Yaannisa kas'aafero
Goottaakkaanki Kayesuusa Kiristoosa Wongala
Tabano
Kayaannisa wongala Yesuusa kakkotusara ibaaddo lee ibaaddo orroo kamutero arddokki haafura kawaa laano tusinya, mas'aafa metekkeessayi goggotusaroo hikki wongala kakkoons'aafamera onabbabaraan Yesuusa kafayyisaro li emeeyinara kaɂamamere ere kawaa laano iso goggoɂammannawunna usuu ammananokotti aalanttii jiruu jiroommakki giri isoon kagiro laano goggoɂaddeesirawunya (20:31).
Wongalaa tahoraarjjee banɂee jiruu jiroommakki haafura kawaanna Yesuusa raattoo iso koo laano tabano aani tuse abbaabatere Yesuusa kafayyisaro li emeeyinara kaɂamamere ere kawaa laano katusaro kalekaleekki baasakki malataal tusara, esekko hikka baasakki malaataalkko misitti laɂo helanttetto tatusatto jirtti malee giranaan; hitti banɂe tammammaakatta ibaaddo kookkoo Yesuusaayi ammanere usuu debee osessetaran laanokokki gara, okkalee adeen usu misii neebaateraanna iso usuu lakkoɂammananno goggoɂameeran maleeya, foolssi 13-17 Yesuusa takkoɂabamere hemeenii usukko oɂagaalssataranne wota eeki gitatti taɂatii esella usu abanaayena suwaamanokko horeene kaɂisiɂekkaasatanona kagoggoɂinna haafura usu isoon maalssisano iso ayeesaran. Kagachchoo foolssijjool abamano kayesuusakokki garana firddaawun hore aallano, suwaamanokkeessana goyikko kiyaanokkeessakokki gara, usumaleenna goyikko kiyaanokeessakko abbaabatere usukko oɂagaalssatarawun mutanokokki gara otusaraanyan.
Yaannisa gara kayesuusa Kiristoosane kahelamaro jiruu jiroommakki giri addeesise kakkontusara hitti sino hittakko horenbbaan Yesuusa raa aani, rummi aani, giri aani yelateeren oɂatataraawunya. Wongala kayaannisa kalekki kayelara rummijol kaɂayyaana agaalssisin ogeerromeraanna barisano ohittariteetuun laɂo oɂatatanno, hikka amanona bekee, babo, ifa, kafoofee, idaad, akaakiltte kawoyiniinna il tawoyinii hikka aankikki kookojjool masuussa yeli aatanoya.
Raattoo Hikki Mas'aafa Kaɂabera
K'ofa tahoree 1:1-18
Kat'ammak'aaro Yaannisana ohoraarjjee Yesuusakko oɂagaalssatareen 1:19-51
Yesuusa handdaanokkeessa haggaɂabano 2:1—12:50
Iyyerusaalemiinna gobobkkiseeyi kagachchoo handdaanokkeessakkokki arrijjool 13:1—19:42
Kagoottaa goyikko keyaanona usu oɂagaalssatarawun mutanokeessa 20:1-31
Gudisanoyi, Galiilaayi adiɂadi usukko oɂagaalssataranuun mutano 21:1-25
1
Haafura kagiri
1 Horaarjje haafura gire, haafurana Waa dollee gire, haafurana Waayye. 2 Usuna horaarjje Waanneta gire. 3 Kameen dubbana usu tonsse met't'aame, kamet't'aamero dubbakkona usu kallayii kamet't'taamera koonna laagiro. 4 Neefo usuu gitte, hitti neefona ibaaddoon ifatte. 5 Ifana mugudii hank'k'aara, mugudnna lakkoɂawodaro.
