ሀንዳ ካያይቆባ
ታባኖ
ሂክ ካያይቆባ ሀንዳ ባርሳኖ ኦህታርቴዉን ሴራ ታሌቶ ቆፋ ካአበሮ ጎሌሮ ካኮንጻፋመራና አላም ዱባይ ዳርኣንተ ታግቶ ቶሞንኮ ላማ ኣኒዉንየ፤ ጻፍትና ቃሩማ ፈሎይ ኖ ካኮሀይስናኖ ማላኮክ ጋራ፥ አማኒልኮክ ቆጳታኖና ያዳሊኮክ ሴራ ካሌሮ አየስ አዴስሰ ምስሊ ካአቦ አየስ ሮርሳራ። ህዩማኮክ ጋራና ዱሩማኮክ ጋራ፥ ጫፍቲኮክ ጋራ፥ አማላ ካእዳንኮክ ጋራ፥ ሀኡሳታኖኮክ ጋራ፥ አማኖኮክና ታኢዳን ያዳሊኮክ ጋራ፥ ህኢኮት ኢዳነና ሜላነኮክ ጋራ፥ ቃሩማኮክ ጋራ፥ እስእስኦሮ እስዲዳኖኮክ ጋራ፥ ኮራኮክና አንጅረኮክ ጋራ፥ ካካለ ጉት ፍርዳኖኮክ ጋራ፥ ꬋዳታኖኮክ ጋራ ኦብስኮክና ኤብኮክ ጋራ፥ አማኒል ፈልን ካዶትሳሮ ዱባ ካለካለ ቤሰ ጻፈራ።
ሂክ ሀንዳ አማኒልኮክ ግሪ አማኖ ፈሎይ ቱሳኖኮክ ጋራ ኣሎ አዴስሰ ቱሳራ።
ራቶ ሂክ ማጻፋ ካአበራ
ታባኖ 1፡1
አማኖና ቃሩማ 1፡2-8
ህዩማና ዱሩማ 1፡9-11
ጫፍት 1፡12-18
ሃፉራ ካዋ ማላኖና ፈሎይ ሀይሳኖ 1፡19-27
ኡሉልስ ጎጎአዬሶንኮ ካስሳመሮ ሴራ 2፡1-13
አማኖና ፈሎ 2፡14-16
አማኒልና ህኢትሶ 3፡1-18
አማኒልና ሂካ አላም 4፡1—5፡6
ካለካለክ አዬስኮክ ጋራን ካስሳመሮ ጎርሳ 5፡7-20
1
1 ዋዉና ጎታ የሱሳ ክርስቶሳን ካሃንዳራ፥ ያይቆባ፥ አላም ዳርኣንቴን ኦግታን ኣኒ ቶሞንኮ ላማዉን፦
ኖጎዳ እስኑን ሀሌቶ። ማቶ. 13፡55፤ ማር. 6፡3፤ ኦፋ. ፈ. 15፡13፤ ጋላ. 1፡19።
ራኮ ኦሮ ካዶትሳሮ አማኖና ቃሩማ
2 አቢላልቴ፥ ካለካለት ራኮ እስን ጎጌተ ኦአቲ ገጌሎ ኣን ቶታ፤ 3 ኣላንቲና አማኖክስንኮክ ጫፋማኖ ኦብስ ስሳኖ ካሳንዋ። 4 ኮና ካኮንሀንቃኖን ቁሉኒዕና ካመን ዱባ ልኪኒዕና ኦአማጋንቴን ጎጎሌታኑን ኦብስ ፈሎኦትሴ ሀፈልቶ። 5 እስንኮ ማዮና ቃሩማ ጎሀንቅካተ፥ ሀቱፋኖን ዱባን አዳ. ካስሳሮ ዋ ሀኤባቶ፤ ኡሱና ስሳምሮዋ። 6 አየሱን ጎአመን ሀሄዳኖን አማኖ ሀኤባቶ፤ ኣላንቲና ካሄዳታራ እባዶ አንባል ካአኢሳቶና ካከያሮ ጋሽማሎ ካበከ አንያ። 7 ሀሱ ኣንክክ እባዶት፥ ጎታኮ ኮኮ ኮ ሄላይናራ አም አሮሄዳኖ። 8 ኡሱ ቆፋ ላማ ካአባመና ራከሳ ዱባ ሀጋቶላ ካላልአማሮያ።
ህየሳክ እባዶትና ዱረሳክ እባዶት
