ካፋራመሮ ጳዉሎሳኮክ ሀንዳ
ካሮም እባዶ ቶስ
ታባኖ
ካፋራመራ ጳዉሎሳ ሀንዳ ካሮም እባዶ ቶስ ካጻፈራ ጳዉሎሳ ሮም ካግሮ ምን ካዋ ድን ሀልቻ ማንኮአባናየ ማራን እስኤካሳይ ጎጎኦራናዉን የልንያ። ካጳዉሎሳ ሀልቻ ሮም ካግሮ አማኒል ዎታ ጎራታ ክጫር ፈልጉረ ጋርጋርሳክሶይ ካስፌን ኡል ቶስ ሴዪንየ፤ አማኖ ካክርስታናኮክ ጋራ አዴሳና ክርስታናጆል ግርክሶይ ኦፈላራን ፈሎ ካክርስታና አጋልስስኮክ ጋራ ካለካለ ቤሰ ሰሰጋ ጻፈራ፥ ካጳዉሎሳ ሀንዳ ጋማ ካንጂን ካኮግራ ሂካ ሀንዳይያ።
ጳዉሎሳ ሮም ካግሮ ምን ካዋክ አማኒሉን ኖጎዳቴሳ ፋራመ አባባተረ እሶን ካኤባይናሮና አብድ ስሰ አባባተረ ሀንዳኬሳዉን መተ ታላቶ ቆፋ (1፡17) “ዋኮ ታሄላማቶ ቁሉማ አማኖይ፥ አማኖን ላኖ ዎንጋላይ ሙተራ” ካአማራ ሃፉራ ላኖ ቱሳራ።
ኤሰኮ ሆረንባን ጳዉሎሳ ህታ ቆፋዋ ባላኣሳ ጻፋራ፥ አይሁድና ሌረ አይዛብ ዱባ ጩቦ ሄገሊ ካባራሮ ማንኮሌ ማራን ዋኔ ዎታ ዎጋርን ዶትሳራ፥ እባዶ ዋኔ ዎታ ዎጋርን ካኮዳንዳራ የሱሳ ክርስቶሳ አማናኖይያ፥ ሂክ ዋኔታ ካጣባታራ ካኡሱብክ ራቶናትኮት ላኦ ግር ካኡሱብ ላኖ ጳዉሎሳ ባላኣሰ አጋልስሳራ። አማኒሉን ዋኔ ዎታ ኖጎዳ ግርቶዋ፥ አያና ካዋኮክ ጋራነ ጩቦኮና ጎይኮክ ሁናኮ ባልቹማ ቤሳራ፥ ፎልሲ 5 ታ 8 ጌሮ ጳዉሎሳ ሴራ ካዋና አማኒልኮክ ግሪ ካፈላራ አያና ካዋኮክ ሁና ሀልቻ መዮ ቱሳራ፥ ሂካ ዴበ ጳዉሎሳ ዋ ሳኒ ታእባዶቱን ካአቦ ሀልቻ ኦሮ አይሁድና አይዛብ ምሲ ኢንሴ ቁራናምን ዳንዳራን? ታአማማቶ ሆሲኑን አባብ ስስን እጻማራ።
አባበ ጳዉሎሳ ጎጎቱሰሮ፥ አይሁድ የሱሳ ሀአታኖን ሄሳኖ ሀልቻ ካዋያ፥ ሂክ ካሌራ የሱሳ ክርስቶሳኮክ ጋራነ ዋ ታቱሰሮ ስኖ ታፋይና ሳኒ ታእባዶ ዱባ ዎታ አቢንያ። ሀሌዎ ኳሬ አይሁድ የሱሳ ታኮአታራን አሪ ታኤሜይናቶ ላኖ ጳዉሎሳ አብዳታራ፥ ጉድሳ ጳዉሎሳ ካክርስታና ግር ምሲ ግርን ዶትሳሮ ካካለኮና ዋ ካአማናራ እባዶ እስእሲ ኦሮ ታግቶ ኤሴላ ራ ካጌላንጄ ሰሰዪን እሶን ካዶትሳሮ ላኖ አጋልስሳራ፥ ዋዉን ሀንዳኖኮክ ጋራ፥ ክርስታናጆል ኡልክሶዉና እስእስ ኦሮ ካአባን ኦዶናትና ታሳሙ ኣላንቲ ታከያቶ ሆሲኑን ካለካለ ቤሰ አጋልስሳራ።
ራቶ ሂክ ማጻፋ ካአበራ
ሂካ ማጻፋ መተ ታላቶ ቆፋ ቶስ ታባኖ 1፡1-17
ፋይና ኤረ ካእባዶዉን ካዶትሳሮ ላኖ 1፡18—3፡20
ካፋይና ራ ካዋ 3፡21—4፡25
