Tawureta Musa, Buk 4:
Kəlɔm ka aka Yisrayel
Moloku ma kəsɔkəs buk ba Musa ba maŋkəlɛ: Kəlɔm
Buk ba Kəlɔm boloku marənt ma aka Yisrayel meren wəco maŋkəlɛ (40) nde dətɛgbərɛ ŋactɛn atɔf nŋɛ MARIKI ɛnasɔŋ temer kəsɔŋ ŋa, nŋɛ ŋɔyɔnɛ atɔf ŋa Kanaŋ mɔ. Buk babɔkɔ b'aŋwe «Kəlɔm ka aka Yisrayel» bawo bɔyɔ mopoc mɛrəŋ mmɛ moloku kəlɔm ka arkun aŋɛ ŋanatam kəsutɛnɛ cusuŋka ca Yisrayel dacɔ mɔ (Sora 1 kɔ sora 26). Kəyɛfɛ tokur aŋa acərɛ mes ŋancɛm-cɛmnɛ a Aŋnabi Musa ɛnacicəs buk mbɛ kɔ səbuk maŋkəlɛ səlɔma sa Tawureta Musa: Dəkəcop da Doru, Kəwur ka aka Yisrayel ŋayi Yɛŋən, Sariyɛ s'aLewy, Kəlɔm ka aka Yisrayel, kɔ Sariyɛ Səgbɔkərɛ. Yecicəs yisərka yoloku ti, bawo moloku mɔcɔkɔ-cɔkɔ ma buk bambɛ moloku cəHebəre: «Kɔ MARIKI oloku Musa: ...» (Kəlɔm 1.1). Tɛntam sɔ kəyi a Musa ecicəs pəlarəm pa buk babɔkɔ, k'atəksɛ sariyɛ s'aSuyif ŋadebɛrɛnɛ tɛlpəs moloku mepic mɔlɔma teta kəsɔksər ka mes fəp mmɛ Musa encepərɛnɛ doru mɔ. Totubcɛnɛ: Pəncuca kəcɛm-cɛmnɛ a Musa ɛnacicəs moloku pəmɔ Kəlɔm 12.3, nnɔ aŋkor-koru dofum dɔn mɔ.
Marənt maŋan disrɛ nde dətɛgbərɛ, aka Yisrayel ŋambokɛnɛ kɔ ŋayeŋkər Kanu səbomp ŋacgbɔkərɛ ti pəlarəm. Kəsɔŋ kəŋan kəway, k'antɔrəs ŋa. Totubcɛnɛ ta mamɔkɔ tɔyɔnɛ ntɛ aka Yisrayel ŋananesɛ mɔ, kɔ ŋambokɛnɛ ntɛ afum aka Kanaŋ ŋananaŋkanɛ kəyɔ sɔkət mɔ (Sora 14.1-4). Teta mes mamɔkɔ, kɔ Kanu kəloku a dɛtɛmp din məlməl da afum ŋandefi a aka Yisrayel ŋadebɛrɛ atɔf nŋɛ MARIKI ɛnadɛrəm kəsɔŋ ŋa mɔ. Musa nkɔnsərka yati ɔnckɔtɛnɛ fɛ mɛtəksɛ ma MARIKI tɛm fəp pəmɔ tɔkɔ MARIKI ɛnasom kɔ ti mɔ. Ti tɛnasɔŋɛ ta MARIKI owosɛ kəbɛrɛ ka Musa atɔf nŋɛ ɛnaloku kəsɔŋ afum ɔn mɔ. Ali ntɛ afum ŋanayeŋkər Kanu səbomp mɔ, Kanu kənasak fɛ kəkɛkəs ŋa. Ntɛ aterɛnɛ a aYisrayel ŋalɛk wəgbal kəsənc wətɔlaŋ Kanu nwɛ ancwe Balam kətolanɛ aka Yisrayel pəlɛc mɔ, kətolanɛ aka Yisrayel pətɔt gbəcərəm kɔ Kanu kənawosɛ kɔ (Kəlɔm sora 22-24).
Teyer ta buk bambɛ
1-10.11: Moloku ma kəlɔm ka aka Yisrayel, kɔ tɛcəmbər-cəmbər ta saŋka səŋan, yɛbəc ya aloŋnɛ kɔ yopocɛ nyɛ kusuŋka o kusuŋka kənasɔŋ teta kəpus ka tetek toloŋnɛ mɔ.
10.12-25: Marənt ma aka Yisrayel nde dətɛgbərɛ.
