ያንሳ ካጻፈሮ
ጎታካንክ ካየሱሳ ክርስቶሳ ዎንጋላ
ታባኖ
ካያንሳ ዎንጋላ የሱሳ ካኮቱሳራ እባዶ ሌ እባዶ ኦሮ ካሙተሮ አርዶክ ሃፉራ ካዋ ላኖ ቱስንያ፥ ማጻአፋ መተኬሳይ ጎጎቱሳሮ ሂክ ዎንጋላ ካኮንጻፋመራ ኦናባባራን የሱሳ ካፋይሳሮ ል ኤመይናራ ካአማመረ ኤረ ካዋ ላኖ እሶ ጎጎአማናዉና ኡሱ አማናኖኮት ኣላንቲ ጅሩ ጅሮማክ ግር እሶን ካግሮ ላኖ ጎጎአዴስራዉንያ (20፡31)።
ዎንጋላ ታሆራርጄ ባንኤ ጅሩ ጅሮማክ ሃፉራ ካዋና የሱሳ ራቶ እሶ ኮ ላኖ ታባኖ ኣን ቱሰ አባባተረ የሱሳ ካፋይሳሮ ል ኤመይናራ ካአማመረ ኤረ ካዋ ላኖ ካቱሳሮ ካለካለክ ባሳክ ማላታል ቱሳራ፥ ኤሰኮ ሂካ ባሳክ ማላታልኮ ምስት ላኦ ሄላንተቶ ታቱሳቶ ጅርት ማለ ግራናን፥ ህት ባንኤ ታማማካታ እባዶ ኮኮ የሱሳይ አማኔረ ኡሱ ዴበ ኦሰሰታራን ላኖኮክ ጋራ፥ ኦካለ አደን ኡሱ ምሲ ኔባተራና እሶ ኡሱ ላኮአማናኖ ጎጎአሜራን ማሌያ፥ ፎልሲ 13-17 የሱሳ ታኮአባመረ ሄመኒ ኡሱኮ ኦአጋልሳታራነ ዎታ ኤክ ግታት ታአቲ ኤሴላ ኡሱ አባናየና ሱዋማኖኮ ሆረነ ካእስኤካሳታኖና ካጎጎኢና ሃፉራ ኡሱ እሶን ማልስሳኖ እሶ አዬሳራን። ካጋቾ ፎልሲጆል አባማኖ ካየሱሳኮክ ጋራና ፍርዳዉን ሆረ ኣላኖ፥ ሱዋማኖኬሳና ጎይኮ ክያኖኬሳኮክ ጋራ፥ ኡሱማለና ጎይኮ ክያኖኬሳኮ አባባተረ ኡሱኮ ኦአጋልሳታራዉን ሙታኖኮክ ጋራ ኦቱሳራንያን።
ያንሳ ጋራ ካየሱሳ ክርስቶሳነ ካሄላማሮ ጅሩ ጅሮማክ ግር አዴስሰ ካኮንቱሳራ ህት ስኖ ሂታኮ ሆረንባን የሱሳ ራ ኣን፥ ሩም ኣን፥ ግር ኣን የላቴረን ኦአታታራዉንያ። ዎንጋላ ካያንሳ ካለክ ካየላራ ሩምጆል ካአያና አጋልስስን ኦጌሮመራና ባርሳኖ ኦህታርቴቱን ላኦ ኦአታታኖ፥ ሂካ አማኖና በከ፥ ባቦ፥ ኢፋ፥ ካፎፌ፥ እዳድ፥ አካክልተ ካዎይኒና ኢል ታዎይኒ ሂካ ኣንክክ ኮኮጆል ማሱሳ የል አታኖያ።
ራቶ ሂክ ማጻፋ ካአበራ
ቆፋ ታሆሬ 1፡1-18
ካጣማቃሮ ያንሳና ኦሆራርጄ የሱሳኮ ኦአጋልሳታረን 1፡19-51
የሱሳ ሀንዳኖኬሳ ሀጋአባኖ 2፡1—12፡50
ኢየሩሳለምና ጎቦብክሴይ ካጋቾ ሀንዳኖኬሳኮክ አርጆል 13፡1—19፡42
