8
Yesuusa ammato oɂusubkokki katuuk'aamol woyichcha laano
1 Goortta no kaɂayeesinanno ayeeskko kahoree ayees hikkaya; daruurii kaɂatii kawaakkokki korffinjjeeyi mina tamerggee kahamas'eero hikka aankkikki katuuk'aamol woyichcha no abnna.Mez. 110:1. 2 Usu kakkohanddaara tarummi dunkkaanii talleetetto k'ulluukki min kawaayiyya; hikka minkokki madaaramano gene taɂibaaddoyi alleenon giraan Goottayiyya. 3 Metemeteeyi tuuk'aamolkokki woyichcha kakkoshuumamara mebaanna jaarsso Waawun sisiinya; haannuun hikki tuuk'aamo kasisinara kooko koo girin dootisara. 4 Seerakokki malee meebaa kasisara tuuk'aamol mankkogiro maraan usu ulii kagiro lii girewa tuuk'aamo lii lakkogirare; 5 Hikki tuuk'aamol takkohanddaraan dunkkaanii daruurii tagittowun masuussana hoos taalaaltta; hikkina kakkonlleera Waa Musene ati min kakkomadaaratto goorata, «Wodamii gutii ani kuun goggotuserokki malee kameen dubba isiɂoora feli» ame goggoɂajajeerokki maleeya. 6 Gidda ade Yesuusa Waayinna ibaaddonna t'eɂe tabe hiɂi too kayelero kaɂammatoo haafura oddoɂan ammatokko taroorttettona taɂidantti abddi gutii kat'aabbatero mankkolleero maraan usumaleenna usuun osisameeraan felo dubbaankko orooraraanyyan.
7 Ohoree ammato ohaafura otuffamoon lii gireenwa kallami kaɂammatoo haafura lakkodootisare. 8 Waa gosa gutii otuffamiraan felo girano tusin amere haa amara,
«Ani kaɂisiraɂeel gosanenna kayihuuda gosane wota
Ammato oɂusubkokki haafura kakkotabinnara goorata emeeyinnara amara Goottaa.»
9 Hinɂi ammato ani iso kagibs's'i ulkko genettisoo abere kakkobeesare goorata odojjolaalkkisoone wota otabere ammato aanɂinɂi lakkoyyan; isona hinɂa ammato ohaafurayi ataatana mankkowaateen maraan aninna isokko bagagole, amara Goottaa.
10 «Goortta ani hittakko abbaabayire kaɂisraɂeel gosane wota
ani otabinnara ohaafura ammato hinɂayaan amara Goottaa;
Ani seerakkee sammuutisini kayinnara;
Wodanattisooyinna s'aafinara;
Waakkisoonna linnara,
Isona gosakkee linnaraan ame.
11 ‹Goottaa addeesi› ami ollaatteessanna leere
Abbikkeessa maayyona kaɂagaalssisiro lakkodootisaro.
Kic'c'arkko haggaɂabere taa ibaaddo kajiinjjiin geeroo dubbana
In addeesirowa;
12 Baaskkisoonna haheso aminara;
C'ubbokkisoonna hittakko horenbbaan lakkoshaadinaro.»Erm. 31:31-34.
13 Goorttanun «Usubnɂi ammato ohaafura» goɂamiro ohaafura ammato ohoree laɂo osisoon yelera amanoya; haannuun felaa kagirena kaddoɂan kooko dubba kakkobayinnara goorata gabbalamera.