ክርስቶሳ ካሄላማሮ ካኡሱብክ ግር 5፡1—8፡39
እስራኤል ሀልቻ ካዋት 9፡1—11፡36
ታክርስታና ያዳሊ 12፡1—15፡13
ጉድሳኖና ኖጎዳ 15፡14—16፡27
1
1 ካየሱሳ ክርስቶሳ ድይና ካፋራመሮ ሊን ካኡማመሮኮና ዎንጋላ ካዋቱን ዎዩ ካሌሮ ጳዉሎሳኮ ካፋራመሮ ሀንዳያ። 2 ሃንሱን ዎንጋላ ካሄገሮ ቶንሴ ቁሉክ ማጻፋይ ጣይተ ዋኮ አብድ ስሳንተታ። 3 ሂክ ዎንጋላና ኤረ ማራን ሶይ ሳኒ ታዳዉተኮ ማንኮሌዉን፥ 4 ቁሉክ አያናኬሳይ አደ ጎይኮ ክያኖኮክ ካአቲ ሁናይ ኤረ ካዋ ሌ ማንኮሙተ ማራን ጎታካን የሱሳ ክርስቶሳ ማራንያ። 5 ኡሱ ካክርስቶሳ መገይ አይዛብ ዱባ ጎጎአማኖና ጎጎአጃጃምሮን የልን ኡሱኮክ ጋራነ ካፋራመሮ ታየልስሶ ስኖ ኖ አታኔና። 6 እስን መተክስኑን ኦየሱሳ ክርስቶሳ ጎጎሌታዉን ዋ ኦኡመሮ ኦሮኮታን።
7 ዋይ ኦጌላንቴታና ቁሎለ ሊን ኦኡማንተታን ሮም ኦግታን ዱባን፥
ዋ ኣቦካን፥ ጎታ የሱሳ ክርስቶሳ ስኖና ኖጎዳ እስኑን ሀሌቶ።
ጳዉሎሳ ሮም ድን ካአባናየ ሀልቻ
8 ዱባንኮ ጣየ፥ አማኖክስን አላም ዱባ ማንኮማልሳመሮ ማራን እስን ዱባን አን ዋ ሄዶኬ ካየሱሳ ክርስቶሳ ጋራነ ጋላታራ። 9 አርጌቶ ኤብኬይ አን እስን ጎጎሻዳሮ፥ ካኤረ ዎንጋላ ላላባኖ ዎዳናኮ አን ካኮንሀንዳራ ዋ ኡሱ አቶኬያ። 10 አርጌቶ ኤብኬይ አን እስን ሻዳራ፥ ግዳ አደ ፈኢ ታዋይ አን እስን ቶስ ጎጎኤሜሮን ራ ኢን ጎጎባናምሮ ኤባታራ።
11 ጎጎአታታኑን እስን ካየሎ አያናኮክ እላቦ በለኤስ ስስንና ድን ሃልቻራ። 12 ህክና እስና አንና መተመተካን አማኖ እስእስኦሮ ጎጎአታኖንያ። 13 አቢላልቴ!*አቢላልቴ ካአማራ ሃፉራ አባላልነ አደረያ። አይዛብ ኦሮ ዋ ካአማናሮ እባዶ ጎጎሄላየሮ፥ እስን ኦሮ ኡሱማሌ ዋ ካአማናሮ እባዶ ሄላይን ዶተረ፥ አየሱን ጎአመን ካሞጋን ጎራታ እስን ቶስ ኤመይን ቆፔ ግራን፥ ግዳግን ገጋናዋትኬ ጎጎአዴሳኑን ዶታራ።
14 ካግርክ እባዶዉና ሌረ ኮና ካካሶቱን፥ ቃሮሌዉና ሌረ ኦሻዶቱን ዎንጋላ አጋልስስን አን አንዛ አባ። 15 ሮም ኦግታን እስኑና ዎንጋላ ላላብን አን ካኮንሀልቻራ ሃንሱንያ።
16 አን ዎንጋላይ ላኮሙላሮ፤ ህክና ሆራርጀ አይሁድን ደቤና አይዛብን ካአማናሮ ዱባን ሁና ካዋያ። ማር. 8፡38። 17 ዎንጋላይ ቁሉማ ታዋ ሙተታ፤ ቁሉክ አማኖ ግራራ አማመ ጎጎጻፋመሮያ፤ “ቁሉማና ሆራርጀኮ ታ ጋቾ ጌቶ ካኮሄላማታ አማኖ ካላልያ።”
