ካፋራመሮ ጳዉሎሳኮክ ሀንዳ ካሆሬ
ካቆሮንቶሳ እባዶ ቶስ
ታባኖ
ጳዉሎሳ ካቆሮንቶሳ እባዶን ካጻፈሮ ካሆራርጄ ሀንዳኬሳ ካኮንጻፈራ ታቆሮንቶሳ ካታማይ ካአሊሰሮ ምን ካዋይ ኦሮ ግር ካአማኒና አማኖኮክ ጋራይ ታግቴ ራኮዉን ማላ ሄልን ቆፔረያ። ኡሱ ጎራታ ቆሮንቶሳ ካአላም ጎሳ ካሞጋን ታኮግረ ታግሪክ ካታማ ላኖኮ ካሮረ አካያ ካአማማረ ቃላዳ ካሮምዉን መተት ካታማተ። ህት ካታማ ካአቲ ካሌሮ ዳዳላይ ባራኖኮኒዕ ፈሎይ፥ ዎጋኮክ ጂናን፥ ኣሎ ባልአታ ካግረ ያዳሊ ታሜላንና አማኖልኮክ ሞጋን ታአዴሳንተተ።
ካፋራመሮክና ካካለኮና ክንትቢ ኡሱ ካአባተረ ምን ካዋይ ኦሮ ካግረ ካለካለ ብያኖኮክ ጋራ፥ ታሜላን ያዳሊኮክ ግር፥ ሻርሙጡማኮክና እስአታታኖኮክ ጋራ፥ ምን ካዋክ ሴራልኮክ ጋራ፥ አያና ቁሉክ እላቦልኮክና ጎይኮ ክያኖኮክ ጋራነየ፤ ኡሱማለና ካፋራመሮክ ካገጌሎ ሃፉራ ሂናኣ ሆሲን ክንትቢ አባተረ እስኦረ ሰጋራ።
“ጌላንጀ” ዋ ጎሳን ካስሰሮ እላቦልኮ ካሮረ ላኖ ካኮቱሰራ ታቶሞንኮሴድ ፎልሲ ሂካ ማጻፋይ ኣሎ ታአዴሳንተ ባንኤ ላኖ ሄዳማታ።
ራቶ ሂክ ማጻፋ ካአበራ
ታባኖ 1፡1-9
አማኒል ኦሮ ካግረ ካለካለ ብያኖ 1፡10—4፡21
ያዳሊ ታሜላና ምን ኮክ እባዶኮክ ግር 5፡1—7፡40
አማኒልና ካክርስታና አማኖ ሀአታኖን ኦግራን 8፡1—11፡1
ምን ካዋኮክ ግርና ሄዶይሳታኖኮክ ዎጋ 11፡2—14፡40
ካክርስቶሳና ካአማኒል ጎይኮ ከያኖ 15፡1-58
ኡል ካይሁዳ ራካተ ካግሮ አማኒሉን ካስሳምናሮ ጋርጋርሳ 16፡1-4
ጉድሳኖ 16፡5-24
1
1 ፈኢ ታዋይ የሱሳ ክርስቶሳን ካሀንዳሮ ጎጎሌሮን ካኡማመሮ ጳዉሎሳኮና፥ አብካን ሶስንተንስኮ፥
2 ታቆሮንቶሳ ካታማይ ካግራ ካዋ ምን ካኤብ ክርስቶሳ የሱሳይ ኦቁሎየራዉና ካክሶና ካካን ጎታ ካሌሮ ጎታካን የሱሳኮክ መገይ ባንኤ ባንኤይ ሌጉረ ካኡማሮ ዱባነ ዎታ ቁሎለ ሊን ኦኡማመራዉን፥
3 ዋ ኣቦካንኮና፥ ጎታካን፥ የሱሳ ክርስቶሳኮ ስኖና ኖጎዳ እስኑን ሀሌቶ።
ጋላታ ዋዉን
4 የሱሳ ክርስቶሳይ ታስሳንተቶ ስኖ አርጌቶ እስን ማራን አን ዋ ጋላታራ። 5 ኣላንቲና ማምስክ አየስ ህክና ካአዬሳማሮ ዱባን ቃሩማ ዱባ ኡሱይ ዱሩማቴታን። 6 ክርስቶሳ ማራን ካአቶቲነኔና እስን ዶሌ ꬋባተራ፤ 7 ሃኑን ጎታካን የሱሳ ክርስቶሳ ሙታኖ ሀልቻይ እስን ኦራታ ግራን ማምስክና ካአያና እላቦ እስንኮ ላኮሀንቃሮ። 8 ጎታካን የሱሳ ክርስቶሳኮት ኤመቶ ቱፍ ካላይ ጎጎሙታኑን ኡሱ ታ ጋቾ ጌሮ እስን አታይሰ ኦራራ። 9 ኤረኬሳ ጎታካን የሱሳ ክርስቶሳኮክ ራቶ ላኖ ቶስ እስን ካኡመራ ዋ ካአብዳመያ።
ቆሮንቶሳኮክ ምን ካኤብ ኦሮ ካግሮ ካለካለ ብያኖ
