Matoosa Kas'aafero
Goottaakkaanki Kayesuusa Kiristoosa Wongala
Tabano
Kamatoosa wongala, tayesuusa emeetokotti abddi t'aye kasegaamera usu kafayyisaro laanona Waa ammato ot'awooyi gosakkeessaan kasisero kaɂabddii haafura kakkofelera garakkeessane laano kasegaaro kageggeloo haafuraya. Hikki kageggeloo haafurana Yesuusa isoo orroo alatere kakkojiinatero Ayihuudi kaalaalun anlleennon giraan alami dubbaawunna adereya.
Kamatoosa wongala iide diyaame kaɂekkaatero mas'aafaya; tayesuusa alattankko haggaɂabere t'ammak'amano kakkeessakoki garana c'aafamanokkeessakoki gara sessegee abbaabatere Galiilaayi usu kalallabeero lallabaano, agaalssisanona fayyiisanokokki handdaano sessegaara. Hassukko abbaabatere ade Yesuusa kagaliila ulkko Iyyerusaalemikotti katamaa tos tasesseetero sesseettanna hikka alamii kakkoɂadallaatero geeskokki kagachchoo almmaayi kalleero ayees sessegaara; hikki ayeenssa suwaamanokkeessa, goyikkeessana goyikko kiyaanokkeessa wota raattoo abara.
Hikki wongala Yesuusa seera kawaa fureen sisin odonnati kaɂabo laanona wononnati kawaakokki gara kaɂagaalssisaro kanjjinkki yele tusara. Agaalssisikkeessakko gama kahori raa kamoogganii kaɂekkaatera banɂe kennii tootaamara;
1. Wononnati kawaakki ibaaddokotti yadalii, feloo, feɂi, hunnominna tagachchoo it'aa kaɂagaalssisaro kawodamii lallabaano, (foolssi 5-7).
2. Tomonkko lama Yesuusakko oɂagaalssatareen kawongala lallabaanoon kakkofaramareen goorata isoon kasisamere seeral, (foolssi 10).
3. Wononnati kawaakokki garaan kasegaamero kalekaleekki masuussajjool; (foolssi 13).
4. Yesuusakko oɂagaalssataran laanokotti fureen kasegaaro agaalssis, (foolssi 18).
5. Gees kagiddaneekotti gachchona wononnati kawaa emeetokokki garaan kasisamero agaalssis; (foolssi 24-25).
Raattoo Hikki Mas'aafa Kaɂabera
Yesuusa Kiristoosakokki kasanni hididinna alattaan 1:1—2:23
Kat'ammak'aaro Yaannisakokki handdaano 3:1-12
Yesuusakokki t'ammak'amanona c'aafamano 3:13—4:11
Yesuusa feloɂootteessa Galiilaayi haggaɂabano 4:12—18:35
Galiilakko Iyyerusaalemi tos 19:1—20:34
Kagachchoo almmaayi Iyyerusaalemiinna gobobikiseeyi 21:1—27:66
Goottakkaanikki goyikko kiyaanona usukko oɂagaalssatarawun mutano 28:1-20
1
Tayesuusa Kiristoosa alattaankokki hidiid
(Mat. 1:1-17; Luk'. 3:23-38)
1 Tadaawutena taɂabraame sannii kalleero kayesuusa Kiristoosa alattankkokki hididi haaya; 2 Abraame Yissaak'a umule, Yissaak'a Yayik'ooba umule, Yayik'ooba Yihuudana abbilaal umule, 3 Yihuudana Tiɂimaarkko Faaresina Zaara umule, Faaresi Esiroomi umule, Esiroomina Araam umule, 4 Araamina Aminadaabi umule, Aminadaabina Neɂasooni umule, Neɂasoonina Selemooni umule, 5 Selmoonina Reɂaabkko Boɂeezi umule, Boɂeezina Ruutikko Iyobed umule, Iyobdina Isseyi umule, 6 Isseyi wono Daawute umule,Uru. 4:18-22; 1 Od. 2:13-15. Daawutenna taɂooryo oorikko Solomooni umule, 7 Solomoonina Robiɂami umule, Robiɂamina Abiya umule, Abiyanna Aasafi umule, 8 Aasafina Iyosafit'i umule, Iyosafit'ina Iyohorami umule, Iyohoramina Oziyaani umule, 9 Oziyaanina Iyoɂataami umule, Iyoɂataamina Akkaazi umule, Akkaazi Hizk'iyaasa umule, 10 Hizik'iyaasa Minaase umule, Minaase Amoos'i umule, Amoos'ina Iyosiyaasi umule, 11 Iyosiyaasi gosa kaɂisiraɂeel Baabloni tos kakkobojaamere goorata Ikkoniyaanina Abbilaal umule.2 Won. 24:14-15; 2 Od. 36:10; Erm. 27:20.