9 ባሪሳኖይ ካኮንየራተራን አቢ ዋ ጦቂ ማንኮኢሳሮ ማራን ሀገጌላቶ። 10 ዱሩማ ታእባዶ ዳራራ ታኤሰ ኣን ማንኮኡባቶ ማራን ባሪሳኖይ ጦቂ ካአመ አቢ ዋ ባሪሳኖይ ጎየራሰና ሀገጌላተ። 11 አርት ጉባኖኮ ካከይ ፉርሳይ ኤስ አንጋግሳታ፤ ዳራራና ኡባታ፤ ምዲና ባታ፤ ኡሱማለና ዱረሳክ እባዶት ፈሎኦቴሳ ሀጋቶላ ራንካ ባራ። ኢሳ. 40፡6-7።
እባዶ ጉት ታግያቶ ጫፍቲ
12 ጫፍቲ ኦሮ ካአታታራ እባዶት ካሶማሳመያ፤ ኣላንትና ጫፍቲ ካኮዳንዴ ጎራታ ዋ ኦጌላታሮን ታስሰሮ አብዲ፥ ካግር ካላቻ ሄላይናራ።
13 ማዮና ጎጫፋመ፥ “ዋ እን ጫፌ” አሮኣሞ፤ ኣላንትና ዋ ሜላነይ ላኮጫፋማሮ፤ ኡሱ አደ ማዮና ላኮጫፋሮ። 14 አየሱን ጎአመን መተመተይ እባዶ ካኮጫፋማራ ካሜላነ ሀልቻኬሳ ጎቦጃምሮና ጎሶባምሮያ። 15 ሀልቻና ካኮጂናሮ ጎራታ ጩቦ ኡሙላራ፥ ጩቦና ካኮጂናተ ጎራታ ጎይ ኡሙላራ።
16 ኦጌላንቴን አቢላልቴ፥ አሮሶባንቴን። 17 ካእዳን እላቦና ዱዶኒዕ ሶማ ዱባ ዋኮያን፤ ህክና ካኤመታራ ሆስንደ ኣን ማራሙራ ጎርቱን ኢግልሳማ ካኮግኖን ካኢፋ ኦዶ ዋኮያ። 18 ዋ ኖ መጣ ዱባኮ ኦሆሬ ጎጎሌኖን ፈኢቴሳ ካሩም ሃፉራ ኖ ኡሙለ።
ካማሌን ፈሎ ጉት ሀይሳኖ
19 ኦጌላንቴን አቢላልቴ! ሂካ ሻዳ፤ እባዶ ዱባ ማልን ካጀጀሬ፥ አዬስን ካእስላተ፥ ኢኦኮና ካኦብሴ ሀሌዎ። 20 እኦ ኦእባዶ ቁሉማ ታዋ ላኮኬናራን። 21 ሃንሱን ባቶዋኖና ሜላነኮክ ጂናን ትራየንዴነ ኔፎትስን ፋይስን ካዳንዳሮ፥ ዎዳናታትስን ካꬋባተሮ ሃፉራ ኢዳነ አታዬን።
22 ሃፉራኬሳ ካአማሮ ፈላ ኳሬ ካማላሮ ካላ ልዴነ እስኦትስን አሮሶባቴን። 23 ሃፉራኬሳ ካማላራ፥ አየሱን ጎአመን ካአማሮ ካኦራኖን እባዶት በቤድቴሳ ዳዉኢቲ ካድያታሮ እባዶ አንያ። 24 እስኦቴሳና ድያተ ሴታራ፥ ጎርሰዋ መ ኣን ላሮ ኢሎታራ። 25 አየሱን ጎአመን ባልቹማ ካቤሳሮ ልክኪ ሴራ ዴረ ካአታታራ፥ ካማለሮ ካፈላራና ካኢሎኖ እባዶ ፈሎኦቴሳ ካሶማሳመ ላራ።
26 ህኢቴሳ ሀኦራኖን፥ ዎዳናቴሳ ሽርሳታ አማኖ አባ ካአማራ እባዶት፥ እስኦቴሳ ሶባታራ፥ አማኖኬሳኮኒዕ ፈሎና ላኦ ካላይኒዕያን። 27 ዋ ኦዶይ ሆረ ካሙጭመና ሜላነ ካላይክ አማኖ ሂካያ፤ ኦዶና ኣና ኦኮንጎየራን ይንሳ ኤንተርጆል ካኮንጎየሮ ሄለል ራኮትሶይ ጋርጋራኖና አላምኮክ ባትናትኮ እስ ኦራታኖያ።