Raaga Kayaannisa
Tabano
Raaga kayaannisa kakkos'aafamera amaniil Yesuusa Kiristoosa Goottakkisoo laano ammananokisookotti aalanttii bak'atanona rakkoo iso giyaa kakkogittee gorataayiye. S'aafiti kinttibii kaɂabatere ayees onabbabaraankotti abddi laɂo taɂabtto goggolleeton ataayisiinna iso kageero bak'atanona rakkoo orroo ammanokkisooyi goggoɂataanawun jajjabeessiinyya.
Mas'aafa gama kahori moggaase kaɂabera isdebeekki raagajol kaɂaberoya; hassu raagajol usu geesii kagire amaniil addeesin kadaanddeero; kakkalee ade hool ligure kaɂadallaayinnaro misiliikokki ayeesii kasegaameroya. Kamazamuri madarri marroo marroo goggoɂabbaabatarokki malee hikka mas'aafakokki mete metekki kamooggan raagajolkokki garane middi tamoogganii isidebee segaamera. Gara kamas'aafakotti fureen k'ofa tamooggan taɂabtto golleetena metetti k'ofa tamutattotta; hikkina Waa, Goottaa Kiristoosakkotti minane kallami takkosossoyisootii kooyikkii durrisana adere diinakkeessa dubba awode; awodanokkeessana kakkogudatare goorata taɂabddantte unatteessa taɂusub daruurnna kaɂusub ulkokki uuso iso eelisinnara kaɂamaroya.
Raattoo Hikki Mas'aafa Kaɂabera
Tabano 1:1-8
Raagakotti fureenna todoba min kawaatun kafaramere handdaa 1:9—3:22
Mas'aafajjolnna maatamaal todobakokki firdda 4:1—8:1
Malakata todobakokki firdda 8:2—11:19
Dobonssa sulaale lama 12:1—13:18
Raaga kamooggan 14:1—15:8
Todoba murroo owaanna T'uggaal 16:1-21
Baas kabbaabilooni, kasulaale, kat'araa kahegerolnna kaddurrisa awodamano 17:1—20:10
Kagachchoo firdda 20:11-15
Taɂusub daruur, kaɂusubkki ul, taɂusub Iyyerusaalemi 21:1—22:5
Gudisano 22:6-21
1
1 Hikki raaga enee kallinnaro kooko usuun ohandaraawun goggotusiroo Waa Yesuusa Kiristoosan kasiseroya; Yesuusa Kiristoosana erggichchakkeessa faregure usuun kahandaaro Yaannisaan hikka raaga tuse. 2 Yaannisana haafura kawaakokki garana Yesuusa Kiristoosa taɂagaalssisero rummikokki gara, usumaleenna usu katusero ayees dubbakokki atotee. 3 Hikki dubba kakkollinnara goorata enee mankkollee maraan hikka kahegerolkokki haafura kanabbabara kasommaasameya! Usumaleenna kahegerolkokki haafura omaalaraanna hegero orroo kas'aafamero ofelaraan osommaasameenyan.
Isiyaayi orroo banɂe todobaa kagiro amaniil dubbaan tafaranttetto nogodda
4-5 Yaannisakko Isiyaayi orroo banɂe todobaa kagiro amaniluun; kagira, kagirena kaɂemeeyinara korffinjjekkeessaa horee kagiro ayyaanajjol todobakko; usumaleenna goyikko keyaanoyi barkki kalleero kaɂulee wonolaalkokki mootiikko, kaɂabddame ato kalleerokko, no kageelaatarokkona iigikakkeessayi no c'ubbokkaanikko balchchumma kabeesero Yesuusa Kiristoosakko sinona nogodda isinuun halleeto.Biy. 3:14; Rag. 4:5; Isa. 55:4; Mez. 89:27.