12 Kabbabilooni boojaamanokko abbaabatere Ikkoniyaan Selaatiyaali umule, Selaatiyaanina Zurbbaabeela umule, 13 Zurbbaabeela Abiyuudi umule, Abiyuudina Elyaak'emi umule, Elyaak'emina Azaari umule, 14 Azaari Sadook'i umule, Sadook'i Akiim umule, Akiimina Elyuud umule, 15 Elyuud Alaazari umule, Alaazari Maatani umule, Maatani Yayik'ooba umule, 16 Yayik'ooba Yoosefa umule, Yoosefana kafayyisaro Kiristoosa Yesuusakotti Aaye Mayiraame kaɂeerateroye.*Mesihi, Kiristoosa amano Mesihi goorttun kashigidame amanoya.
17 Goortta Abraamekko taa Daawute geeron alattaan tomonkko afartta, Daawutekko taa kabbaabilooni boojaamano geeron alattaan tomonkko afartta; kabbaabilooni boojaanokko taa takiristoosa alattaan geeron alattaan tomonkko afartta.
Alattaan tayesuusa Kiristoosa
(Mat. 1:18-25; Luk'. 2:1-7)
18 Tayesuusa Kiristoosa alattankkotti jirtti hikkamaleetta, Aayetteessa Mayiraame Yoosefaan eeraanttegudde haɂeseloon Ayyaana K'ulluukkii fato tootaatte mutte.Luk'. 2:1-7. 19 Ese kaɂeeraatera Yoosefa k'ajeelakki ibaaddoti mankkolleero maraan Mayiraame ibaaddo horee fanchoyisiin mankkodooton maraan haɂaddeesisoon iisin murtteesse.
20 Usu goɂameen hikka k'oppaa giraan kagootta erggichcha hisillooyi usuun mute, haanna ame, «Sannii tadaawute kalleetetta Yoosefa, taɂeerattetto Mayiraame atayi oori yelayiin arooɂabssatte aalanttina ese kakkottotaatetta k'ulluukki ayyaanakkoyya. 21 Babbaartitinna umulnatta, megekkeessana Yesuusa†Heɂi taɂibrayist'ii «Yesuusa» amano kafayyisaro Goottaa amanoya. ami uumnatta; aalanttina usu gosakkeessa c'ubbokkisookko mankkohaasinaro maraanya.»Luk'. 1:3.
22 Goottaa gara kahegeroonne haa ame kaɂayeesera felooyi goggohayiroon amegure hikki dubba lee. 23 «Hikkina, deeleeltiti fato tootaayinatta babbaartitina umulnatta megekkeessana amanuɂeeli amaminnara,» fureeninna «Waa noonne wota gira amanoyya.»Isa. 7:14.
24 Yoosefana huddurokko nabbaade, esekkona kagootta erggichcha goggosegeeroyi Mayiraame oori yelayiin minkkeessa tos atate seete. 25 Halleewo kuwaarre erekkisee taaɂumulttooyi esene wota lakkohuddurero kaɂalatero yiittitina Yesuusa ame uume.Luk'. 2:21.