26-36: Kəlɔm ka mɛrəŋ kɔ mɛtəksɛ mɔlɔma ma afum aka Yisrayel. Mamɔkɔ mɛbɛrɛnɛ mewe ma mofo mmɛ aka Yisrayel ŋanacəmbər saŋka mɔ, ntɛ ŋanckɔ atɔf nŋɛ Kanu kənadɛrəm kəsɔŋ ŋa mɔ, kɔ ntɛ anayerəs atɔf ŋaŋɔkɔ mɔ.
Kəlɔm ka aka Yisrayel
1
Yisrayel kəyi kəŋan nde tɛgbərɛ ta Sinayi
1-10
Kəlɔm kəcɔkɔ-cɔkɔ ka afum cusuŋka ca Yisrayel disrɛ
1 Nde tɛgbərɛ ta Sinayi, nde aŋgbancan ŋɛbəpɛnɛ kɔ Kanu, tataka tɔcɔkɔ-cɔkɔ ta ŋof ŋa mɛrəŋ, teren ta mɛrəŋ ta kəwur ka aka Yisrayel Misira, kɔ MARIKI oloku Musa: 2 «Nəlɔm kəloŋkanɛ ka afum a Yisrayel dəcor kɔ dəwɔlɔ, nəlɔm səbomp tin tin mewe ma arkun fəp. 3 Məna kɔ Aruna nəlɔm aŋɛ ŋantam kətɔmpər yosutnɛnɛ Yisrayel mɔ, dəcəgba ca asutɛnɛ, kəyɛfɛ aŋɛ ŋayɔ meren wəco mɛrəŋ haŋ kəcepər ka ti mɔ. 4 Nəndekɔsɔtɔ amar, akiriŋ akin akin a cusuŋka conu. 5 Mənəŋk mewe ma arkun aŋɛ ŋandemar nu mɔ.
Kusuŋka ka Ruben: Elicur wan ka Sedewur.
6 Kusuŋka ka Simeyɔŋ: Selumiyel, wan ka Curisaday.
7 Kusuŋka ka Yuda: Nasɔŋ, wan ka Aminadab.
8 Kusuŋka ka Isakar: Netaneyel, wan ka Cuwar.
9 Kusuŋka ka Sabulon: Eliyab, wan ka Heloŋ.
10 Kusuŋka ka awut a Isifu, kusuŋka ka Efrayim: Elisama, wan ka Amihud. Kusuŋka ka Manase: Kamaliyel, wan ka Pedacur.
11 Kusuŋka ka Beŋyamin: Abidan, wan ka Kideyoni.
12 Kusuŋka ka Dan: Ahiyeser, wan ka Amisaday.
13 Kusuŋka ka Asɛr: Pakiyel, wan ka Okəraŋ.
14 Kusuŋka ka Kad: Eliyasaf, wan ka Dewel.
15 Kusuŋka ka Naftali: Ahira, wan ka Enan.»
16 Akiriŋ a cusuŋka aŋɛ anayɛk-yɛk kəloŋkanɛ ka Yisrayel dacɔ mɔ, ŋanayɔnɛ akiriŋ a cəgba ca asutɛnɛ a Yisrayel. 17 Musa kɔ Aruna ŋalɛk afum aŋɛ anamentər mewe maŋan mɔ, 18 kɔ ŋaloŋka aka Yisrayel fəp dɔsɔk dɔcɔkɔ-cɔkɔ da ŋof ŋa mɛrəŋ. Musa kɔ Aruna ŋacicəs mewe maŋan dəcor kɔ dəwɔlɔ, kɔ ŋalɔm ŋa tin tin, arkun aŋɛ ŋanasɔtɔ meren wəco mɛrəŋ (20) haŋ ŋacepər ti mɔ. 19 Pəmɔ tɔkɔ MARIKI ɛnasom ti Musa a pəlɔm ŋa nde dətɛgbərɛ ta Sinayi mɔ.
