ኦፋራመራን ኮኒዕ ፈሎ
ታባኖ
ኦፋራሜራኮኒዕ ፈሎ ዎንጋላ ካሉቃሳ ዴበ ኦጻፋመራንያን፥ ማጻፋኮክ መተክ ሀልቻ ኦሆራርጄ የሱሳ ዴበ ኦሰሰታሬን አያና ቁሉክ ቃጄልሬን ጋራኬሳ ካአዬሳሮ ካገጌሎ ሃፉራ፥ “ኢየሩሳለም፥ ካይሁዳ ኡል ዱባ፥ ሳማርያይ፥ ታ ኡልኮት ጋቾ ጌሮ” (1፡8) ዎንጋላ ምሲ ጋምባይሰራን ማማኪንያ፥ ማጻፋ ካክርስታና አማኖ አይሁድ ኦሮ ሀጋአባመረ አላም ካግሮ ጎሳ ዱባክ አማኖ ታሌሮ ምሲ ባላኣተሮ ታአዬሳቶ ጅርትታ። ጻፍት፥ ዋ ካአማናራ እባዶ ካሮም ዎኖላልኮክ ዎኖ ዎኖናቲ ቃናትን ኦሮ ማረ ዳባ ካፈላሮ እባዶ ላናዋትና ካክርስታና አማኖ ካአይሁድ አማኖ ሀንቂና ካላይክ ላኖ አዴስስን ታንጂን እጻመራ።
ኦፋራሜራንኮኢ ፈሎ፥ ጋራ ካየሱሳ ካአዬሳራ ካገጌሎ ሃፉራ ታኮገያሮ ባንኤ ጎራታ ጎራታ ባላአታ ሴታኖና ምን ካዋክ ማዳራማኖ ኦቱሳራን ሴዶ መተ መተኒዕ፥
1. ካክርስታና አማኖ ካየሱሳ ዳሩር ቶስ ብያኖኮ አባባተረ ኢየሩሳለም ሀጋአባማኖኮክ ጋራ።
2. ኡል ካእስራኤል ዱባ ጌያኖኮክ ጋራ።
3. ኡል ካሮምነ አደረ ላቡ ታመደትራንያ ጎቦቢ ካግሮ ኡል ዱባ ባላኣታኖ።
ኦፋራመራን ኦፈላራን ፈሎ ኦሮ ጉት ቤን ኦሙታራን አያና ቁሉኒዕ ኮኒዕ ፈሎ ጎሌራን ታጰንጠቆስጠ አሪ ኢየሩሳለም ካግረ አማኒል ጉት ሁና ዳጋኖ፥ ኡሱማሌ ማጻፋ ኦሮ ኦሰሰጋመራን ፈሎ ዱባ ሙታኖ አያና ቁሉክ ምን ካዋና ጃርሶለ ቃጄልሳኖና አታይሳኖ አዳራ። ሆርኮስኮ ካየረ ስሳማ ካግረ ካአማኖ ሀንዳ ካለካለክ ላላባኖ ኦሮ፥ ካለካለ ቤ ስሳመራ፥ ኦፋራመራን ኦፈለራን ፈሎ ኦሮ ፈሎ ኦሀዬራን ፈሎ ሀንዳ ግር ካአማኒሊና ምን ካዋክ ራቶናት ካግረ ሁና ኤክ ግታክ ካአቲዮ አዴስሳራ።
ራቶ ሂክ ማጻፋ ካአበራ
አቶናትኬሳኮክ ኤካታኖ 1፡1-26
የሱሳ ጉድሳ ካስሰሮ አጃጃና አብድ 1፡1-14
ባንኤ ታይሁዳይ ማቶያሳ አሳባማኖ 1፡15-26
አቶናት ኢየሩሳለም 2፡1—8፡3
አቶናት ኡል ካይሁዳይና ኡል ካሳማርያይ 8፡4—12፡25
ካጳዉሎሳ ፋራማኖኮክ ሀንዳኖ 13፡1—28፡31
ታሆሬ ፋራማኖኮት ሴቶ 13፡1—14፡28
ሀጋና ታኢየሩሳለም 15፡1-35
ታላም ፋራማኖኮት ሴቶ 15፡36—18፡22
