Ofarameeraankonɂi Felo
Tabano
Ofarameeran konɂi felo wongala kaluk'aasa debee os'aafameraanyan, mas'aafakokki metekki halchcha ohoraarjjee Yesuusa debee osessetareen Ayyaana K'ulluukkii k'ajeelireen garakkeessa kaɂayeesaro kageggeloo haafura, «Iyyerusaalemi, kayihuuda ul dubbaa, Samaariyayi, taa ulkotti gachcho geeroo» (1:8) wongala misii gambbayiseraan mammakiinya, mas'aafa kakiristaana ammano Ayihuudi orroo haggaɂabamere alami kagiro gosa dubbakki ammano taalleeroo misii balɂaatero taɂayeesatto jirttitta. S'aafiti, Waa kaɂammanara ibaaddo karoomi wonolaalkokki wono wononnatii k'anaatin orromare daba kafelaro ibaaddo laanawaattina kakiristaana ammano kaɂayihuudi ammano hank'k'inna kallayikki laano addeesisin tanjjiin is's'aamera.
Ofarameeraankonɂi felo, gara kayesuusa kaɂayeesara kageggeloo haafura takkogeyaaro banɂe goorata goorataa balɂaataa seetanona min kawaakki madaaramano otusaraan seeddo mete metenɂi,
1. Kakiristaana ammano kayesuusa daruur tos biyaanokko abbaabatere Iyyerusaalemi haggaɂabamanokokki gara.
2. Ul kaɂisiraɂeel dubbaa geeyaanokokki gara.
3. Ul karoomine adere labu tamedetiraanya gobobii kagiro ul dubbaa balɂaatano.
Ofarameeraan ofelaraan felo orroo gutii been omutaraan Ayyaana K'ullunɂikonɂi felo golleeraan tap'ent't'e k'ost't'e arri Iyyerusaalemi kagire amaniil gutii hunnaa dagano, usumalee mas'aafa orroo osessegaameraan felo dubba mutano Ayyaana K'ulluukki min kawaanna jaarsolee k'ajeelisanona ataayisano adara. Horkkooskko kayere sisamaa kagire kaɂammano handdaa kalekaleekki lallabaanoo orroo, kalekalee bee sisamera, ofarameeraan ofeleraan felo orroo feloo ohayeeraan felo handdaa giri kaɂamaniiliinna min kawaakki raattonati kagire hunna eeki gitakki kaɂatiiyo addeesisara.
Raattoo Hikki Mas'aafa Kaɂabera
Atonnatikkeessakokki ekkaatano 1:1-26
Yesuusa gudisaa kasisero ajajana abddi 1:1-14
Banɂe tayihuudayi Matiyaasa assaabamano 1:15-26
Atonnati Iyyeerusalemii 2:1—8:3
Atonnati ul kayihudaayinna ul kasamaariyayi 8:4—12:25
Kap'awuloosa faramanokokki handdaano 13:1—28:31
Tahoree faramanokotti seeto 13:1—14:28
Haganaa taɂiyyerusaalemi 15:1-35
Tallami faramanokotti seeto 15:36—18:22
Taseedi faramanokotti seeto 18:23—21:16
P'awuloosa taɂiyyerusaalemi katamaayi, tak'isaarya katamaayinna taroomi katamaayi shaamano 21:17—28:31
1
Ayyaana K'ulluukkin tasisanttetto abddi
1 Tewofiloosa! Kahoraarjje mas'aafakkeeyi Yesuusa kafelerona kaɂagaalssisero dubba ani kuun s'aafera; ani kakkoons'aaferana Yesuusa feloɂootteessa kakkohaggaɂabero gooratakko keesere 2 daruur tabeero arri taageeroo kafeleroya; daruur kakkobeerana oɂassaabatero ofarameeraawun Ayyaana K'ulluukkikokki garane ajaja isoon sise abbaabatereya.
3 Rakkoo tammooggankkona abbaabatere usu issii gabbalamere arddokki laano, hinɂanuun kamooggan atoyii addeesisaa arri afarttam orroo roore roore mutaa wononnati kawaakokki gara isoon segee. 4 Iso wotana babo aamin hamas's'ee giraan haɂame iso ajajee; «Iyyerusaalemikko aroobbeeten; ayesuun goɂameen ani ayeesaa giraan kamaaltteettaan odo tasisero abddi oorayeen. 5 Yaannisa bekeeyi t'ammak'aa gire; isin goɂameen arri uc'c'arkko abbaabayiddeen Ayyaana K'ulluukkii t'ammak'aaminattaan.»
