Handdaa Kayayik'ooba
Tabano
Hikki kayayik'ooba handdaa barsano ohittariteewun seera talleeto k'ofa kaɂabero golleero kakkoons'aafamerana alami dubbaayi darɂaantte tagitto tomonkko lama aaniiwunye; s'aafitina k'arumma felooyi noo kakkohayisinnanno malakokki gara, amaniilkokki k'op'atanonna yadaliikokki seera kalleero ayees addeesise misilii kaɂabo ayees roorisara. Hiyyummakokki garana durummakokki gara, c'aafitiikokki gara, amala kaɂidankokki gara, haɂusatanokokki gara, ammanokokkina taɂidan yadaliikokki gara, hiɂikotti idanena meellanekkokki gara, k'arummakokki gara, isiɂisirroo isidiidanokokki gara, koorakokkina anjjirekkokki gara, kakkalee gutii firddaanokokki gara, dhaadatanokkokki gara obssikokkina ebikokki gara, amaniil felin kadootisaro dubba kalekalee beese s'aafera.
Hikki handdaa amaniilkokki girii ammano felooyi tusanokokki gara aaloo addeesise tusara.
Raattoo Hikki Mas'aafa Kaɂabera
Tabano 1:1
Ammanona k'arumma 1:2-8
Hiyyummana durumma 1:9-11
C'aafiti 1:12-18
Haafura kawaa maalanonna felooyi hayisano 1:19-27
Ululisi goggoɂayeesonkko kasisamero seera 2:1-13
Ammanona feloo 2:14-16
Amaniilnna hiɂittisoo 3:1-18
Amaniilnna hikka alami 4:1—5:6
Kalekaleekki ayeeskkokki garaan kasisamero gorssa 5:7-20
1
1 Waawunna Goottaa Yesuusa Kiristoosan kahandaara, Yayik'ooba, alamii darɂaantteen ogittan aanii tomonkko lamaawun:
Nogodda isinuun halleeto.Mat. 13:55; Mar. 6:3; Ofa. Fe. 15:13; Gel. 1:19.
Rakkoo orroo kadootisaro ammanona k'arumma
2 Abbilaalttee, kalekaleetti rakkoo isin gogeete oɂatii geggeloo aani tootaa; 3 aalanttina ammanokkisinkokki c'aafamano obssi sisano kassaanwa. 4 Koonna kakkoonhank'k'annon k'ulluunɂina kameen dubba likkiinɂina oɂammagantteen goggolleetanun obssi feloɂoottisee hafeltto. 5 Isinkko maayona k'arumma gohank'katte, hattuffannon dubbaan adda kasisaro Waa haɂebaato; usuna sisamirowa. 6 Ayesuun goɂameen hahedannooni ammanoo haɂebaato; aalanttina kahedatara ibaaddo anbbal kaɂaaɂisattona kakkeyaaro gaashimallo kabekee aaniya. 7 Hassu aankkikki ibaaddoti, Goottakko kooko koo helayinnara ami aroohedanno. 8 Usu k'ofa lamaa kaɂabamena raakkessa dubbaa haggattola kalaalɂaamaroya.
Hiyyeessakki ibaaddotina dureessakki ibaaddoti
9 Bariisanoyi kakkonyeraateraan abbi Waa t'ok'k'i mankkoɂisaro maraan hageggelaato. 10 Durumma taɂibaaddo daraara taɂeese aani mankkoɂubaatto maraan bariisanoyi t'ok'k'i kaɂame abbi Waa bariisanoyi goyeraasena hageggelaate. 11 Arriti gubanokko kakkeeyi fuurssaayi eesii angagisatta; daraarana ubaatta; middina baatta; usumaleenna dureessakki ibaaddoti feloɂootteessaa haggattola raankkaa baara.Isa. 40:6-7.
Ibaaddo gutii taggiyatto c'aafitii
12 C'aafitii orroo kaɂataatara ibaaddoti kasommaasameya; aalanttina c'aafitii kakkodaanddee goorata Waa ogeelataroon tasisero abddii, kagiri kallachcha helayinara.
13 Maayyona goc'aafame, «Waa in c'aafee» arooɂamo; aalanttina Waa meellaneeyi lakkoc'aafamaro; usu ade maayyona lakkoc'aafaro. 14 Ayesuun goɂameen metemeteeyi ibaaddo kakkoc'aafamara kameellanee halchchakkeessa gobboojaamirona gosobamiroya. 15 Halchchana kakkojiinaro goorata c'ubbo umulara, c'ubbona kakkojiinate goorata goyi umulara.
16 Ogeelaantteen abbilaalttee, aroosobantteen. 17 Kaɂidan ilabona duuddonɂi somma dubba Waakkoyyaan; hikkina kaɂemeetara hoosindde aani maraamuraa goorttun iggilissama kakkoginnon kaɂifa odo Waakkoya. 18 Waa no met't'a dubbakko ohoree goggolleennon feɂitteessaa karrummii haafuraa no umule.
Kamaaleen felo gutii hayisano
19 Ogeelaantteen abbilaalttee! Hikka shaada; ibaaddo dubba maalin kajejjeree, ayeesin kaɂisilaate, iɂokkona kaɂobssee halleewo. 20 Iɂo oɂibaaddo k'ullumma tawaa lakkokeenaran. 21 Haanssun battowanona meellanekkokki jiinaan tirayenddeene neefottisin fayyiisin kadanddaro, wodanatattisini kadhaabbatero haafura idanee atayeen.
22 Haafurakkeessa kaɂamaro fela kuwaarre kamaalaro kaalaa liddeene isiɂoottisin aroosobatteen. 23 Haafurakkeessa kamaalara, ayesuun goɂameen kaɂamaro kaɂoorannon ibaaddoti bebbeedtteessa daawɂitii kadiyaataro ibaaddo aaniya. 24 Isiɂootteessana diyaate seetara, goorsewa me aani laaro illootara. 25 Ayesuun goɂameen balchchumma kabeesaro likkiikki seera deere kaɂataatara, kamaalero kafelarana kaɂilloonno ibaaddo feloɂootteessaa kasommaasame laara.
26 Hiɂitteessa haɂoorannoni, wodanatteessa shirsataa ammano aba kaɂamara ibaaddoti, isiɂoottessa sobatara, ammanokkeessakonɂi felona laɂo kallayinɂiyan. 27 Waa Odooyi horee kamuc'c'imena meellane kallayikki ammano hikkaya; odona Aanna okkoongoyeraan yiinssa entterjjol kakkongoyero heleel rakkoottisooyi gargaaranona alamikokki battinatikko isi ooratanoya.