ካጎታ ጎይኮ ከያኖና ኡሱ ኦአጋልሳታራዉን ሙታኖኬሳ 20፡1-31
ጉድሳኖይ፥ ጋሊላይ አድአድ ኡሱኮ ኦአጋልሳታራኑን ሙታኖ 21፡1-25
1
ሃፉራ ካግር
1 ሆራርጀ ሃፉራ ግረ፥ ሃፉራና ዋ ዶሌ ግረ፥ ሃፉራና ዋየ። 2 ኡሱና ሆራርጀ ዋኔታ ግረ። 3 ካመን ዱባና ኡሱ ቶንሴ መጣመ፥ ካመጣመሮ ዱባኮና ኡሱ ካላይ ካመጥታመራ ኮና ላግሮ። 4 ኔፎ ኡሱ ግቴ፥ ህት ኔፎና እባዶን ኢፋቴ። 5 እፋና ሙጉዲ ሀንቃራ፥ ሙጉድና ላኮአዎዳሮ።
6 ዋኮ ካፋራመራ ያንሳ ካአማማረ እባዶት ኮ ግረ። ማቶ. 3፡1፤ ማር. 1፡4፤ ሉቃ. 3፡1-2። 7 እባዶ ዱባ አቶናትኬሳ ማልረ ጋራኬሳነ ጎጎአማንሮን፥ ኢፋ ማራን አቶ ሊን ኤመተ። 8 እፋ ማራን አቶ ሊን ኤመተራ ኳሬ ኡሱ ኡሱን ኢፋ ላኮየ። 9 እባዶ ዱባን ኢፋ ካስሳሮ ካሌራ ካሩም ኢፋ አላም ቶስ ኤመታ ግረ።
10 ኡሱ አላም ኦሮ ግረ፥ አላም ካኮመጣመራ ኡሱ ጎሌና፥ አላም አደ ኡሱ ላኮአዴሰረ። 11 ካኬሳ ካሌሮ ቶስ ኤመተ። ፋልኬሳና አደ ኡሱ ላኮአታተሮ። 12 ሀሌዎ ኳሬ ኦአታቴራዉና መገኬሳ ኦአማናራን ዱባዉን አደ ኤረ ካዋ ታኮሌራን ፈኢ ስሰራ። 13 እሶና ዋኮ ኡሙላሜናን ኳሬ፥ ታኢገ ጎርቱን ታሶየ ፈኢ ጎርቱን ታባባር ፈኢኮ ላኮኡሙላመራን።
14 ሃፉራና እባዶ ሌ፥ ስኖና ሩም አማጋመ ኖ ኦሮ ባሬ። ኣቦኬሳ ዶለኮ ካኤመተሮ፥ ኤረ ኮኮት ካባጃ ኖ ዴነ።
15 ያንሳና፥ “እንኮ ሃሬ ካኤመታራ እንኮ ሆረነ ማንኮ ግረ ማራን እንኮ ሮራራ አመ አን ካኮንአቶታረ ሂካኑንያ” አማ እዬ ኡሱ ማራን አቶቴ።
16 ስኖተሳ አማጋማኖኮ ካከይ ኖ ዱባና ስኖ ጉት ስኖ አታኔና። 17 ዋ ሴራ ጋራ ካሙሴነ ስሰረ፥ ስኖና ሩምና አደ ጋራ ካየሱሳ ክርስቶሳነ ኤመተ። 18 ሱረዋና ዋ ካዴራ ማዮና ላግሮ፥ አየሱን ጎአመን ዋ ኦዶ ዶሌ ካግረ ኤረ ኮ ካሌራ ሄዶ ኡሱ ኖን አዴስሰ።
ካጣማቃረ ያንሳኮክ አቶናት
(ማቶ. 3፡1-12፤ ማር. 1፡1-8፤ ሉቃ. 3፡1-18)
19 አይሁድና፥ “አት አዮታ?” አም ጎጎሆሳራዉን ቱቃሞልና ዎዩል ኢየሩሳለምኮ ኡሱ ቶስ ካኮፋራነን፥ ጎራታ ያንሳ ካስሰራ አቶናት ሂካየ።