ኤንገ ታዋ እባዶ ጉት
18 ሜላነይ ሩም ቡቄን ኦአበራን፥ ዋ አብስዋትትሶይና ሜላነትሶ ዱባ ጉት ኤንገ ታዋ ዳሩርኮ ኤመይናታ። 19 ጋራ ካዋ አዴሳኖ ካዳንዳማራ እሶ ዶሌ ካአዴሳመያ፤ ኣላንቲና ዋ እሶን አዴስሰራ። 20 አላም አሮመጣመኮ ሀጋአበጉረ ታሙቶን ያዳሊ ታዋ ህክና ጅሩ ጅሮማክ ሁናና ሄዶ ላኖኬሳ ኡሱ ታመጠሮ መጣ ዱባ ጉት ሙታራ፤ ሃንሱን እባዶ ካባሳሮ ባሱን ካኮኣላሮ ላኮአቦ።
21 እሶ ዋ ጎማላቤና ዱዶ ሄዶ ላኖኬሳ ላኮካባጄን፤ ጋላታና ላኮስሴን፤ አየሱን ጎአመን ያዳክሶ ኢል ካላይክና ታሻዶን ዎዳናትሶ ታዱደ ሌተ። 22 ቃሮና ጎአመና ጎዎሌ ሌን፤ 23 አርዶክ ዋኮት ካባጃ ካጎዋሮ እባዶና ክምብርጆል፥ ሱላለና ኡሊ ታግታማቶ መጣኮት ምዲ ኣን ካመጣመሮን ካባጃ ስሰን።
24 ሃንሱን ዋ ጩቦ ታአማጋንተቶ ዎዳናትሶኮክ ሀልቻ እስ እስሮ ማርክሶ ጎጎባቶይሳራዉን ቁሉማ ካላይት ኤሴላ ታሶየቱን ሮርሰ ስሰ። 25 ህክና ካኮንሌራ ሩም ታዋ ጣራ ማንኮኢግልሴን ማራን፥ ካመጠሮኮት ባንኤ ካመጣመሮ ማንኮሄዶይሳተን ማራና ማንኮሀንዳዬን ማራን፥ ካመጠራ ጅሩ ጅሮማን ካሶማሳመያ፤ ሀሚኒዕ። 26 ህታ ኣላንቲ ዋ እሶ ካሙሊስሮ ሀልቻክሶዉን ሮርሰ ስሰ፥ ሄሌልክሶና አደ ያዳሊትሶዉን ታዶትሳቶ ኤሴላ ያዳሊትሶ ታሌኖን ኤሴላን ኢግልሰን። 27 ኡሱማለና ባባር ያዳሊትሶዉን ካዶትሳሮ ሄለልኔ ዎታ ኤሰላኖ ኢሴንጉሬን እስ እስሮ ሀልቻ ካሶየቲ ጉባተን፤ ባባር ባባርነ ዎታ ሁዱረ፤ ኦሜላን ፈሎኦትሶዉን ታዶትሳቶ ሙሮ መተክሶይ ጉት ኬናተን።
28 ሂካኮና ካሮረ ያዳክሶይ ዋ ማላባኖ ላኦ ላኮአቦ አማኖኮ ካከይ፥ ፈልን ካንዶትሶን ጎጎፈላዉን ዋ ላኦ ካላይት ሳሙዉን ሮርሰ እሶ ስሰ። 29 ሃንሱን ባስ፥ ሜላነ፥ ጋጲጋጳኖ፥ ምጌ፥ ጢበ፥ ኔፎ ላጋዳኖ፥ ኤንጌ፥ ሶባኖ፥ ካሜላነ ሀልቻ ዱባ ኦአማጋሜራን፥ ኡሱማለና ኦሀማታራንያን፤ 30 እባዶ መገ ኦባሳራን፥ ዋ ኦዲዳራን፥ ኦሀባራራን፥ ኮራሜሳና ኢፍሳዶለያን፤ ሜላነ ካኮፈላራን ራ ኦዶታራን፥ ኦኡሙለራዉን ኦአጃጃሞን፥ 31 ኦሻዶን፥ ታአመን ኦፉራራን፥ ጌላንጀ ካላይኒዕና ሻጋ ካላይኒዕያን፤ 32 ሂካ ኦፈላራን ዱባን ጎይ ዶትሳራ፤ ካአማሮ ልክኪ ካሌሮ ሴራ ካዋ አዴሳ ግራን ሂካ አየስ ፈላኖ ካላል አንሌኖን ግራን ሂናኣ ኣኒዕኒዕ ፈሎ ካፈላሮ እባዶና አታይሳራን።