10
Tomonkko lama Yesuusakko oɂagaalssataran
(Mar. 3:13-19; Luk'. 6:12-16)
Yesuusa usukko oɂagaalssataran isi tos uumegure battiikki ayyaanajjol goggobeesinawunna maar orrookki dhukkubana hawɂaami dubba goggofayyisinawun isoon odonnati sise.
Tomonkko lama ofarameeraankonɂi megekkiso hikkaya; isona [P'et'iroosa kaɂamamero] Simoonana abbikkeessa Indiraasa, yiis kazabddoosa Yayik'oobana abbikkeessa Yaannisa, Filp'oosana Berttelomeewosa, Toomaasana k'arat'a kakukkuyisare Matoosa, yiis kaɂilfoosa, Yayik'oobana Tadiyoosa kaɂamamaro Libdiyoosa, ulkkeessan kawudittaamaro Simoona,*K'enaɂi Simoona, hikka Simoonan kallami kasisamera mege, banɂe banɂeeyi fureen min kawaawun kawudittaamaroyya goɂamiro, kakkalee ade balchchumma tabeesatto unakko kooyya amaraan. haarre Yesuusa roorise kasisero kaɂask'orotu Yihuuda.
Ofarameeraan tomonkko lama agaalssisin faramano
Yesuusa hinɂa ofarameeraan tomonkko lama haa kaɂamaro handdaane wota iso fare, «Ayizaab tos arooseetteen; maaɂeeti tasamaarya katamaa tonssa arootabtteen; Seeto gohesoon idaad aani min kaɂisiraɂeelkko kabbayero gosa tos seeyen. Seeyenguddeen ‹Wononnati kadaruure gabbalamera› ama lallabaa.Luk'. 10:4-12. Dhukkubaaleessalnna fayyiisa, kagoyero ibaaddona keesa, maarii bar kaɂabona barkko muc'c'isa, durrisana beesa, adda kaɂatatteettaanna adda sisa. Kiisiitisini work'k'ii leere bir taɂamamatto marc'c'okko goorttun medaabkko kafelamero maragade arooɂabatteen. 10 Raakkisinunna shile, k'olo lama, goorttun keferroo goorttun dama arooɂabatteen; aalanttina kafelaroon babo sisamin dootisara.1 K'or. 9:14; 1 T'im. 5:18.
11 «Katamaa goorttun maaman koo tos gotabtteen isin k'op'ayin feɂi kaɂabo ibaaddoti dootaguddeen usu minii foolssayeen; taabeetaani esee adallaayen. 12 Min kamaakkayyona gotabtteen nogodda aata. 13 Isin kak'op'ataraan gollee, nogoddatisin usu min halleeto, isin kak'op'annon gollee adi, nogoddatisin isinuun haɂabbaabatto. 14 Maamisikki ibaaddotina isin k'op'atana gowaate goorttun isin kaɂayeesattaan maalana gowaate hassu minkko goorttun hasse katamaakko biyaa giraan isoon seerisano goggolleeroon luk'k'aɂoottisinkko gorra hurgufayenddeen biyaa.Ofa. Fe. 13:51. 15 Ani rumminaa amara, tafirdda arri hasse katamaayi taginnatto murrookko Sodoomina Gomoraayi taginnatta murroo tafuffudaatte leeta.»Mat. 11:24.
Emeeyin tagitto rakkoo
(Mar. 13:3-13; Luk'. 21:12-17)
16 «Idaad aani hiyyeeyi orroo ani isin farnnara, haanssun habeessa aani k'aroolee, arabe aani fayyankkanɂi laa.»Luk'. 10:3.
17 «Ibaaddona isin abigure firddaawun shonggoo tos geesinnaran; Ayihuudikokki min kaɂebinna isin boc'c'innaraan, haanssun isokko isiɂoorayeen.Mar. 13:9-11; Luk'. 12:11-12; 21:12-15. 18 Aalantti teeyi mootijjol tonssa wonolaal tos firddaan isin geesinaran; iso horeenna Ayizaab horee iin ato linnattan. 19 Firddaan shonggoo tos isin kakkogeeseen goorata memi ayeenssa? Me ami abbaabinna? Ami arooyyaddeen, hassu goorata taɂami ayeessaan isinuun sisanttowa. 20 Isinii kaɂayeesinnara kadaruure Aabbokkisinkki Ayyaana kawaayya kuwaarre lakkoɂisinttaan.»Mar. 13:12; Luk'. 21:16.
21 «Abbi abbikkeessa goyin roorisi sisinnara, odona erekkeessa, yiinssa iso oɂumuleeraan gutii kiinnaraan, lagadisinnaraan. 22 Aalantti teeyi ibaaddo dubba isin diidinara; ayesuun goɂameen taagachcho geeroo kaɂataate usu fayyinara.Mat. 24:9,13; Mar. 13:13; Luk'. 21:17. 23 Banɂe tookko gohorooreen banɂe takkalee tos bak'ayeen; ani rumminaa amara, isin taɂisiraɂeeli katamaali feloɂoottisin feli angussannon giraan ere kaɂibaaddo emeeyinara.»
24 «Kaɂagaalssatara, kaɂagaalssisarokko kahandaara goottakkeessakko lakkorooraro.Luk'. 6:40; Yan. 13:16; 15:20. 25 Kaɂagaalsatara kaɂagaalssisaro aani, kahandaarana goottaakkeessa aani gollee leera. Odomineekkisoo ‹Biɂeelzebuli› ami goɂuume, kaminee ibaaddo hikkakko karoore kameellan megee misii uumin waataran?» Mat. 9:34; 12:24; Mar. 3:2; Luk'. 11:15.
Ayyo abssayin dootisaro
(Luk'. 12:4-7)
26 «Haanssun ibaaddo arooɂabssatteen, golate kagira diidaa habeenoni, siyame kagira hamutoni lakkohesiro.Mar. 4:22; Luk'. 8:17. 27 Haanssun ani isinuun mugudii kasegeero ifaayi ayeesa, nebettisinii kamaaltteettan diidaa beesa awwaajjaa. 28 Soo lagadin kuwaarre neefo lagadin kadanddeennon ibaaddokko arooɂabssatteen; hassukko neefona soonna tabbaanon eleenii baasin kadaanddaaro Waa abssayeen. 29 Dolchchii tooyi kadaddalamaro kimbir lamakko toonna kadaruure Aabbokkisinkkotti feɂi kallayi ulii ii lakkohesso. 30 Metekkisinkki binaanakko duuddo koonna hahesooni dubba katootaameya. 31 Haanssun arooɂabssatteen, kamooggan kimbirjolkko muraattisin takabajaanttetta.»
Ibaaddo horee Kiristoosa atotaano
(Luk'. 12:8-9)
32 «Ani kakiristoosayya ame garakkee ibaaddo horee kaɂatotaaron aninna daruurii kagiro Aabbokkee horee atotinara. 33 Ayesuun goɂameen ibaaddoyi horee in kakkakataroon aninna daruurii kagiro Aabbokkeeyi horee usu kakayinnara.» 2 T'im. 2:12.
Nogodda anlleennon giraan kalekalee biyaano
34 «Ani kakkoonɂemeeyera uluun nogodda keenin lakkoyo; kalekalee beesin kuwarre nogodda keeniin kaɂemeeyero aani isinuun aroolleeno. 35 Ani kakkoonɂemeeyera, ere odokkeessakko, deeleeltiti Aayettiseekko, ooriɂerena soddotisekko iskko darɂiinya. 36 Ibaaddoon diina kallaara kakkeessa kaminee ibaaddowayya.» Mik. 7:6.
37 «Inkko roorise Aabokkeessa goorttun Aayetteessa kageelaatara kakkee liin lakkodootisaro, inkko roorise babbaartiti goorttun deeleeltiti kageelaatara kakkee liin lakkodootisaro. 38 Mask'alittessa sidayire taagooron iin debee kasessennon kakkee liin lakkodootisaro.Mat. 16:24; Mar. 8:34; Luk'. 9:23. 39 Isiɂoottessa fayyiisayin kadootatara baasatara, Isiɂootteessa in maraan roorissayi sisayin kadootatara ade fayyisatara.Mat. 16:25; Mar. 8:35; Luk'. 9:24; 17:33; Yan. 12:25.
Gara kabarɂaara
(Mar. 9:41)
40 «Isin kaɂatatara in atatara, inna kaɂatatara ade in kafarero odo atatara.Mar. 9:37; Luk'. 9:48; 10:16; Yan. 13:20. 41 Kahegeroonna kahegerookokki megeeyi kaɂatatara kahegerookotti muraa helatara, k'ulluukkina k'ullummakkokki megee kak'op'atara k'ullummakkotti muraa helatara. 42 Haanssun ani rumminaa amara; maamisikki ibaaddona hinɂa otitiic'c'arkko koo inkko kaɂagaalssataron k'uldubbo too beke ambbalnɂi kasise usu muraa lakkowaaro.»