20 አቶታኖኮና ሃር ላኮጋለ፤ “አን ክርስቶሳ ላኮዮ” አመ አዴስሰ አቶተ።
21 እሶና፥ “ሀያ አት አዮታ? ኤላሳታ?” አመን ሆሳተን። አዳ. 18፡15፤ 18፤ ሚል. 4፡5።
ኡሱና፥ “ላኮዮ” አመ።
እሶና፥ “ሀያ ካሄገሮታ?” አመን። ኡሱና፥ “ላኮዮ” አመ አባበ።
22 እሶና፤ “ሀያ አት አዮታ? አት ካፋርተተ እባዶን አባብ ኖ ጎጎስንሶ እስ ኦታዉን መማታ?” አመን። 23 ያንሳና ካሄገሮ እስያሳ ጎጎሰጋመሮ፥
“ጎታዉን ራ ‘ኤካሳ አማ
ቃሉላቶክ ኡሊ ታእያተ ያየ አንያ’ ” አመ አባበ። ኢሳ. 40፡3።
24 ፋራሳውልኮ ኦፋራመራና፥ 25 ሃና አመን፤ “ሀያ ክርስቶሳ ጎርቱን ኤላሳ ጎርቱን ካሄገሮ ጎሌኖን ሙን ጣማቃታ?” አመን ሆሳተን።
26 ያንሳና፥ “አን በከ ጣማቃራ፥ እስን ካካሶና አደ እስን ኦሮ አሌራ አመ አባበ። 27 እንኮ ዳንበኔ ካኤመታራ፥ አን ከፈሮ ኦቴሳኮክ ሻኖ ፉርን ካኮዳዴኖን ኡሱያ።”
28 ሂክ ዱባ ካሌራ ያንሳ ጣማቃ ታኮግረ ዮርዳኖስኮ፥ ጋማ ታብታንያ ካታማይየ።
እዳዶ ካዋ
29 ያንሳ ታላም አሪ፥ የሱሳ ኡሱ ቶስ ካኤሜታሮ ዴረ ሃ አመ፥ “ሂክማ! አላምኮክ ጩቦ ካባሳራ ኢዳዶ ካዋ፥ 30 ‘እንኮ ሃሬ ካኤመታራ እንኮ ሆረነ ማንኮ ግረ ማራን እንኮ ሮራራ’ አን እስኑን ካአማረ ኡሱያ። 31 አን መተኬዉን ላኮማላበረ፥ በከ ጣማቃ ካኤሜየራና ኡሱ እስራኤል ኦሮ ጎጎሙትሮንያ” አመ።
32 ኤሰኮና ያንሳ፥ “አያና አራበ ኣን ዳሩርኮ ዳገረ ኡሱ ጉት ሀማጻ ግራን ዴ። 33 አን መተኬዉን ላኮማላበረ አየሱን ጎአመን በከ ጎጎጣማቅሮ ካፋረራና፥ ‘አያና ቁሉክ ካጣማቃራ፥ አያና ዳጋና ኡሱ ጉት ሀማጻ ካሙታራ ኡሱያ’ አመ። 34 አንና ሂካ ዴራ፥ ኡሱ ኤረ ካዋ ላኖ አቶትናራ” አመ አቶናት ስሰ።
ኦሆራርጄ የሱሳኮ ኦአጋልሳታረን
(ያን. 1፡40-42፤ ማቶ. 4፡18-22፤ ማር. 1፡16-20፤ ሉቃ. 5፡2-11)
35 ታላም አሪ ያንሳ የሱሳኮ ኦአጋልሳታረን ላማነ ዎታ ኤሰ ባንኤ አሌ ግረ፥ 36 ያንሳ የሱሳ ኤሰነ ሮራ ግራን ዴረ፥ “ሂክማ ኢዳዶ ካዋ!” አመ።
