1 ዋ ሻጋኬሳይ ሂካ ሀንዳኖ ኖን ማንኮስሰሮ ማራን አብድ ላኮጎሳኖ። 2 ካጎላተሮና ካሙሊስሮ ካሌሮ አየስ ኖ እስኦታንኮ ኬንሰና፤ ምጌይና ላኮፈልኖ፥ ሃፉራ ካዋና ላኮኢግልንሶ፤ ሀሱኮ ሩም ዲዳ ቤስ ቱስናና፤ እስኦታን እባዶ ዱባኮት ሳሙ ዋይ ሆረ ዲዳ ቤስ ቱስናና። 3 ኖ ካአጋልስንሰና ካዎንጋላ ሃፉራ ዎዳሳ ካጎላተሮ ጎሌና ካጎላተራና ኦባይናራዉንያ። 4 ሂካ አላምኮክ ሞት ታሌተታ ጻላየ ዋ ካአማኖን እባዶኮት ዎዳና ዱድሰታ፤ ሂካኒና ምዲ ታዋይ ካሙተሮ ካክርስቶሳ ካካባጃ ዎንጋላ ካሀንቃይሳሮ ኢፋ ጎጎዴኖንኮ የለ። 5 ኖ ካአጋልስሳና የሱሳ ክርስቶሳ ጎታ ላኖና ኖና እስኦታን የሱሳ ማራን ኖ እስኑን ኦሀንዳኖ ላኖይያ ኳሬ እስኦታንኮክ ጋራ ላኮላላባታኖ። 6 “እፋ ሙጉዲ ኦሮ ሀሃንቃየ!” አመ ካአዬሰራ ዋ ታክርስቶሳ ምዲ ታሀንቃይሳቶ ካባጃ ታዋ ካኮአዴንሶ ኢፋ ኖን ጎጎስስሮ ኢፋኬሳ ዎዳናታን ኦሮ ጎጎሀንቃይሮ የለ።

7 አየሱን ጎአመን ሂክ ዱባንኮ ካሮራራ ሁና ካዋያ ኳሬ ካካን ላናዋት ጎጎአዴሳምሮ ሂክ ካባጃክ አየስ ኤሬኮ ካመጣመሮ ሁ ሌነ አብነና። 8 ምናምናኮ ራኮ ኖ ጌተታ፤ ጎሌና ኖ ላኮአዎዳማኖ፤ ጎራታ ካሞጋን ኖ ግርድ አማና፤ አንዴ አብድ ላኮዋታኖ፤ 9 ዲናካን ኖ ሆሮራራ፤ ጎሌና ኖ ኦጌላታራን ዋኔ ላካንሶ፤ ባሳምነ ኢያና፤ ጎሌነና ላኮጎዋኖ፤ 10 ግር ካየሱሳ ማርካን ኦሮ ጎጎሙትሮ የሱሳ ጉት ካጌሮ ጎይ ማርካን ጉት አርጌቶ ስዳነ ሰሴታና። 11 ካየሱሳ ግር ካጎዋሮ ማርካን ጎጎሙትሮ ኖ አርዶኒዕ የሱሳ ማራን አርጌቶ ጎይን ሮርነ ስሳማና። 12 ሃንሱን ጎይ ኖ ጉት ጎፈሎ ግር አደ እስን ጉት ፈላራ።

13 ሀሌዎ ኳሬ፥ “አን አማነራ ሃንሱን አዬሰራ” አማመ ጎጎጻፋመሮ፥ ኖና ሀሱ ኮ ካአማኖ አያና ማንኮአብኖ ማራን አብዳታና፤ ሃንሱን ኖ አዬሳና። 14 ጎታ የሱሳ ጎይኮ ካኬሳራ ሄዶ ኖና የሱሳነ ዎታ ጎይኮ ካኬስናሮና እስኔ ዎታ ኡሱ ሆረ ካአሊስናሮ ካንሶዋ። 15 ህት ዱባ እስኑን ላኦ ታሌተታ ስኖ ጫባጫባአንተ ካሞጋን እባዶን ካኮጌተቶኮክ ጅልባ ዋዉን ካባጃ ካሌራ ጋላታ ጎጎጂናሮንያ።

16 ሃንሱን ኖ አብድ ላኮጎሳኖ፤ ማምሲና ካሳረ ማርካን ዱዶ ጎባየና ካኦሮ ማርካን አርጌቶ ኡሱባታራ። 17 ህት ታፉፉድና ግዳትቲዉን ታሌተቶ ራኮታን ሜሳ ካላይት ኣሎ ታአቲ ታሌተቶ ጅሩ ጅሮማት ካባጃ ኖን ሄላምሳታ። 18 ኖ ካኦራታና እሊ ካሙቶን አየስ ኳሬ ኢልኦ ካሙታሮ ላኮዮ፤ ካሙታራ አየስ ግዳትዉንያ፤ ካሙቶን አየስ አደ ጅሩ ጅሮማክያ።