəkɔ ka ariyana nde ɔŋkɔbɛrsɛnɛ su mɔ. Kanu kəmar su marənt mamɔkɔ disrɛ. AMINA!
Teyer ta buk bambɛ
1, Asɔkəs tɔkɔ anacəmbər aka Yisrayel dacar atɔf ŋa Misira mɔ.
2-4, Asɔkəs tecepərɛnɛ ta Musa haŋ tɛm ntɛ ɛnade pəbaŋ aYisrayel aka Misira dəwaca mɔ.
5-15.21, Aloku tɔkɔ Kanu kənayɔ mes mɛwɛy-wɛy kɔ arom nŋɛ kənasɔŋ aMisira ntɛ tɔŋsɔŋɛ kəbaŋər asɔdar a firawona afum ɔn mɔ.
15.22-19, Aloku tɔkɔ ŋanayɛfɛ Misira kɔ ŋaŋkɔ ŋandɛ toro ta Sinayi mɔ.
20-31, Aloku tɔkɔ Kanu kənasɔŋ Aŋnabi Musa Sariyɛ nsɛ sənasɔkəs mosom ntɛ pəmar aka Yisrayel ŋade ŋayi kɔ tɔkɔ pəmar ŋade ŋacleləs nkɔn Kanu mɔ.
32, Aloku tɔkɔ aka Yisrayel ŋanayeŋkər Kanu səbomp ntɛ ŋanacɔŋəs Aruna kəsɛlɛ kɛma tɛrəŋka pa tura mɔ.
33-40, Alɔm tɔkɔ Musa ɛnanəŋk nɔrɔ da debeki da Kanu mɔ. Kɔ tɛyɛfɛ day, Kɔ Musa ɛntəksɛ aka Yisrayel Sariyɛ sa Kanu kɔ tɔkɔ pəmar palompəs dəkiyi da Kanu, kaŋkəra ka Sede, kɔ yogbuŋsərɛnɛ yɔlɔma teta kəbəcɛ Kanu dəndo aŋgbancan yosoku, kɔ yamos taciŋa ya aloŋnɛ.
Kəwur ka aka Yisrayel Misira
1
Kanu kəwurɛnɛ aka Yisrayel Misira
1-15
Aka Yisrayel kəyi kəŋan dacar Misira
1 Mewe ma awut a Yakuba* CəHebəre = «Awut a Yisrayel,» Kanu kənasɔŋ Yakuba tewe ta «Yisrayel.» Məmɔmən Dəkəcop 32.29. mɔ mmɛ, aŋɛ ŋanader Misira kɔ nkɔn Yakuba mɔ. Fəp faŋan ŋanakɛrɛnɛ aka wɔlɔ waŋan disrɛ fəp: 2 Ruben, Simeyɔŋ, Lewy, kɔ Yuda, 3 Isakar, Sabulon, kɔ Beŋyamin, 4 Dan, Naftali, Kadu kɔ Asɛr. 5 Yuruya ya Yakuba fəp ŋanayi afum wəco camət-mɛrəŋ (70). Tɛnatəŋnɛ Isifu nkɔn pəyi tɛm tatɔkɔ Misira. 6 Kɔ Isifu ende pəfi kɔ awɛnc aŋa, kɔ danapa dadɔkɔ fəp. 7 Kɔ aka Yisrayel ŋande ŋasɔtɔ dokombəra, kɔ ŋala, kɔ kənay kəŋan kəsɔtɔ sɔkət kəcepərər. K'atɔf ŋa Misira ŋɛlarɛ ŋa.