20 Kɔ kəlɔm kəncop nda kusuŋka ka awut a Ruben wan wəcɔkɔ-cɔkɔ wəka Yisrayel, kəbənda ka yuruya yɔn, dəcor kɔ dəwɔlɔ, dokom kɔ dokom, palɔm tin tin mewe ma arkun fəp, aŋɛ ŋanasɔtɔ meren wəco mɛrəŋ haŋ ŋacepər ti, kɔ aŋɛ ŋantam kətɔmpər yosutnɛnɛ mɔ, 21 arkun aŋɛ ŋanalɔm nde kusuŋka ka Ruben mɔ: Wul wəco maŋkəlɛ kɔ camət-tin, masar kəcamət (46.500). 22 Kəbənda ka yuruya ya Simeyɔŋ, dəcor kɔ dəwɔlɔ, aŋɛ analɔm tin tin mewe ma arkun fəp kəyɛfɛ aŋɛ ŋanasɔtɔ meren wəco mɛrəŋ haŋ ŋacepər ti mɔ, arkun aŋɛ ŋanctam kətɔmpər yosutnɛnɛ mɔ, 23 arkun aŋɛ analɔm nde kusuŋka ka Simeyɔŋ mɔ, ŋanayi afum wul wəco kəcamət kɔ camət-maŋkəlɛ, masar maas (59.300). 24 Kəbənda ka yuruya ya Kad, dəcor kɔ dəwɔlɔ, k'alɔm mewe ma arkun aŋɛ ŋanasɔtɔ meren wəco mɛrəŋ haŋ ŋacepər ti, arkun aŋɛ ŋanctam kətɔmpər yosutnɛnɛ mɔ, 25 aŋɛ analɔm nde kusuŋka ka Kad: Afum wul wəco maŋkəlɛ kɔ kəcamət, masar camət-tin wəco kəcamət (45.650). 26 Kəbənda ka yuruya ya Yuda, dəcor kɔ dəwɔlɔ, k'alɔm mewe ma arkun aŋɛ ŋanasɔtɔ meren wəco mɛrəŋ haŋ ŋacepər ti, arkun aŋɛ ŋanctam kətɔmpər yosutnɛnɛ mɔ, 27 arkun aŋɛ analɔm nde kusuŋka ka Yuda mɔ, ŋanayi afum wul wəco camət-mɛrəŋ kɔ maŋkəlɛ, masar camət-tin (74.600). 28 Kəbənda ka yuruya ya Isakar, dəcor kɔ dəwɔlɔ k'alɔm mewe ma arkun aŋɛ ŋanasɔtɔ meren wəco mɛrəŋ haŋ ŋacepər ti, arkun aŋɛ ŋanctam kətɔmpər yosutnɛnɛ mɔ, 29 arkun aŋɛ analɔm nde kusuŋka ka Isakar, ŋanayi afum wul wəco kəcamət kɔ maŋkəlɛ, masar maŋkəlɛ (54.400). 30 Kəbənda ka yuruya ya Sabulon, dəcor kɔ dəwɔlɔ k'alɔm mewe ma arkun aŋɛ ŋanasɔtɔ meren wəco mɛrəŋ, haŋ ŋacepər ti, arkun aŋɛ ŋanctam kətɔmpər yosutnɛnɛ mɔ, 31 arkun aŋɛ analɔm nde kusuŋka ka Sabulon, ŋanayi afum wul wəco kəcamət kɔ camət-mɛrəŋ, masar maŋkəlɛ (57.400). 32 Kəbənda ka yuruya ya Isifu: Awut aka Efrayim, dəcor kɔ dəwɔlɔ k'alɔm mewe ma arkun aŋɛ ŋanasɔtɔ meren wəco mɛrəŋ haŋ ŋacepər ti, arkun aŋɛ ŋanctam kətɔmpər yosutnɛnɛ mɔ, 33 arkun aŋɛ analɔm nde kusuŋka ka Efrayim ŋanayi afum wul wəco maŋkəlɛ, masar kəcamət (40.500). 34 Kəbənda ka yuruya ya Manase, dəcor kɔ dəwɔlɔ k'alɔm mewe ma arkun aŋɛ ŋanasɔtɔ meren wəco mɛrəŋ haŋ ŋacepər ti, arkun aŋɛ ŋanctam kətɔmpər yosutnɛnɛ mɔ, 35 arkun aŋɛ analɔm nde kusuŋka ka Manase mɔ, ŋanayi afum wul wəco maas kɔ mɛrəŋ, masar mɛrəŋ (32.200). 