ካፋራመሮ ጳዉሎሳኮክ ሀንዳ
ካቆላስያስ እባዶ ቶስ
ታባኖ
ሂክ ሀንዳ ካኮንጻፋመራ ትጫርትት እስያይ ታኤፈሶን ካታማኮ ምና ታብያኔ ታግቶ ታቆላስያስ ካታማይ ካግሮ ምን ካዋቱንያ፥ ሂክ ምን ካዋ ካኮአሌራ ጳዉሎሳ ላና ጎዋተና ቃላዳ ካሮም ታሌተቴ እስያዉን መተ ታሌተቴ ካታማ ኤፈሶንኮ ዎንጋላ ካሀንዳሮ እባዶ ገጌሳ ማንኮግረ ማራን ቆላስያስና ኦዶናት አባናየ፥ ካቆላስያስ ምን ካዋይ “ዋ ማላቢና ካአማጋመ ፋይና ሄላይን መተ መተ እባዶ ካአያና ሁናሉና ኦዶናትዉን ግልቢስን ዶትሳራ” ኦአማራን ጣራ ኦአጋልስሳራን ግራኖ ጳዉሎሳ ማለ ግረ፥ ሂኒዕ ኦአጋልስሳራን እሶ ካአማራን አየስ ካካለ፥ “መተ መተ እባዶ ሀማጽሳማኖ ኣንክክ ዎጋሉን ሄገሊ ባራኖና ካባቦና ካካለ ዎጋል ኦራይን ዶትሳራ” ካአማሮየ።
ጳዉሎሳ ሂካ ሀንዳ ካኮንጻፈራ ካሩም ካክርስታና ሀንዳ ቱሳ ካጣራ አጋልስስክሶ ኔባዪንየ፥ ኡሱ ኣተ ካኤመተሮ ሀንዳልኮ መተክ፥ “የሱሳ ክርስቶሳ ካአማጋመ ፋይና ስሳራ፥ ሂክ ካካለ አማኖጆልና ፈሎጆል ጎአመን ኡሱኮ ፋክሳራን” ካአማሮያ፥ ዋ ክርስቶሳይ አላም መጠ፥ ምናቴሳነና እስኦቴሳ ቶስ አባበ ኬናራ፥ አላም ፋይን አብድ ካኮግርናታ ክርስቶሳ ዎዳናኮ አማናኖክሶ ካላልያ፥ ሂካ ጋራይ ጳዉሎሳ ሂካ ካአቲ አጋልስስ አማኒልኮክ ግሪ ምሲ ፉራሚን ዳንዳሮ አዴስሳራ።
ሂካ ሀንዳ ጳዉሎሳኮ አታተረ ቆላስያስ ቶስ ጌግስን ካፋራመሮ ትክቆሳ ዎታ ካግረ አናስሞሳ ላኖ ድያኖ ላኦ ካአቦያ፥ ጳዉሎሳ ሂካ አናስሞሳ ካአማማሮ ድይትኮክ ጋራ ኬሰረ ፍልሞናዉን ካካለ ሀንዳ ጻፈረ።
ራቶ ሂክ ማጻፋ ካአበራ
ታባኖ 1፡1-8
ታክርስቶሳ ያዳሊና ፈሎ 1፡9—2፡19
ክርስቶሳይ ግር ካኡሱብ 2፡20—4፡6
ጉድሳኖ 4፡7-18
1
1 ፈኢ ታዋይ የሱሳ ክርስቶሳኮ ካፋራመሮ ጳዉሎሳኮና አብካን ጢሞቶሳኮ፤
2 ቆላስያስ ኦግራን፤ ክርስቶሳይ ቁሎለና ታአብዳንቴ አቢላሉን ዋ ኣቦካንኮ ስኖና ኖጎዳ እስኑን ሀሌቶ።
ካጋላታ ኤብ
3 ኖ እስን ማራን ዋ ካኮኤባታኖ ጎራታ ጎታካን የሱሳ ክርስቶሳኮክ ዋ ኦዶ አርጌቶ ጋላታና። 4 ኣላንቲና የሱሳ ክርስቶሳ እስን ካአብታን አማኖና ቁሎለ ዱባን ታአብታን ጌላንጀ ማልኔና። 5 ህክና ካኮንሌራ ዳሩሪ እስኑን ኤካቴ ታግቶ አብድኮ ካኬይያ፥ ሃንሱን አማኖ ካሩም ዎንጋላኮክ ሃፉራይ ጣይተን ማልቴታን። 6 ህክና እስን ቶስ ጌራ። ሂካ ዎንጋላና ካኮማልቴተንኮና ስኖ ታዋ ሩሚ ታኮአዴሰተን አርኮ ሀጋአበረ አላም ዱባ ማራሙረ ፈላ ጎጎግሮ ማለ እስን ዶሌና ኢል የላታና ጂናታ ግራ። 7 ሂካና ኖ ማራን ክርስቶሳን አብዲ ካሀንዳሮ ካሌራ፥ ኖኔ ዎታ ፈሎይ ካግራ እባዶ ዱባ ካጌላታራ ኤጳፍራ እስን አጋልስሰራ። *ኖኔ፦ ኮኮ ካሆርኮ ማጻፋል እስኒ አማራ። ቆላ. 4፡12። 8 አደና እስን አያና ካዋይ ታአብታን ጌላንጀ ኡሱ ኖን ሰገራ።