Yesuusakokki daruur biyaano
(Mar. 16:19-20; Luk'. 24:50-53)
6 Isona raattoo kukkumeen giraan, «Gootta! Wononnati Isiraɂeelwun abbaab ati kakkoɂusubaayisinatta goorata giddaaya?» ameen hoosaten. 7 Yesuusana haa ame isoon abbaabe; «Odo odonnatikkessayi kamurtteeseero goratajool goorttun almmaal malabiin isin lakkodaanddeetan. 8 Ayesuun goɂameen Ayyaana K'ulluukki isin gutii kakkodage goorata hunna atayinattaan; Iyyerusaalemi, Yihuudaayinna Samaariyayi dubbaa, ulkotti gachcho taa geetanii atolkkee linnattan.» 9 Usu hikka ayeese abbaabatere iso diyaagiraan daruur bee; duumanchchana iltisookko golise. 10 Usu daruur tos biyaa giranttiin, isona tichchiseen diyaagiraan sarssi gumaarakki osarsatereen ibaaddojja lama derɂa isoo dollee aalleeren, 11 haanna ameen; «Isin ibaaddo kagaliila,» «Daruur diyaa hittanii kakkoonɂaalliteettaan mewuunya? Hikki isin dollekko daruur biyaa giranttii isin kaddeetettaan Yesuusa, daruur tos biyaa goggoddeetettaankki malee usumaleewwa abbaabayi emeeyinara» ame.
Yihuudakotti banɂee Matiyaasa assaabame
(Mat. 27:3-10)
12 Esekko abbaabatere zayitii kabiyaara gaa takkoɂalataro wodamikko Iyyerusaalemi abbaabateen seeteen, hitti wodami Iyyerusaalemikko tafoolssi arrii goggosesseerawun kasisamero raa gitakki fakki amatte. 13 Katamaa tos kakkotabeeren goorata kakkokukkuɂamareen fook'ii korateen; hinɂina P'et'iroosa, Yaannisa, Yayik'ooba, Indiraasa, Filp'oosa, Toomaasa, Berttelomeewosa, Matoosa, kaɂilfoosa ere Yayik'ooba ulkkeessawun kahaɂusataro Simoonana, ere kayayik'ooba Yihuudane gireen. 14 Hikki ibaaddo dubba heleel kookkoonne, Aaye tayesuusa Mayiraamenee, usumalee abbilaaltteessa wota wodana too leenguren ebi haɂiisooni arggetto ebaataa gireen.
15 Hassu goorata P'et'iroosa boolnna lamattan olleeraan abbilaal orroo kee aalleere, 16 «Abbilaalttee! Yesuusa kaɂabero ibaaddoon horehaye kak'ajeelisaro kalleero Yihuudakokki gara, Ayyaana K'ulluukki t'aye hiɂi tadaawutee kaɂayeesera kamaas'aafa haafura gudayin mankkodootisaro maraanya. 17 Usu nookko koo aani tootaamere hikka handdaawun lelledamanokokki iddilii helate gire ame.»
18 Hikki ibaaddoti felo omeellankotti muraayi ul iminate; hore hore iyye bebbeed ul oyere, t'eɂekko bogi berɂee hubbo bee ubate; 19 hikkina Iyyerusaalemi kagiro ibaaddo dubbaan maalssame; usu ulnna heɂittisooyi «Akeldaama» amame uumame, fureenna «Ul kaɂiigi» amanoya.
20 P'et'iroosana debee, «Kamazamuri mas'aafayi haa ame,
« ‹Usu takkogire banɂee halaal halleeto;
Esee kagirra ibaaddona aroohelamo;›
Adena
« ‹Odonnatikkeessa kakkalee haɂatato› amame s'aafamera.
21 Haannuun Goottaa Yesuusa no orroo takkosesseetaree arggetto noonne wota kagire ibaaddokko odo koo assaabamiin dootisara; 22 hikkina, kayaannisa t'ink'atakko haggaɂabere Goottaa Yesuusa daruur tabeero arri taageeroo noonne wota kagire hikka ibaaddokko koo noonne wota goyikko kiyaanokokki ato goggolleeroon dootisara.»
23 Haannuun Iyost'oosa goorttun Berssabaasi kaɂamamere Yoosefana Matiyaasane iso lama keenen; 24 Haa ameen ebaaten, «Gootta, ati ibaaddo dubbakotti wodana kassowa; hinɂa lama orrokko kaɂassaabattetto ibaaddo noon tusi. 25 Kakkoonɂebaatannana Yihuuda iise taseetero banɂetteessaa hikka handdaawunna ofarameeraankotti banɂe noon goggoshuumitonya.» 26 Esekkona it'aa beesen, it'aanna Matiyaasa beesse, usuna tomonkko koo ofarameeraane wota tootaame.