1 የሱሳ ኡሱኮ ኦአጋልሳታራነ ሃ አመ፥ “ዱረሳክ እባዶት ኮ ሀዳራ ካአቦ እባዶት ኮ አባናየ፥ ሂክ ኦዶ ሀዳራ ዱሬሳትኮኒዕ ኡራዎ ዳርአኖኮክ ኦዱ ሂካ ዱሬሳት ጌተ። 2 ሃንሱን ዱሬሳት ኦዶ ሀዳራ ኡምስስጉረ፥ ‘ሂክ አን ካማላራ መያ? ጎርታ አት ኢን ኦዶ ሀዳራ ሊን ማንኮዳንዴኖን ማራን፥ አት ኦባሪሳተ ኡራዎኦት ካኮቶታምናራን ማዝጋባ ኢን ሀጋስስ’ አመ።

3 “ሀዳራ ካአባናየክና ዎዳናቴሳ ሃ አመ፥ ‘ጎታካክ አን ሀዳራ ማንኮአቦኮ ኢንዳግስናራ አማራ፥ ኦታይን ሁና ላኮአቦ፤ ኤባታኖ አደ እን ሙሊሳራ፥ ሃንሱን ምስ የላ? 4 አን ሀዳራ ማንኮአቦኮ ካኢግልሳመ ጎሌ እባዶ ምንካክሶይ እን ጎጎቆጳሮ አን ካየልናሮ ካሶዋ።’

5 “ሃንሱን ታጎታ አንዛ ካአቦ እባዶ መተ መተ ኡመጉረ፥ ካሆራርጄ እባዶትና ‘ጎታኬት አንዛ ኤግታት አብታ?’ አመ።

6 “ ‘ኡሱና፥ ዛይቲ ቶሳ ቦል አባ አመ።’ ሀዳራ ካአባናየክና ካዉሊ ዎራቃታካ ሂክማ አታ፥ ሳም ሀማጺደ ‘ቶሳ ኮንቶም አም ጻፍ አመ።’

7 “ኤሰኮና ካካለኔ፥ ‘አትደ ምያ አብታ?’ አመ። ኡሱና፥ ‘ጉል ኮንቶም ዳርጋማ አባ አመ።’ ሀዳራ ካአባናየክና፥ ‘ታኣማኣየ ዳብዳበታ አህአይ ጉል አፋርታም’ አም ጻፍ አመ።

8 “ጎታኬሳና አማኖ ካኮንሀንቃተሮ ሀዳራ ካአቦ ቃሩማቴሳዉን ሳድሰ፥ ህክና እባዶ ካዋኮ ሮረን ሂካ አላምኮክ እባዶ ባርሳኖ ኦአላሚ ቃሮሌ ላኖ ቱሳራ። 9 ሃንሱን አን እስኑን ሃ አማራ፥ ሂካ አላምኮክ ማራጋደ ካኮጉዳተ ጎራታ ጅሩ ጅሮማክ ምን አታማኖ ጎጎግሮን፥ ሂካ ማራጋዴ እስን ኦጌላታራን እስኦትስኑን ኤካሳየን።

10 “አየስ ክጫርኪን ካአብዳመ ካሌ ካንጂንክና አብዳማራ፥ አየስ ክጫርክ ካአብዳሞን ካንጂንክና ላኮአብዳማሮ። 11 ጎርታ፥ ሂካ አላምኮት ዱሩማ እስን ጎአማናሞን፥ ታሩም ዱሩማ አዮያ ሀዳራ አም እስኑን ካስስናራ? 12 ካካለ እባዶኮት ዱሩማ እስን ኦአማናሞን ጎሌተን፥ ታትስን ታሌተቶ ዱሩማ አዮያ እስኑን ካስስናራ?

13 “ኮይክ ጎታ ላማ ሀንዳይን ካዳንዴራ ማዮና ድይ ላኮግሮ፥ ኮ ዲደጉረ ካካለ ጌላታራ፥ ጎርቱን ኮይ ጋባላማራ፥ ካካለና አደ ቱፋታራ። ካዋና ካማራጋደ ድይ ሊን ላኮዶትሳሮ።”

14 ማራጋደ ካጌላታረ እባዶ ካፋራሳው ሂካ ዱባ ማለረ የሱሳን ቃጭፋተ። 15 ኡሱና እሶነ ሃ አመ፥ “እስን እባዶ ሆረ እስኦትስን ቁሎለ ኦየላታንታን፥ ዋ ጎአመን ዎዳናታትስን ካሳ። እባዶ ዶሌ ካካባጃመ፥ ዋይ ሆረ ካቱፋመያ።