9 ሂካኮ ካከይ ኖ አንዴ ሂካ ታኮማልነኖ አርኮ ሀጋአብነኔ ዋ ፈኢቴሳክ ማላባኖ ታአያና ቃሩማና አዴሳኖ ዱባ እስኑን ጎጎአማግሮን እስን ማራን ኤብና ካካለቱን ኤባታኖ ላኮኢንሰኖ። 10 ካኮንኤባታናና ጎታዉን ጎጎዶትሳሮ ሊ ጎጎግርታዉና ዱባይ ኡሱ ጎጎገጌላይሳዉንያ። ህክና ፈሎኦኢዳን ዱባይ ኢል የላታ ዋ ማላባኖይ ጂናታ፤ 11 ካአቲ አታንና ኦብስ ጎጎግርቶን፤ ካካባጃመ ሁናኬሳኮክ ጅልባ ሁና ዱባይ አታታ፥ ገጌላታ፥ 12 ታቁሎሌ ርቲ ኢፋይ ኦአታታኖ ጎጎሌኖን ካየለሮ ኦዶ ጎጎጋላትታውንያ። 13 ኡሱ ካሙጉድ ሞቲኮ ቤሰረ፥ ኡሱ ካጌላታሮ ኤረኬሳኮክ ዎኖናት ቶስ ኖ ታብሰ። 14 ዎዶ ላኖኬሳኮክ ኢግ ጩቦካንዉን ሻጋ ሄላኔ። ኤፈ. 1፡7።
ክርስቶሳ ዱባንኮ ጦቂ ካአመያ
15 ክርስቶሳ ካሙቶን ዋዉን ካሩም ማሱሳያ፤ ኡሱ መጣ ዱባኮ ጦቂ ካአመ ካአቲና ባርክያ። 16 ካመን ዱባ ኡሱይ መጣመራ፥ ዳሩርና ኡል ካግራ፥ ካሙታራና ካሙቶን፥ ኮርፍንጀ ጎሌና ጎርቱን ሁናል፥ ሞትጆል ጎሌና ጎርቱን ኦዶናት ኦባሪሳራን፥ ካመን ዱባ ኡሱኮና ኡሱንዋ መጣመራ። 17 ኡሱ ካመን ዱባኮ ካሆሬያ፥ ካመን ዱባ ራቶ እስአባተ ካኮጣባተራ ኡሱይያ። 18 ኡሱ ማርኬሳ ካሌሮ ምን ካዋዉን መተያ፤ ካአመን ዱባን ካሆሬ ጎጎሌሮን ጎይኮ ከያኖን ባርክያ። ኤፈ. 1፡22-23። 19 ዋ ካመን ዱባ ኡሱይ ጎጎሌሮን ጌላተራ። 20 ማስቃሊ ጉት ካኡባተሮ ኢግኬሳ ኖጎዳ ስሳኖይ ኡልና ሌረ ዳሩሪ ካግሮ ዱባ ጋራኬሳነ እስኦቴሳነ ዎታ ዎጋርሰ። ኤፈ. 2፡16።
21 ታሜላን ቆፋትስንኮ ካከይ ጣይተን ዋኮ ፋክ አንቴን ፈኢትስኒ ዲና ሌተን ግቴን። 22 ግዳ ጎአመን ሙላና ቱፍ ካላይኒዕ ቁሎለ የል እስን እስቶስ ጋባሊን አመረ ጎይ ካክርስቶሳኮክ ጋራነ እስን ዎጋርሰ። 23 ህክና ካኮልናራ እስን አማኖክስኒ ጣባይዴና ኤካይደን ኣላኖይ ታማልተታን ታዎንጋላ አብድኮ አንሻላጋሞን አታይ ጎግርቴንያ። እስን ካማልቴታና ዳሩርኮ ሄገሌ ታግቶ መጣ ዱባን ካላላባመሮ ዎንጋላ ሂካያ፤ አን ጳዉሎሳና ሂካ ዎንጋላን ካሀንዳሮ ሌራ።
ጳዉሎሳ ምን ካዋ ማራን ካቱሰሮ አታን
24 እስን ማራን ታአታየሮ ራኮዉን ግዳና አን ገጌላታራ፥ ክርስቶሳ ማርከሳ ካሌሮ ምን ካዋ ማራን ታአታተሮ ራኮኮ ኢን ታሀንቃተቶ እስኦተይ አማግናራ። 25 አን ሃፉራ ካዋ እስኑን ኣሎ ጎጎሰግሮን ዋኮ ኢን ታስሳንተቶ ሀዳራይ ምን ካዋዉን ካሀንዳሮ ሌራ። 26 ሂክ ሃፉራና ካሮረሮ ጌስጆልና አላታን ታእባዶኮ ስያመ ሆል ሌ አዳላተ ግረ፥ ግዳ ጎአመን ቁሎሌዉን ሙተራ። 27 እሶን ዋ ህታ ሆልኮት ካባጃና ዱሩማ አይዛብ ኦሮ ኤግታትቶ አዴስስን አሳበ፥ ታካባጃ አብድ ካሌራ እስን ኦሮ ካግራ ኡሱ ክርስቶሳያ። 28 ኖና እባዶ መተመተይ ክርስቶሳ ቁሉክ የል ኬኒን ጎጎዳንዴኖን፤ እባዶ ዱባን ቃሩማ ዱባ ማርካስሳና አጋልስሳ ጋራ ካክርስቶሳ ላላባና። 29 አንና አታኒ እዬ ኦሮ ካፈላሮ ሁናኬሳይ ሞአባታ ሂካ ሀልቻን እጻማራ።