6 Kayesuusa Kiristoosa odo Waawun goggohanddayinnoon no wonona tuuk'aamol kayelero, Yesuusa Kiristoosan kabajana hunnana jiruu jiroommakko taa jiruu jiroomma geeroo usuun halleewo! Hamiinɂi.Biy. 19:6; Rag. 5:10.
7 Hikkima usu duumanchchaayi emeeyinnara; usu kaɂeeggera ibaaddona suure anhesonii dubba usu dinnara; kaɂulee gosa dubba aalantti teessaa ooyinnara; ii hikki ayees rummiya; hamiinɂi.Dan. 7:13; Mat. 24:30; Mar. 13:26; Luk'. 21:27; 1 Tes. 4:17; Zak. 12:10; Yan. 19:34,37.
8 Kagira, kagire, kaɂemeeyinnarana dubba kadaanddaara Goottaa Waa, «Kahoreenna kahaaree aniya!» amara.Rag. 22:13; Biy. 3:14.
Kiristoosa raagayi mutano
9 Yesuusa Kiristoosaa rakkoonna wononnatikkeessa usumalee obssi isinne wota kaɂatayera ani abbikkisin Yaannisa haafura kawaayinna Yesuusaa atotaanokotti aalanttii Fet't'imo taɂamamatto oddolaayi ani shaame gire; 10 Tagoottaa arrii ani k'ofa taɂayyaanaa ammagame giraan tat'urunbbaa yaaye aani tallaatta taɂatii yaaye inkko bagandde haa amaa giraan; 11 «Usumaleenna kamutaro mas'aafayi s'aafidde Isiyaayi orroo banɂe todobaa kagiro amaniluun, Efesooni tos, Semirnesi tos, P'ergaamoni tos, Tiyaat'iron tos, Serddeesi tos, Filadelifiyanna Lodok'iya tos fari» amaa giraan ani maale.
12 Iinne kaɂayeesere maayyoyo addeesin haar kambbal ame; haar kambbal kakkoɂamiro goorata todoba kaworik'k'ii bollanssool ani dee. 13 Bollanssool t'eɂe kasesseetaro ere kaɂibaaddoo aani kallaaro ani dee; usu luk'k'a hegel kageyaaro sarssi kassarsate; geegiyotteessayi kawork'k'ii moowano kamoowateroye.Dan. 7:13; 10:5. 14 Metekkeessanna metekkeessakokki binaana beleetti aani tallaatto suufii aani gumaarakkiye; ilɂoɂootteessana lac'a kaɂeleenee aaniyyeen;Dan. 7:9; 10:6. 15 Luk'k'aɂoottessana kaɂeleenee boolaal orroo kagiro kamarc'c'o naasi aaniyyeen; Yaayetteessana lagaayi odagaraan beke onjiinkotti yaaye aanitte;Hiz. 1:24; 43:2. 16 Tamergge genetteessaa barraajja todoba abe gire; mina lamane kaɂenennan bibbir hiɂitteessakko biyaa gire; bebbeedtteessana waɂantte tahank'k'aatto arriti aanitte. 17 Hikka ani kakkodeyaare goorata kagoye ibaaddo aani leegure luk'k'aɂoottessa hegelii iyye; Usu ade tamergge genetteessa in gutii kayegure haa ame; «Arooɂabssatte; kahoreenna kahaaree aniya;Isa. 44:6; 48:12; Rag. 2:8; 22:13. 18 Ani arddokkiya; goye gire; ayesuun goɂameen hikkima; jiruu jiroommaan arddokkiya; ani goyi gutiinna bowwa gutii odonnati aba; 19 Goortta ati kaddeetetto, gidda kagirona haarre kaɂemeeyinnaro s'aafi. 20 Tamergge genetteeyi kaddeetetto barraajjaal todobana kawork'k'ii bollanssool todoba hoolkkotti fureen hittatta; barraajjaal todoba, banɂe todobaa kagiro amaniilkokki erggichchaalya, bollanssool todobana, banɂe todobaa kagiro amaniilya.»