*10:4 K'enaɂi Simoona, hikka Simoonan kallami kasisamera mege, banɂe banɂeeyi fureen min kawaawun kawudittaamaroyya goɂamiro, kakkalee ade balchchumma tabeesatto unakko kooyya amaraan.

10:7 Luk'. 10:4-12.

10:10 1 K'or. 9:14; 1 T'im. 5:18.

10:14 Ofa. Fe. 13:51.

10:15 Mat. 11:24.

10:16 Luk'. 10:3.

10:17 Mar. 13:9-11; Luk'. 12:11-12; 21:12-15.

10:20 Mar. 13:12; Luk'. 21:16.

10:22 Mat. 24:9,13; Mar. 13:13; Luk'. 21:17.

10:24 Luk'. 6:40; Yan. 13:16; 15:20.

10:25 Mat. 9:34; 12:24; Mar. 3:2; Luk'. 11:15.

10:26 Mar. 4:22; Luk'. 8:17.

10:33 2 T'im. 2:12.

10:36 Mik. 7:6.

10:38 Mat. 16:24; Mar. 8:34; Luk'. 9:23.

10:39 Mat. 16:25; Mar. 8:35; Luk'. 9:24; 17:33; Yan. 12:25.

10:40 Mar. 9:37; Luk'. 9:48; 10:16; Yan. 13:20.