ታሴድ ፋራማኖኮት ሴቶ 18፡23—21፡16
ጳዉሎሳ ታኢየሩሳለም ካታማይ፥ ታቅሳርያ ካታማይና ታሮም ካታማይ ሽያማኖ 21፡17—28፡31
1
አያና ቁሉክን ታስሳንተቶ አብድ
1 ተዎፍሎሳ! ካሆራርጀ ማጻፋኬይ የሱሳ ካፈለሮና ካአጋልስሰሮ ዱባ አን ኩን ጻፈራ፤ አን ካኮንጻፈራና የሱሳ ፈሎኦቴሳ ካኮሀጋአበሮ ጎራታኮ ኬሰረ 2 ዳሩር ታቤሮ አሪ ታ ጌሮ ካፈለሮያ፤ ዳሩር ካኮቤራና ኦአሳባተሮ ኦፋራሜራዉን አያና ቁሉክኮክ ጋራነ አጃጃ እሶን ስሰ አባባተረያ።
3 ራኮ ታሞጋንኮና አባባተረ ኡሱ እሲ ጋባላመረ አርዶክ ላኖ፥ ህናኣኑን ካሞጋን አቶዪ አዴስሳ አሪ አፋርታም ኦሮ ሮረ ሮረ ሙታ ዎኖናት ካዋኮክ ጋራ እሶን ሰገ። 4 እሶ ዎታና ባቦ ኣምን ሀማጼ ግራን ሀአመ እሶ አጃጄ፤ “ኢየሩሳለምኮ አሮቤተን፤ አየሱን ጎአመን አን አዬሳ ግራን ካማልቴታን ኦዶ ታስሰሮ አብድ ኦራዬን። 5 ያንሳ በከይ ጣማቃ ግረ፤ እስን ጎአመን አሪ ኡጫርኮ አባባይዴን አያና ቁሉክ ጣማቃምናታን።”
የሱሳኮክ ዳሩር ብያኖ
(ማር. 16፡19-20፤ ሉቃ. 24፡50-53)
6 እሶና ራቶ ኩኩሜን ግራን፥ “ጎታ! ዎኖናት እስራኤልዉን አባብ አት ካኮኡሱባይስናታ ጎራታ ግዳያ?” አመን ሆሳተን። 7 የሱሳና ሃ አመ እሶን አባበ፤ “ኦዶ ኦዶናትከሳይ ካሙርቴሴሮ ጎራታጆል ጎርቱን አልማል ማላቢን እስን ላኮዳንዴታን። 8 አየሱን ጎአመን አያና ቁሉክ እስን ጉት ካኮዳገ ጎራታ ሁና አታይናታን፤ ኢየሩሳለም፥ ይሁዳይና ሳማርያይ ዱባ፥ ኡልኮት ጋቾ ታ ጌታኒ አቶልኬ ልናታን።” 9 ኡሱ ሂካ አዬሰ አባባተረ እሶ ዲያ ግራን ዳሩር ቤ፤ ዱማንቻና ኢልትሶኮ ጎልሰ። 10 ኡሱ ዳሩር ቶስ ብያ ግራንቲን፥ እሶና ትችሴን ዲያ ግራን ሳርስ ጉማራክ ኦሳርሳተሬን እባዶጃ ላማ ደራኣ እሶ ዶሌ አሌረን፥ 11 ሃና አመን፤ “እስን እባዶ ካ ጋሊላ፥” “ዳሩር ዲያ ህታኒ ካኮንአልቴታን መዉንያ? ሂክ እስን ዶለኮ ዳሩር ብያግራንቲ እስን ካዴተታን የሱሳ፥ ዳሩር ቶስ ብያ ጎጎዴተታንክ ማለ ኡሱማሌዋ አባባይ ኤመይናራ” አመ።
ይሁዳኮት ባንኤ ማቶያሳ አሳባመ
(ማቶ. 27፡3-10)