6 Waakko kafaramera Yaannisa kaɂamamare ibaaddoti koo gire.Mat. 3:1; Mar. 1:4; Luk'. 3:1-2 7 Ibaaddo dubba atonnatikkeessa maalire garakkeessane goggoɂammaniroon, ifa maraan ato liin emeete. 8 Ifa maraan ato liin emeetera kuwaarre usu ussun ifa lakkoye. 9 Ibaaddo dubbaan ifa kasisaro kalleera karrummii ifa alami tos emeetaa gire.
10 Usu alami orroo gire, alami kakkomet't'aamera usuu golleenna, alami ade usu lakkoɂaddeesere. 11 Kakkeessa kalleero tos emeete. Fallikkeessana ade usu lakkoɂatatero. 12 Halleewo kuwaarre oɂatateeraawunna megekkeessaa oɂammanaran dubbaawun ade ere kawaa takkoleeran feɂi sisera. 13 Isona Waakko umulameenan kuwaarre, taɂiige goorttun tasooye feɂi goorttun tababbaar feɂikko lakkoɂumulameraan.
14 Haafurana ibaaddo lee; sinonna rummii ammagame noo orroo baree. Aabbokkeessa dollekko kaɂemeetero, ere kookkotti kabajja noo deenne.
15 Yaannisana, «Inkko haarre kaɂemeetara inkko horeene mankkogire maraan inkko roorara ame ani kakkoonɂatotaare hikkanunya» amaa iyyee usu maraan atotee.
16 Sinottessa ammagamanokko kakkeeyi no dubbana sinoo gutii sino atannenna. 17 Waa seera gara kamusene sisere, sinona rummina adde gara kayesuusa Kiristoosane emeete. 18 Suurewana Waa kaddeera maayyona laagiro, ayesuun goɂameen Waa Odo dollee kagire ere koo kalleera Hedo usu noon addeesise.
Kat'ammak'aare Yaannisakokki atonnati
(Mat. 3:1-12; Mar. 1:1-8; Luk'. 3:1-18)
19 Ayihuudina, «Ati ayyotta?» ami goggohoosarawun tuuk'aamolnna woyyuul Iyyerusaalemikko usu tos kakkofaraneen, goorata Yaannisa kasisera atonnati hikkaye.
20 Atotaanokkona haar lakkogale; «Ani Kiristoosa lakkoyo» ame addeesise atotee.
21 Isona, «Hayya ati ayyotta? Eelaasatta?» ameen hoosaten.Ada. 18:15; 18; Mil. 4:5.
Usuna, «Lakkoyo» ame.
Isona, «Hayya kahegerootta?» ameen. Usuna, «Lakkoyo» ame abbaabe.
22 Isona; «Hayya ati ayyotta? Ati kafarttette ibaaddoon abbaab noo goggosinssoo isi oottaawun mematta?» ameen. 23 Yaannisana kahegeroo Isiyaasaa goggosegameroo,
«Goottawun raa ‹Ekkaasa amaa
k'alullattokki ulii taɂiyyaatte yaaye aniyya› » ame abbaabe.Isa. 40:3.
24 Farasaawilkko ofarameeranna, 25 Haanna ameen; «Hayya Kiristoosa goorttun Eelaasa goorttun kahegeroo golleenon muun t'ammak'aatta?» ameen hoosaten.
26 Yaannisana, «Ani bekee t'ammak'aara, isin kakkasoonna ade isin orroo aalleera ame abbaabe. 27 Inkko danbbenne kaɂemeetara, ani keferro oottessakokki shaano furin kakkodaaddeennoon usuya.»
28 Hikki dubba kalleera Yaannisa t'ammak'aa takkogire Yorddaanoskko, gamaa tabittaaniya katamaayiyye.
Idaado kawaa
29 Yaannisa tallami arri, Yesuusa usu tos kaɂemeetaro deere haa ame, «Hikkima! Alamikokki c'ubbo kabbaasara idaado kawaa, 30 ‹Inkko haarre kaɂemeetara inkko horeene mankkogire maraan inkko roorara› ani isinuun kaɂamare usuya. 31 Ani metekkeewun lakkomalabere, bekee t'ammak'aa kaɂemeeyerana usu Isiraɂeel orroo goggomutiroonya» ame.
