8
Domun kəwosər
Kɔ Kanu kəŋcɛm-cɛmnɛ Nuha, sɛm ya dop kɔ yɔcɔl ya dare, nyɛ yɛnayi kɔ Nuha abil disrɛ mɔ. Kɔ Kanu kəwurɛ afef doru, kɔ domun doŋcop kətor. Kəba ka dəntɔf kɔ dareŋc cəmɛpɛnɛ, kɔ wəcafən ɛsak kətuf. Kɔ domun dembelɛ antɔf kəroŋ tepic-tepic. Mata 150 disrɛ, kɔ domun dɛŋcɛsɛ dəntɔf. Tataka ta wəco kɔ camət-mɛrəŋ (17), ŋof ŋa camət-mɛrəŋ, k'abil ŋɛndɛ tɔrɔ tin ta Ararat kəroŋ. Kɔ domun dɛŋcɛsɛ haŋ ŋof ŋa wəco. Tataka tɔcɔkɔ-cɔkɔ ta ŋof ŋaŋɔkɔ, kɔ mɔrɔ meŋeci moŋcop kəwurɛ səbomp.
Tataka ta 40, kɔ Nuha eŋgbiti wundɛr nwɛ ɛnabɛr abil mɔ. K'ɛsak abɛmp ŋa ser * «abɛmp ŋa Mənar,» kɔ pəyɔnɛ fɛ ti-ɛ «kəwan ka aser.» ŋin kɔ ŋɔŋkɔ. Pəwon fɛ kɔ ŋoluksərnɛ, pənamar Nuha pəkar domun delip kəwosər dəntɔf. Kɔ Nuha ɛsak sɔ antantoriya kəkɔ-mɔmən kɔ pəyɔnɛ fɔ domun d'ontor-ɛ. Mba ŋɛnasɔtɔ fɛ kəfo nkɛ ŋɛntam kəndɛ mɔ, bawo domun dɛnasɔrɛbaŋ antɔf fəp, kɔ ŋoluksərnɛ nde debil. Kɔ Nuha ɛntɛŋc kəca k'osumpər ŋi, k'ɛmbɛrsɛ debil. 10 K'ɛŋkar sɔ mata camət-mɛrəŋ, k'ɛsak sɔ ŋi. 11 K'antantoriya ŋoluksərnɛ dec dɔrɔfɔy ŋɛgbəm tɔbɔpər tɛcaŋk ta kətɔk nkɛ aŋwe «olif» mɔ. Kətɔk kɔ nkɛ aŋwurɛ moro mmɛ antam kidi, pamotɛnɛ ki dəlamp, kɔ pəyɔnɛ fɛ ti-ɛ pasɔm pokom pa ki. Kɔ Nuha ɛŋcərɛ katina a domun dɛŋcɛsɛ. 12 K'ɛŋkarɛnɛ sɔ haŋ tataka ta camət-mɛrəŋ, k'ɛsak sɔ antantoriya. Mba ntɛ ŋi ŋɔŋkɔ mɔ, ŋɛnalukus fɛ sɔ nnɔ eyi mɔ.
13 Tataka tɔcɔkɔ-cɔkɔ ta ŋof ŋɔcɔkɔ-cɔkɔ nŋɛ Nuha ɔsɔtɔ meren 601, ti tɔ domun dɛnasak antɔf. Kɔ Nuha eŋgbipi abil, k'ɔmɔmən doru. K'ɛnəŋk fɔ domun fəp dowosər. 14 Tataka ta 27, ŋof ŋɔcɔkɔ-cɔkɔ ŋayi, antɔf fəp ŋɛnawos fər.
15 Kɔ Kanu kəloku Nuha: 16 «Məwur abil disrɛ, məna kɔ wəran kam, awut am k'aran aŋan. 17 Məwurɛnɛ sɔ sɛm yɛləpəs nyɛ yeyi abil disrɛ kɔ məna mɔ. Kɔ bɛmp dokom fəp, sɛm yɛfɛt kɔ yɔpɔŋ, yɛsam doru yokom.» 18 Kɔ Nuha owur debil nkɔn kɔ wəran kɔn k'awut ɔn k'aran aŋan. 19 Kɔ sɛm, bɛmp kɔ yeliŋɛ-liŋɛ yowur fəp dokom dokom.
20 Kɔ Nuha olompəs dəkəloŋnɛ, nde ɛntam kəc-loŋnɛ Kanu Kəpɔŋ mɔ. Sɛm kɔ bɛmp yɔtɔt dacɔ k'ɛlɛk yin-yin, k'endif yi, k'ɔŋcɔf yi nde dəkəloŋnɛ kəroŋ. 21 Kɔ Kanu Kəpɔŋ kəmbaŋ ambɔŋc ŋobotu ŋa kəloŋnɛ, kɔ kəlokunɛ dɛbəkəc, «Ifɔsɔsɔŋ antɔf pəlɛc teta fum. Kaŋce kɔ, bawo afum mɛcɛm-cɛmnɛ mɛlɛc meyi ŋa dəbəkəc kəyɛfɛ dowut daŋan, mba ifɔsɔləsər ca nyɛ yeŋesəm doru pəmɔ ntɛ intɛp ti kəcyɔ mɔ.»
22 «Kəwon ka antɔf doru fəp,
kəbɔf kɔ kətɛl,
pəwonu kɔ pəcaŋki,
kətən kɔ dɛrəŋ,
dɔsɔk kɔ pibi,
yɔfɔdelip.»

*8:7 «abɛmp ŋa Mənar,» kɔ pəyɔnɛ fɛ ti-ɛ «kəwan ka aser.»

8:11 Kətɔk kɔ nkɛ aŋwurɛ moro mmɛ antam kidi, pamotɛnɛ ki dəlamp, kɔ pəyɔnɛ fɛ ti-ɛ pasɔm pokom pa ki.