10 አቢላልቴ! እስን ጠኤ ካለካለ ብያኖ ጎጎግኖንኮ ዎዳና ቶ፥ ያዳ ኮ እስኑን ጎጎግሮዉን እስእሲ ኦሮና እስኣት ህኢ ቶ ጎጎሌታዉን ጎታካን የሱሳ ክርስቶሳኮክ መገይ አን እስን ኤባታራ። 11 አቢላልቴ! እስን ኦሮ ዶጋማ ግራኖ ካቀሎኤ ካምነ እባዶኮ አን ማለራ። 12 አዬስና ሃያ፥ እስንኮ ኮ “አን ካጳዉሎሳያ” ጎአምሮ፥ ካካለ “አን ካአጲሎሳያ” አማራ፥ አደና ኮ “አን ካከፋያ” አማራ፥ ካካለ አደ “አን ካክርስቶሳያ” አማታን። ኦፋ. ፈ. 18፡24። 13 ሀያ ክርስቶሳ ኤካ በልኤራ? ጳዉሎሳ እስኑን ሱዋመራ? ጎርቱን ካጳዉሎሳ መገይ ጣማቃንቴታን? 14 ቀርስጶሳና ጋዮሳ ኳሬ እስንኮ አን ማዮና ማንኮጣማቂኖ ግሮ ማራን አን ዋ ጋላታራ። ኦፋ. ፈ. 18፡8፤ 19፡29፤ ሮመ 16፡23። 15 ሃኑን መገኬ ካጳዉሎሳይ ጣማቃመራ አመ ካአዬሳራ ማዮና ላግሮ። 16 ኦግራን ካእስጢፋኖሳ ካምነ እባዶ አን ጣማቄራ፥ ህናኣኮ ካካለ ጎአመን ጣማቃኖኬ አን ላኮሻዳሮ። 1 ቆሮ. 16፡15። 17 ክርስቶሳ እን ካኮንፋረራ ዎንጋላ ጎጎላላብሮን ኳሬ ጎጎጣማቅሮን ላኮዮ፥ ታክርስቶሳ ማስቃሊ ታማድኖን ጎጎሌኖንኮ እባዶኮ ታሄላንተቶ አዬስኮት ቃሩማ አን ላኮላላባሮ።
ክርስቶሳ ካዋ ሁናና ቃሩማ ላኖ
18 ካማስቃሊ ሃፉራ ካባሮዉን ጎዉማታ፥ ኖ ኦፋይናኖን ጎአመን ሁና ካዋያ።
19 “ቃሮሌኮት ቃሩማ ባስናራ፥
ኦካሳንኮክ ማላባኖ ላኦ ካላይክ የልናራ” አማመ ጻፋመራ። ኢሳ. 29፡14።
20 ቃሮክ ሀጌ ግራ? ካካሳ ሀጌ ግራ? ሴራ ካካሳ ሀጌ ግራ? ሂካ አላም ካቆቆራራ ሀጌ ግራ? ዋ ታአላም ቃሩማ ጎዉማ ላኮየለያ?ኢዮ. 12፡17፤ ኢሳ. 19፡12፤ 33፡18፤ 44፡25።
21 ቃሩማ ታዋኮ ካከይ አላም እስኦቴሳኮት ቃሩማይ ዋ ማላባና ማንኮዋተ ማራን፤ ላላባኮት ጎዉማይ ዋ ኡሱ ኦአማናራን ፋይስን ታኢዳን ፈኢ ታዋ ሌተ። 22 ማጎሬና አይሁድ ባሳክ ማላታ ዶታራን፥ ካግርክ እባዶና ቃሩማ ዶታራን። 23 ኖ ጎአመን ካሱዋመሮ ክርስቶሳ ላላቢናና። ህክና አይሁድን ሀንዱዱፎ፥ አይዛብን አደ ጎዉማታ። 24 ዋ ካኡማተሮን አደ አይሁድና ሌረ ግርክጆሉን ክርስቶሳ ካዋ ሁናና ታዋ ቃሩማያ። 25 ኣላንቲና ታእባዶ ቃሩማኮ ሱረ ታዋ ጎዉማ ጂናታ፥ አታን ካእባዶኮ ሱረ ሀራኖ ካዋያ ካአታታራ።
26 አቢላልቴ! ካኮኡማንቴተን ጎራታ እስን ምስክ እባዶተን አላ ሻዳ፥ ሄዶ ኦእባዶት እስንኮ ኦሞጋን ኦካሳን ላኮቴን፥ ኦሞጋን እስና ኦአቲ ላኮቴን፥ ኦሞጋን እስና ምን ካአቲኮ ላኮኡሙላንተቴን፥ 27 አየሱን ጎአመን ዋ ቃሮሌ ሙሊስን አመጉረ ካአላም ጎዋክ አየስ አሳባራ፥ ዋ ኦአቲ ሙሊስን አመረ ካአላም ላፋክ አየስ አሳባተ፥ 28 ዋ ሂካ አላም ካካባጃመሮ አየስ ካካባጃሞን ግሮ ኣን የልን ሂካ አላምን ሁስ ካአመሮና ካቱፋመሮ ባንኤና ካኮስሳሞን አየስ አሳባተ፥ 29 ህክና ማምስክ እባዶና ኡሱ ሆረ ጎጎꬋዳኖንኮያ። 30 ካክርስቶሳ የሱሳ ላኖ ኡሱኮ ካኬይያ። ኡሱ ዋ ዶለኮ ቃሩማታን፥ ቁሉማታን፥ ቃጄላካን ዎዶካን ሌራ። 31 ጎርታኑ ማጻፋይ ሃ አማመ ጎጎጻፋመሮይ “ካꬋዳታራ ዱባ ዋይ ሀꬋዳቶ።”ኤር. 9፡24።