Kafaramero P'awuloosakkoki Handdaa
Kaɂefesooni Ibaaddo Tos
Tabano
P'awuloosa Kaɂefesooni ibaaddon kas'aafera handdaa dubbaankkona hore kinttib kakkosisara «Halchcha kawaa goggolleeroo daruurnna uliinna kagira met't'ajjool dubba isiɂaatire koo kakiristoosa odonnati hegelii tagirraan arri kakkogeete gorataayya» (1:10) taɂamatto k'ofaayiya. Adena Yesuusa Kiristoosane wota koo liigureen sannii taɂibaaddo dubba too goggolleeto hikka kaɂatii halchcha felooyi goggohayisiraanun gosa kashaadisaroyya.
Handdaa kaɂefesoonii tahoraarjjee banɂee s'aafiti raattonatikokki gara tahaggabero metetti k'ofa balɂaasaa, Waa odo gosakkeessa misii assaabatero, erekkeessa Yesuusa Kiristoosaa c'ubbokkisoowun haheso amamano helateeren misii iso balchchanɂi leeraan, kaɂatii kaɂabddii haafura kawaa Ayyaana K'ulluukkokki garane misii addeesamero tusara, tallami banɂee ade s'aafiti onabbabaraan raattokki girikisooyi Kiristoosaayi kaɂabaan raattonati karrummii goggolleeroo iso misii girin dootisaro shaadisara.
Ibaaddo Kiristoosane wota taɂabo esella misii raattonati abo kalekaleekki lefikko bee kaɂayeesamaro ayeesii mutera, min kawaa maar malee golleero Kiristoosa ade maarkokki mete maleeya, min kawaa gimbbe aani golleero Kiristoosa ade minuun mina afarruun metekki eɂemoyya, min kawaa oori malee golleero Kiristoosa ade entterya, s'aafiti gara kakiristoosane tamuttetto sino tawaa aaloo saadisaa kakkoɂayeesiro goorata golate kagiro ayees tusara, ayees dubba usu kakkodeyaara takiristoosa geelanjjee, jaarsso laanokkeessa, haheso amano, sinonna nogoddakokki garaneya
Raattoo Hikki Mas'aafa Kaɂabera
Tabano 1:1-2
Kiristoosana min kawaanna 1:3—3:21
Kiristoosaa kahelamaro giri kaɂusub 4:1—6:20
Gudisano 6:21-24
1
1 Feɂi tawaayi Yesuusa Kiristoosayi kafaramero P'awuloosakko, Yesuusa Kiristoosaa oɂabddameeraan,Ofa. Fe. 18:19-21.
Taɂefesooni katamaayi ogiraan k'ullooleewun,
2 Waa Aabbokkaani Goottaa Yesuusa Kiristoosakkotti sinonna nogodda isinuun halleeto.
Kiristoosaa ohelamaraan somma oɂayyaana
3 Daruurii ogiraan somma oɂayyaana dubbaa Kiristoosaa no kasommaasatera Goottakkaanikki Yesuusa Kiristoosakkokki Hedona odo kalleera Waa hagalataamo. 4 K'ulluunɂina tuffi kallayinɂi linne geelanjjee usu hore goggomunttoo alami hamet'amoon giraan horaarjje Kiristoosa no assaabe. 5 Feɂi tawaa taɂidan leetedde Yesuusa Kiristoosan yiis goggolleennon t'aye murttessee. 6 Hikkina kageelaamero erekeessakki garane dannabaa noon tasisero takabajaanttetto sino goggosommaasanttoya. 7 Sino tawaakokki ammagamanokko kakkeeyi erekkeessakki iigi wodoo leenenne c'ubbokkaanikkona haheso amamano helanne.K'ol. 1:14. 8 Sinotteessa k'arummana malabano dubba jiinase noon sise. 9 Waa anjjirettessaa Kiristoosakokki garane t'aye goggohalchcherokki malee feɂitteessatti hool goggoɂaddeensso yele. 10 Goorata goggee Waa felo gutii kahaayisinara halchcha daruurnna ulii taggitta met't'a dubba raattoo koo kakiristoosa odonnati hegelii goggogirttonya.
11 Ayees dubbana feɂitteessa kafelara Waa t'aye goggohedero malee kakiristoosakokki garane unatteessa goggolleennon no assaabera. 12 Hikkina kakkonlleera Kiristoosa abddi yelataa ohoree olleenenna kabaja tawaa galataanooyi goggotunssonya.
13 Isinna fayyinnakkisinkotti odu taɂidan kalleero haafura karrummii kakkomaaltteen gooratta Kiristoosa ammantteettaan, adena, usu isinuun sisin abddi goggosiseroo Ayyaana K'ulluukki attamantteettan. 14 Hikkina ayyaana kabajatessaawun galata goggogeeron Waa oottessa olleeraan dubbaan taa wodoo leeroo helayiin taginno rittittaaniwun k'abdoottaaniya.
P'awuloosa ibaaddo kaɂefesoonin ebaate
15 Haanssun Goottaa Yesuusaa isin kaɂabttan ammanona k'ulloolee dubbaawunna taɂabttaan geelenjje takkomaale arrikko haggaɂabere, 16 Ani isin ebii shaada isin maraan Waawun galata sisano lakkoɂiisero. 17 Kabajja kakkoondootisaro Goottakkaani kayesuusa Kiristoosakokki Hedo kalleero Waa aaloo goggoɂaddeessanun Ayyaana kawaakko talleetetto k'arummana muteen isinuun goggosisiroo ani ebaatara. 18 Isin misitti abddii uumantteettaanna k'ullooleel taɂeelinnara takabajjaa rittii eeggitatti tammooggantto isin goggoɂaddeessanun wodanatisinkkonɂi ilɂo goggodeenddenawun ani ebaatara. 19 No Waa oɂammanannoon dubbaankko kaɂatii kalleero hunnakkessa goggomalabttaanun ani ebaatara, hikki hunnana usu aani kaɂatii ataankkeessakki felooyi,Mez. 110:1. 20 Kiristoosaa goyikko keesere tadaruuree banɂee mina tamerggee hamas'isaa mutera. 21 Waa odo Kiristoosa daruurii merggetteessayi kahamas'iisera maamisikki k'alaadakkona odonnati hunnakkona Goottanatikko usumaleenna hikka kagiddanee gees kaalaal anlleennon kaɂemeeyinaro geesii golleenna mege dubbakko karooraro kakkabajaame mege sisanooyiya. 22 Waa ayees dubba odonnatikkeessa hegelii bariise, min kaɂebinna dubbaankko karooraro goggolleeroo mete yele shuume.Mez. 8:6. 23 Min kaɂebi kakiristoosa maarya, Kiristoosana min kaɂebiinna banɂe dubbaa kameen dubba kaɂammagaro ammagamanokkeessaya.K'ol. 1:18.