37 ላማ ያንሳኮ ኦአጋልሳታረና ያንሳ ሂካ አዬሳ ግራን ማሌረን የሱሳ ዴበ ሰሴተን። 38 የሱሳና ካማባል አመረ ኡሱ ዴበ ኦሰሴታራን ዴረ፥ “መ ዶታታን?” አመ ሆሳተ።
እሶና፥ “ራቢ፥ ሀጌ ግታ?” አመን፥ [“ራቢ” አማኖ ካአጋልስሳሮ አማኖያ።]
39 ኡሱና፥ “ኮዬን ዲያ” አመ። “ሃንሱን ሴተረነ ኡሱ ማንኮግሮ ዴን፥” ኤሰርና ኡሱ ዎታ ሀዬን፥ አሪኮና ሳቲ ቶሞንክ ጎራታ ሌ ግረ።
40 ያንሳ ካአዬሰሮ ማለን፥ የሱሳ ዴበ ኦሰሴታረን ላማኮ ኮ ካስሞና ጴጢሮሳኮክ አቢ እንድራሳ ግረ። 41 እንድራሳ ሆራርጀ አቢኬሳ ስሞና ሄለረ፥ “ኖ መስህ ሄላነና” አመ፥ [“መስህ” አማኖ ክርስቶሳ አማኖያ።] 42 የሱሳ ቶንሳ ኬነ። የሱሳና ዴጉረ፥ “አት ካዮና ኤረ ስሞናታ፥ ከፋ አማም ኡማምናታ” አመ፥ “ከፋ” አማኖና ጴጢሮሳ ጎርቱን “ኤኤሞ” አማኖያ።
የሱሳ ፍልጶሳና ናትናኤል ጎጎኡመሮ
43 ታላም አሪ፥ የሱሳ ጋሊላ ቶስ ሴይን ጎሳተ፥ ፍልጶሳና ሄለረ፥ “እን ዴበ ሰሴና” አመ። 44 ፍልጶሳና እንድራሳ ጴጢሮሳ ኣን ካቤተሳይዳ ካታማኮክ እባዶትየ። 45 ፍልጶሳ ናትናኤል ሄለረ፥ “ሙሴና ካሴራ ማጻፋይ፥ ካሄገሮልና ኡሱ ማራን ካኮንጻፌረን ካዮሴፋ ኤረ ካናዝረት የሱሳ ሄላኔና” አመ።
46 ናትናኤልና፥ “ናዝረትኮ ካእዳንክ አየስ ሄላምን ዳንዳራ?” አመ። ፍልጶሳና፥ “ኤሜዴ ዴና” አመ።
47 የሱሳና ናትናኤል ኡሱ ቶስ ካኤሜታሮ ዴረ፥ “ሂክማ፥ ሜላነ ካላይክ ካሩም እስራኤልት” አማ ጋራ ኬሳ አዬሰ።
48 ናትናኤልና “አት እን ምሲ አዴሰ?” አመ የሱሳ ሆሳተ። የሱሳና፥ “አት ጋ ካባላስ ሄገሊ ግራን፥ ጋና ፍልጶሳ ኩ ሀኡሞን ግራን አን ኩ ዴራ” አመ አባበ።
49 ናትናኤልና አባበረ፥ “ካአጋልስሳቶ! አት ኤረ ካዋታ፥ አት ካእስራኤል ዎኖታ” አመ።
50 የሱሳና፥ “አት ካአማንተታ፥ ካባላስ ጋ ሄገሊ አን ኩ ዴራ ማንኮ አመሮ ማራንያ? ጋና ሂካኮ ካሮረ አየስ አት ዴታ” አመ።
51 አደና፥ “አን ሩምና ሩምና አማራ፥ ዳሩር ባናንተደ፥ ኤርግቻ ካዋ ኤረ ካእባዶ ጉት ኮራታና ዳጋ ግራን ድናታን” አመ። መጣ 28፡12።