8 Ntɛ tɛm tɔlɔma tencepər mɔ, kɔ fum wəlɔma nwɛ ɛnatɔcərɛ Isifu mɔ, ende pəyɔnɛ wəbɛ Misira. 9 Kɔ wəbɛ nwɛ ende pəloku afum ɔn: «Nənəŋk, afum aka Yisrayel ŋala, kɔ ŋayɔ sɔkət ŋatas su. 10 Mɛnɛ patɛn kəcərɛ kəkɔt, ntɛ andeyamsər ŋa dokombəra daŋan mɔ. Kɔ pəyɔnɛ fɛ ti-ɛ, kɔ kəwan kəyɛfɛ-ɛ, ŋantam kəmar aterɛnɛ asu kəsutɛnɛ, kɔ telip-ɛ, ŋamulpər su ŋawur atɔf ŋaŋɛ.» 11 Awa, kɔ aka Misira ŋancəmbər akiriŋ aŋɛ ŋanakɔsɔŋəs aka Yisrayel yɛbəc ya dacar mɔ. Ti disrɛ, kɔ aka Yisrayel ŋancəmbər sədare sa Pitɔm kɔ Ramsɛs, pəyɔnɛ di dəkəmɛŋk da firawona†Firawona = Bafɔ tewe ta fum tɔ, mba tewe ta nwɛ o nwɛ ɔntɔmpər dɛbɛ da Misira mɔ.. 12 Mba pɔkɔt pa firawona pɛnakɔt fɛ few, bawo tatɔkɔ anctɔrəs aka Yisrayel mɔ, ti tɔ ŋanckom, ŋacla, ŋacwɔkələs dəkəndɛ daŋan, kɔ tɔsɔŋɛ pater aka Yisrayel pəpɔŋ. 13 Kɔ aka Misira ŋancəmbər aka Yisrayel yɛbəc ya dacar yeyeŋki. 14 K'aka Misira ŋandoktəsɛ aka Yisrayel doru yɛbəc yeyeŋki: Yɛbəc ya dos, ya birik, ya dalɛ fəp. Yɛbəc ya dacar yayɔkɔ yɔ ŋanacəmbər aka Yisrayel.
Firawona ɔntɔrəs aka Yisrayel
15 Kɔ wəbɛ wəka Misira ende pəloku aran abaŋ awut aHebəre, pacwe wəkin «Sifra,» kɔ wəka mɛrəŋ «Puwa.» 16 Kɔ wəbɛ wəka Misira oloku ŋa: «Kɔ nənde kəcbaŋ aran aHebəre awut-ɛ, nəcmɔmən ŋa kiriŋ. Nwɛ ɔŋyɔnɛ wərkun mɔ, nədif kɔ, nwɛ ɔŋyɔnɛ wəran mɔ, nəsak wəkakɔ pəyi doru.» 17 Mba kɔ aran abaŋ awut aŋɛ ŋanesɛ Kanu, ŋayɔ fɛ ntɛ wəbɛ ka Misira ɛnaloku ŋa mɔ, kɔ ŋance awut arkun kɔ ŋayi doru. 18 Kɔ wəbɛ wəka Misira ewe aran abaŋ awut aŋɛ, k'eyif ŋa: «Ta ake tɔ nəyɔnɛ tantɛ-ɛ? Ta ake tɔ nəncenɛ awut aŋan arkun ŋacyinɛ doru-ɛ?» 19 Kɔ abaŋ awut aŋɛ ŋaloku firawona: «Ntɛ tɔsɔŋɛ ti mɔ, aran aHebəre ŋayi fɛ pəmɔ aran aka Misira. Aran aHebəre ŋayeŋk mɛnc dəŋkom, ŋaŋlip kəkom a səna abaŋ awut səcbəp di.»
20 Kɔ Kanu kəyɔnɛ abaŋ awut aŋɛ pətɔt, k'aka Yisrayel ŋala, kɔ ŋasɔtɔ sɔ sɔkət kɔ ŋancepərər. 21 Abaŋ awut aŋɛ ŋananesɛ Kanu, itɔ Kanu kənasɔŋɛ ŋa dokombəra. 22 Kɔ firawona ende pəsom afum ɔn fəp: «Nəsumpər awut arkun aHebəre fəp, aŋɛ ande packom mɔ, nəcgbal ŋa nde kəŋgbɔkɔ ka Nil, mba nəcsak gbəcərəm awut aran ŋayi doru.»