16 “ሴራ ካሙሴና ካሄገሮልኮክ ማጻፋና ታ ያንሳ ጌሮ ሰጋማ ግረ። ኤሰኮ አባባተረ አደ ዎኖናት ካዋ ካገጌሎ ላላባምናራ፥ እባዶ ዱባ ኤሰራ ታብን ለላምናራ። 17 አየሱን ጎአመን ሴራኮ ኤጋኖ ኮ ኢያኖኮ ዳሩርና ኡልና ጎሮሬን ኤነ ሌራ።

18 “ኦርቴሳ ከልክ አመ ቤሰጉረ ታካለ ካአታታራ ዱባ ሻርሙጣራ፥ ኤንተርኮና ታቤተቶ ካአታታራ ሻርሙጣራ።”

19 አደና የሱሳ ሃ አመ፥ “ሄላ ቡራቡረ አዉኣሎክ ሳርስ ካሳርሳተረ አርጌቶ ባርሳኖ ኦኢዳኒዕና ገጌሎይ ካግረ ዱረሳክ እባዶት ኮ ግረ። 20 ኤሴና፥ ሜጋ ማር ዱባ ካኮኤልተተ አላዛር ካአማማረ ህየሳት ኮ ኡሱ ዱረሳክ እባዶትኮክ ጎጫ ሆረ ከነን ካረን። 21 ዱረሳክ እባዶትኮት ዱጉድኮ ታኢያቶ ኦሮንት ኣምን ሀልቻ ግረ፥ ከሮርና ኤመተጉረ ሜጋታቴሳ ሄለፋታ ግረ።

22 “ሂክ ህየሳት ጎየ፥ ኤርግቻልና አብራመ ቶስ ጌሰን። ዱረሳክ እባዶትና አደ ጎየ ቃማላመ። 23 ቦዋ ኦሮና አቦሳማ ግራን ጦቂ አመረ ኤባ አብራመ ዴ፥ አላዛርና ዶሌ ካአባተሮ ዴ። 24 ኡሱና፥ ‘ኣቦክ አብራመ፥ ነኔኤይሳና፥ አን ሂካ ላጫ ማንኮአቦሳማሮ ማራን፥ አላዛር ፈርቴሳት ብርጠ በከ ድንረ ኤሬብኬ አምባል ጎጎየሎ ማጋኔ ፋር አማ እዬ።’

25 “አብራመና አደ ኡሱነ ሃ አመ፥ ‘ኡኑኬ፥ አት ግርካ ካኡሌቲ ካእዳን ኮኮ ጎጎአታተቶ፥ አላዛርና አደ ካሜላን ኮኮ ካአታተሮ ሻድ፥ ግዳ አደ ኡሱ ህታኒ ጎጌላሮ አት አደ አቦሳ ጉት ግታ። 26 ሂካ ዱባኮ ሂታኮ እስን ቶስ ሮርን ኦዶታታራን ኦዳንዴኖን ላኖ፥ አንትነ ኦግራና አደን ኖ ቶስ ጎጎናቆንኮ፥ ኖየና እስን ጠኤ ላጋ ካአቲ ግራ።’

27 “ኡሱና ሃ አመ፥ ‘ኣቦኬ አብራመ፥ ጎርታ አላዛር ኣቦኬክ ምን ጎጎፋርቶን አን ኩ ኤባታራ። 28 አቢላል ከኖ ኢን ማንኮግቶ ማራን፥ እሶና ህታ ታአቦሳ ባንኤ ቶስ ጎጎኤመኖንኮ ሴይረ እሶ ሀአዴስሶ።’

29 “አብራመ አደ፥ ‘እሶን ካሙሴና ካሄገሮልኮክ ማጻፋጆል ኤሰ ግራን እሶና ሀማሌን’ አመ።

30 “ ‘ኡሱና፥ ኣቦክ አብራመ ላኮሃዮ፤’ ኦዶ ኮ ጎይኮ ኪጉረ ሴተዋ ጩቦኮ ጉላ ጋላሬንዋ አመ።

31 “አብራመና ‘ካሙሴና ካሄገሮኮክ ማጻፋጆል ኦማሎን ጎሌን፥ ኦዶ ኮ ጎይኮ ኪጉረ ጎሴተና ላኮአማናን አመ።’ ”