32 Esekkona Yaannisa, «Ayyaana arabe aani daruurkko dagere usu gutii hamas's'aa giraan dee. 33 Ani metekkeewun lakkomalabere ayesuun goɂameen bekee goggot'ammak'iroo kafarerana, ‹Ayyaana K'ulluukki kat'ammak'aara, Ayyaana dagaanna usu gutii hamas's'aa kamutara usuya› ame. 34 Aninna hikka deera, usu Ere kawaa laano atotinara» ame atonnati sise.
Ohoraarjjee Yesuusakko oɂagaalssatareen
(Yan. 1:40-42; Mat. 4:18-22; Mar. 1:16-20; Luk'. 5:2-11)
35 Tallami arri Yaannisa Yesuusakko oɂagaalssatareen lamane wota ese banɂee aallee gire, 36 Yaannisa Yesuusa esene rooraa giraan deere, «Hikkima idaado kawaa!» ame.
37 Lama Yaannisakko oɂagaalssatareenna Yaannisa hikka ayeesaa giraan maaleeren Yesuusa debee sesseeten. 38 Yesuusana kamabbal amere usuu debee osesseetaran deere, «Me dootaattan?» ame hoosate.
Isona, «Rabbi, haggee gitta?» Ameen, [«Rabbi» amano kaɂagaalssisaro amanoya.]
39 Usuna, «Koyeen diyaa» ame. «Haanssun seeterene usu mankkogiro deen,» eserrina usu wota hayeen, arriikkona saatii tomonkki goorata lee gire.
40 Yaannisa kaɂayeesero maaleen; Yesuusa debee osesseetaren lamakko koo kasimoona P'et'iroosakokki abbi Indiraasa gire. 41 Indiraasa horaarjje abbikkeessa Simoona helere, «Noo mesihi helannenna» ame, [«Mesihi» amano Kiristoosa amanoya.] 42 Yesuusa tonssa keene. Yesuusana deegure, «Ati kayoona ere Simoonatta, kefa amami uumaminatta» ame, «Kefa» amanona P'et'iroosa goorttun «eɂemo» amanoya.
Yesuusa Filp'oosana Naatinaɂeeli goggoɂuumero
43 Tallami arri, Yesuusa Galiila tos seeyin goosate, Filp'oosana helere, «Indebee sesseena» ame. 44 Filp'oosana Indiraasa P'et'iroosa aani kabeetesayida katamaakokki ibaaddotiyye. 45 Filp'oosa Naatinaɂeeli helere, «Musena kaseera mas'aafayi, kahegeroolnna usu maraan kakkoons'aafeeren kayoosefa ere kanaazireti Yesuusa helannenna» ame.
46 Naatinaɂeelina, «Naaziretikko kaɂidankki ayees helamin daanddaara?» ame. Filp'oosana, «Emeedde deena» ame.
47 Yesuusana Naatinaɂeeli usu tos kaɂemeetaro deere, «Hikkima, meellane kallayikki karrummii Isiraɂeeltti» amaa gara keessa ayeese.
48 Naatinaɂeelina «Ati in misii addeesse?» ame Yesuusa hoosate. Yesuusana, «Ati gaa kabalasi hegelii giraan, ganaa Filp'oosa ku haɂuumoon giraan ani ku deera» ame abbaabe.
49 Naatinaɂeelina abbaabere, «Kaɂagaalssisatto! Ati ere kawaatta, ati kaɂisiraɂeel wonotta» ame.
50 Yesuusana, «Ati Kaɂammanttetta, kabalasi gaa hegelii ani ku deera mankko amero maraanya? Ganaa hikkakko karoore ayees ati deeta» ame.
51 Adena, «Ani rumminaa rumminaa amara, daruur bananttedde, erggichcha kawaa Ere kaɂibaaddo gutii korataanna dagaa giraan dinnattaan» ame.Met'. 28:12.