36 Kəbənda ka yuruya ya Beŋyamin, dəcor kɔ dəwɔlɔ k'alɔm mewe ma arkun aŋɛ ŋanasɔtɔ meren wəco mɛrəŋ, haŋ ŋacepər ti, arkun aŋɛ ŋanctam kətɔmpər yosutnɛnɛ mɔ, 37 analɔm nde kusuŋka ka Beŋyamin arkun wul wəco maas kɔ kəcamət, masar maŋkəlɛ (35.400). 38 Kəbənda ka yuruya ya Dan, dəcor kɔ dəwɔlɔ k'alɔm mewe ma arkun aŋɛ ŋanasɔtɔ meren wəco mɛrəŋ haŋ ŋacepər ti, kɔ arkun aŋɛ ŋanctam kətɔmpər yosutnɛnɛ mɔ. 39 Awa, nde kusuŋka ka Dan analɔm di arkun wul wəco camət-tin kɔ mɛrəŋ, masar camət-mɛrəŋ (62.700). 40 Kəbənda ka yuruya ya Asɛr, dəcor kɔ dəwɔlɔ k'alɔm mewe ma arkun aŋɛ ŋanasɔtɔ meren wəco mɛrəŋ haŋ ŋacepər ti, arkun aŋɛ ŋanctam kətɔmpər yosutnɛnɛ mɔ, 41 arkun aŋɛ analɔm nde kusuŋka ka Asɛr ŋanayi afum wul wəco maŋkəlɛ kɔ pin, masar kəcamət (41.500). 42 Kɔ kəbənda ka yuruya ya Naftali, dəcor kɔ dəwɔlɔ k'alɔm mewe ma arkun aŋɛ ŋanasɔtɔ meren wəco mɛrəŋ haŋ ŋacepər ti, arkun aŋɛ ŋactam kətɔmpər yosutnɛnɛ mɔ, 43 akaŋɛ ŋanalɔm nde kusuŋka ka Naftali ŋanayi afum wul wəco kəcamət kɔ maas, masar maŋkəlɛ (53.400).
44 Arkun akaŋɛ ŋɔ Musa, Aruna kɔ arkun aŋɛ wəco kɔ mɛrəŋ aŋɛ ŋanayɔnɛ akiriŋ a cusuŋka ca Yisrayel mɔ, ŋanalɔm, kəlɔ o kəlɔ fum wəkin. 45 Arkun akaŋɛ ŋ'analɔm aka Yisrayel dacɔ, dəwɔlɔ kɔ dəwɔlɔ kəyɛfɛ aŋɛ ŋanasɔtɔ meren wəco mɛrəŋ haŋ ŋacepər ti, arkun aŋɛ ŋanctam kətɔmpər yosutnɛnɛ Yisrayel mɔ, 46 arkun aŋɛ analɔm mɔ fəp, ŋanayi afum wul masar camət-tin kɔ maas, masar kəcamət wəco kəcamət (603.550).
Yɛbəc sona ya aka kusuŋka ka Lewy
47 ALewy teta kusuŋka kəŋan ananɔŋkəl fɛ ŋa kəlɔm ka aka Yisrayel dacɔ. 48 Kɔ MARIKI oloku Musa: 49 «Ta mədenɔŋkəl arkun a kusuŋka ka Lewy kəlɔm kɔ aka Yisrayel. 50 Məna, məkekərɛ aLewy nde dəkiyi da kaŋkəra nkɛ kəmentər danapa da MARIKI kɔ aka Yisrayel mɔ, kɔ yosumpər-sumpər kɔ ca yɔkɔ yeyi di disrɛ mɔ fəp. Ŋa ŋande ŋacgbaŋnɛ kaŋkəra kaŋkɔ kɔ yosumpər-sumpər ya di, ŋayɔnɛ akiriŋ a ki, ŋa ŋande ŋackɛl dəkiyi da kaŋkəra dadɔkɔ. 51 K'andecepɛnɛ dəkiyi dosoku-ɛ, aLewy ŋancekəli di. K'aŋkɔ sɔ kəcəmbər dəkiyi dosoku-ɛ, aLewy ŋaŋlɔ sɔ di. Kɔ fum wəfulus ɔlɔtərnɛ di-ɛ, mɛnɛ padif kɔ. 52 Aka Yisrayel fəp nwɛ o nwɛ pəyi saŋka sɔn disrɛ, ta pəbɔlɛnɛ kɔlər ka kəgba kɔn k'asutɛnɛ. 53 ALewy ŋande ŋackɛl dəkiyi dosoku ndɛ doŋkump kaŋkəra nkɛ kəmentər danapa da MARIKI kɔ aka Yisrayel mɔ, ntɛ tɔŋsɔŋɛ ta mɛtɛlɛ ma MARIKI mɛbəp kəloŋkanɛ ka afum a Yisrayel mɔ, aLewy ŋacbum dəkiyi dosoku da kaŋkəra kaŋkɔ.» 54 Kɔ aka Yisrayel ŋayɔ tɔkɔ MARIKI ɛnasom Musa mɔ.