24
1 Ntɛ Balam ɛnəŋk a pənabɔt MARIKI kəsɔŋ aka Yisrayel pətɔt mɔ, ɔŋkɔ fɛ sɔ pəmɔ tɔkɔ ɔncyɔ ti mɔ kətɛnəs mɔyɔ mɔn ma dure, k'ɛŋkafəlɛ k'ɛntɛfərnɛ kəca ka dətɛgbərɛ. 2 Kɔ Balam eyekti fɔr k'ɛnəŋk aka Yisrayel ŋandɛ cusuŋka cusuŋka, awa kɔ amera ŋa Kanu ŋender kɔ. 3 K'oloku taruku ntɛ:
«Moloku mmɛ mɔ, ina Balam wan ka Behor iloku,
ina wərkun nwɛ iŋnəŋk pəcempi cəleŋ mɔ,
4 moloku ma nwɛ eŋne moloku ma Kanu mɔ,
ma nwɛ ɛŋnəŋk ntɛ Wəka Fənɔntər eŋmentər kɔ mɔ,
moloku ma nwɛ ontontnɛ Kanu fɔr kiriŋ mɔ, fɔr yemepi.
5 Afum aka Yisrayel, nəna aŋɛ nəwur dokom da Yakuba mɔ,
cəbal conu ncɛ nəyi mɔ cəntesɛ yati!
6 Cəbal conu cəfəntərɛ pəmɔ dəŋgbəl,
pəmɔ lakɔ ndɛ deyi kəŋgbɔkɔ kəsək mɔ,
pəmɔ sukum nsɛ MARIKI ɔmbɔf mɔ,
pəmɔ tɔk yetes ya sɛdər nyɛ yɛncəmɛ domun kəsək mɔ.
7 Nde ndoronu domun dompurər dəkələmp dɛcdəməs yɔbɔf ya dalɛ.
Wəbɛ wəYisrayel endetam Akak,
dɛbɛ da Yisrayel dendesɔtɔ fənɔntər.
8 Kanu kənawurɛnɛ ŋa atɔf ŋa Misira,
kɔ fənɔntər fəpɔŋ nfɛ fəwurɛnɛ fa wana wa dop mɔ.
Ŋaŋmələk afum akɔ ŋaŋwɛkərnɛ ŋa mɔ.
Ŋactepi bɛnt ya aterɛnɛ aŋan, ŋacfutɛ ŋa cəbəlma.
9 Ŋantontnɛ, ŋafəntərɛ pəmɔ kusunuŋku,
pəmɔ kusunuŋku kəran, an'ɛntam ki kəyekti-ɛ?
Aka Yisrayel, fum pəsɔtɔ pətɔt nwɛ ontolan'am pətɔt mɔ,
pəsɔtɔ pəlɛc nwɛ ontolan'am pəlɛc mɔ!»
10 Awa, kɔ pəntɛlɛ Balak pəpɔŋ nnɔ Balam eyi mɔ. K'ompol waca teta mɛtɛlɛ mɔn, k'oloku Balam: «Aterɛnɛ em ŋ'inaw'am kədetolanɛ pəlɛc, kɔ məna mətolanɛ ŋa pətɔt haŋ kəmaas! 11 Ndɛkəl oŋ, məyɛfɛ məkɔ nde ndaram! Inaloku a indelas əm pəlel, mba MARIKI ɛmbaŋər əm pəlel papɔkɔ!»
Balam oloku tedeyi tɔtɔt ta aka Yisrayel
12 Kɔ Balam eyif Balak: «Bafɔ inaloku asom am ntɛ ba? 13 ‹Ali tɔyɔnɛ Balak pəsɔŋ im gbeti kɔ kɛma ka kəlɔ kɔn disrɛ fəp, ifɔtam kəgbɛkəl tosom ta MARIKI kəyɔ ka pətɔt kɔ pəyɔnɛ fɛ ti-ɛ pəlɛc. Tɔkɔ MARIKI endelok’im mɔ, t'indeloku.› 14 Ndɛkəl oŋ, intas nde afum em ŋayi mɔ, məder ilok'əm kɔ pəndewon-ɛ, ntɛ aka Yisrayel ŋandeyɔ oŋ afum am mɔ.» 15 Kɔ Balam ɛndəŋk toloku ntɛ:
«Moloku ma Balam wan ka Behor,
moloku ma wərkun nwɛ ɛŋnəŋk pəcempi mɔ,
16 moloku ma nwɛ eŋne moloku ma Kanu mɔ,
ma nwɛ ɛncərɛ mɛcərɛ ma Wəka darenc mɔ,
moloku ma ina nwɛ iŋnəŋk mementər ma Wəka Fənɔntər mɔ,
ma nwɛ ontontnɛ fɔr ya Kanu kiriŋ mɔ, fɔr yemepi.
17 Iŋnəŋk tɔkɔ tendeder mɔ, mba bafɔ kərɛsna kɔ tendeyi,
iŋgbətnɛ ti, mba bafɔ tɛkərɛsna tɔ.
Kɔs kəyi kəyɛfɛ yuruya ya Yakuba dacɔ,
wəka kəŋgbasar eyi kəyɛfɛ Yisrayel.
Kɔ kəŋgbasar kɔn ka dɛbɛ, dɛkəŋk oŋsut ki aMohab,
pələsər yuruya ya Sɛt fəp, aŋɛ ŋayɔnɛ acepɛ-cepɛ aka dɔtɔf mɔ.
18 Yisrayel ŋandeyɔ sɔkət. Ŋandebaŋ Edɔm,
ŋandebaŋər Sehir, aterɛnɛ ɔn.
19 Wəwur ka dokom da Yakuba endetasərnɛ ŋa,
endemələk alpəs akɔ ŋandecəmɛ dare mɔ.»
Balam ɛndəŋk kələsər ka aterɛnɛ aka Yisrayel
20 Kɔ Balam ɛnəŋk aka Amalɛk k'oloku moloku mmɛ:
«Amalɛk ŋɔ akaŋɛ aŋɛ ŋantam fəp mɔ.
Kɔ pəndewon-ɛ, andeləsər ŋa few.»
21 Kɔ Balam ɛnəŋk sɔ aKeni, k'oloku:
«Dəkiyi donu d'ɛncəp,
tasar kəroŋ wɔlɔ wonu weyi.
22 Mba andemələk nəna aKeni,
tɛm ntɛ aka Asur ŋandekekərɛ nu dacar mɔ.»
23 Kɔ Balam oloku sɔ:
«Pəlɛc pere! An'endeyi doru tɛm ntɛ Kanu kəndeyɔ ti mɔ-ɛ?
24 Cibil cəndeder kəyɛfɛ Sipər,
afum akakɔ ŋandesut aka Asur, ŋasut sɔ aka Heber,
mba ayɛfɛ Sipər akakɔ sɔ ŋatɛfərnɛ kəmələk kəŋan!»
25 Kɔ Balam olukus nde ndɔrɔn, kɔ Balak nkɔn sɔ ɔŋkɔ kəca kɔn.