12 ኤሰኮ አባባተረ ዛይቲ ካብያራ ጋ ታኮአላታሮ ዎዳምኮ ኢየሩሳለም አባባተን ሴተን፥ ህት ዎዳም ኢየሩሳለምኮ ታፎልሲ አሪ ጎጎሰሴራዉን ካስሳመሮ ራ ግታክ ፋክ አማተ። 13 ካታማ ቶስ ካኮታቤረን ጎራታ ካኮኩኩአማሬን ፎቂ ኮራቴን፤ ህኒዕና ጴጢሮሳ፥ ያንሳ፥ ያይቆባ፥ እንድራሳ፥ ፍልጶሳ፥ ቶማሳ፥ በርተሎሜዎሳ፥ ማቶሳ፥ ካኢልፎሳ ኤረ ያይቆባ ኡልኬሳዉን ካሀኡሳታሮ ስሞናና፥ ኤረ ካያይቆባ ይሁዳነ ግረን። 14 ሂክ እባዶ ዱባ ሄለል ኮኮነ፥ አዬ ታየሱሳ ማይራመኔ፥ ኡሱማሌ አቢላልቴሳ ዎታ ዎዳና ቶ ሌንጉረን ኤብ ሀኢሶን አርጌቶ ኤባታ ግረን።
15 ሀሱ ጎራታ ጴጢሮሳ ቦልና ላማታን ኦሌራን አቢላል ኦሮ ኬ አሌረ፥ 16 “አቢላልቴ! የሱሳ ካአበሮ እባዶን ሆረሃየ ካቃጄልሳሮ ካሌሮ ይሁዳኮክ ጋራ፥ አያና ቁሉክ ጣየ ህኢ ታዳዉቴ ካአዬሰራ ካማጻፋ ሃፉራ ጉዳይን ማንኮዶትሳሮ ማራንያ። 17 ኡሱ ኖኮ ኮ ኣን ቶታመረ ሂካ ሀንዳዉን ለሌዳማኖኮክ ኢድሊ ሄላተ ግረ አመ።”
18 ሂክ እባዶት ፈሎ ኦሜላንኮት ሙራይ ኡል እምናተ፤ ሆረ ሆረ እዬ በቤድ ኡል ኦየረ፥ ጠኤኮ ቦግ በረኤ ሁቦ ቤ ኡባተ፤ 19 ህክና ኢየሩሳለም ካግሮ እባዶ ዱባን ማልሳመ፤ ኡሱ ኡልና ሄኢትሶይ “አከልዳማ” አማመ ኡማመ፥ ፉረንና “ኡል ካኢግ” አማኖያ።
20 ጴጢሮሳና ዴበ፥ “ካማዛሙር ማጻፋይ ሃ አመ፥
“ ‘ኡሱ ታኮግረ ባንኤ ሀላል ሀሌቶ፤
ኤሰ ካግራ እባዶና አሮሄላሞ፤’
አደና
“ ‘ኦዶናትኬሳ ካካለ ሀአታቶ’ አማመ ጻፋመራ።
21 “ሃኑን ጎታ የሱሳ ኖ ኦሮ ታኮሰሴታሬ አርጌቶ ኖኔ ዎታ ካግረ እባዶኮ ኦዶ ኮ አሳባሚን ዶትሳራ፤ 22 ህክና፥ ካያንሳ ጥንቃታኮ ሀጋአበረ ጎታ የሱሳ ዳሩር ታቤሮ አሪ ታ ጌሮ ኖኔ ዎታ ካግረ ሂካ እባዶኮ ኮ ኖኔ ዎታ ጎይኮ ክያኖኮክ አቶ ጎጎሌሮን ዶትሳራ።”
23 ሃኑን እዮስጦሳ ጎርቱን በርሳባስ ካአማመረ ዮሴፋና ማቶያሳነ እሶ ላማ ከነን፤ 24 ሃ አመን ኤባተን፥ “ጎታ፥ አት እባዶ ዱባኮት ዎዳና ካሶዋ፤ ሂናኣ ላማ ኦሮኮ ካአሳባተቶ እባዶ ኖን ቱስ። 25 ካኮንኤባታናና ይሁዳ ኢሰ ታሴተሮ ባንኤቴሳ ሂካ ሀንዳዉና ኦፋራሜራኮት ባንኤ ኖን ጎጎሹምቶንያ።” 26 ኤሰኮና ኢጣ ቤሰን፥ ኢጣና ማቶያሳ ቤሰ፥ ኡሱና ቶሞንኮ ኮ ኦፋራሜራነ ዎታ ቶታመ።