1 Gurↄ beeea gyãa Yeroboamu nɛ́gↄ̃gbɛ̃ Abia kũ̀. 2 Ben Yeroboamu bè a naↄ̃nɛ: Ǹ fɛɛ ǹ n zĩnda liɛ, lɛ wàton n dↄ̃ ma nↄↄ ũro, ǹ gá Silo. Annabi Ahia kú gwe. Àmbe à bèmɛ mɛ́gↄ̃ dɛ Isarailinↄ kína ũ. 3 Ǹ burɛdi sɛ́ mɛ̀n kuri kↄ̃n kàranↄ kↄ̃n zↄ́ tùuo, ǹ gáonɛ. Eé yã kɛ̀ eé nɛ́ pì lee onnɛ. 4 Ben Yeroboamu naↄ̃ↄ kɛ̀ lɛ, à fɛ̀ɛ à gàa Silo à gɛ̃̀ Ahia bɛ. Ahia wɛ́ɛ e guu e dↄro, zaakɛ à zi kũ à wɛ́ɛ gↄ̃̀ dãadãa. 5 Dii gĩakɛ à ò Ahianɛ kɛ̀ Yeroboamu naↄ̃ nɛ́ e gyãa kɛɛ, ben èe mↄↄ lɛ à yã gbekamma. Ǹ onɛ la, ǹ onɛ la, zaakɛ tó à mↄ̀, eé a zĩnda liɛnnɛ gbɛ̃ pãnde ũmɛ.

6 Kɛ̀ Ahia à kɛ̀sɛ kĩi mà, èe gɛ̃ɛ kpɛ́n, à bè: Ǹ gɛ̃ Yeroboamu naↄ̃! Bↄ́yãnzin n n zĩnda lìɛ lɛzi? Yã pãsĩn Luda bè mà onnɛ. 7 Ǹ gá ǹ o Yeroboamunɛ, Dii Isarailinↄ Luda bè, ámbe a n sɛ n gbɛ̃nↄ tɛ́, a n kɛ a gbɛ̃ Isarailinↄ dↄn'aɛdee ũ. 8 A kpata bↄ̀ Dauda boriinↄ ↄzĩ, ben a n kpan, mↄde ń dɛ lán à zↄ̀bleri Dauda bàro, kɛ̀ à a yãdiɛnanↄ kũna, à tɛ́zi kↄ̃n nↄ̀sɛo do à yã kɛ̀ á yezi kɛ̀. 9 N yã zaaa kɛ̀ dɛ gbɛ̃ kɛ̀ aↄ̃ dↄ̀nnɛ aɛnↄla, n gaa n tãanↄ kɛ̀ n zĩndanɛ, mↄ̀ kɛ̀ ń kàsa pìnↄ, ben n kpɛɛ lìare, n a pↄↄ fɛ̃̀. 10 Beee yãnzin é mↄ́nzi kpá n boriinↄzizi, é n gↄ̃gbɛ̃nↄ kaatɛ Isarailinↄ guu zↄ̀nↄ kↄ̃n wɛ̃ɛnɛnↄ ń píngi, é tɛ́ sↄ̃ n bɛɛa, lán wè tɛ́ sↄ̃ zùgbↄ̃a nà ai à tɛ́ kũ à yãa píngi. 11 Gbɛ̃ɛnↄ é n borii kɛ̀ aↄ̃é gaga wɛ́tɛnnↄ só, bãanↄ é n gbɛ̃ kɛ̀ aↄ̃é gaga sɛ̃̀nnↄ ble. Dii bé à ò lɛ. 12 Mmↄn sↄ̃ nↄgbɛ̃, ǹ fɛɛ ǹ tá bɛ. Tó n kɛ̀sɛ pɛ̀ɛ wɛ́tɛ guu gↄ̃ↄ, nɛ́ pì é ga. 13 Isarailinↄ é à gɛ̀ ↄ́ↄ dↄ wà à vĩi. Yeroboamu boriinↄ tɛ́ ń píngi, àmbe weé vĩi ado, zaakɛ àmbe ado kɛ̀ Dii Isarailinↄ Luda yã maaa èa Yeroboamu ua. 14 Dii é kína pãnde diɛ a gbɛ̃ Isarailinↄnɛ. Àmbe eé Yeroboamu boriinↄ dɛdɛ. Gbã̀a kɛ̀a! Bↄ́ↄↄ? Lɛmɛ, tiaaɛmɛ! 15 Dii é gò tↄ̃ Isarailinↄa, aↄ̃é gↄ̃ lán kàba kɛ̀ èe nigãa í guu bà. Eé Isarailinↄ bↄɛ bùsu maaa kɛ̀ à kpà ń dezinↄa kɛ̀n à ń fãakↄ̃a Yuflati baa kãa kpa, kɛ̀ aↄ̃ Asatorɛ lí pɛ̀ɛpɛɛ aↄ̃ Dii pↄↄ fɛ̃̀onɛ yãnzi. 16 Eé Isarailinↄ kpáḿma durun kɛ̀ Yeroboamu kɛ̀ à Isarailinↄ dà à kɛnan yãnzi.

17 Ben Yeroboamu naↄ̃ fɛ̀ɛ èe taa. Kɛ̀ à kà Tiza, kɛ̀ à kɛ̀sɛ zɛ̀ kpɛɛlɛa gↄ̃ↄ, ben nɛ́gↄ̃gbɛ̃ pì gà. 18 Wà à vĩ̀i, ben Isarailinↄ ↄ́ↄ dↄ̀ ń píngi lán Dii ò a zↄ̀bleri annabi Ahia gãzĩ nà. 19 Yeroboamu yã kpaaanↄↄ kú Isarailinↄ kínanↄ gĩayãkɛnanↄ takadan, zĩ̀ kɛ̀ à kànↄ kↄ̃n à kíkɛyãnↄ píngi. 20 Yeroboamu kí blè wɛ̃̀ baro awɛɛplaamɛ. Kɛ̀ à gà, ben à nɛ́ Nadabu vɛ̃̀ɛ à gbɛ̀n.

21 Sulemanu nɛ́ Reoboamun Yudanↄ kína ũ. À kí blè a wɛ̃̀ baplaa awɛɛdodeemmɛ, ben à kí blè Yerusalɛmu wɛ̃̀ gɛ̃ro awɛɛplaa, wɛ́tɛ kɛ̀ Dii sɛ̀ Isaraili bori píngi wɛ́tɛnↄ tɛ́ lɛ à tↄ́ gↄ̃ kúa. À da tↄ́n Naama, Amↄni boriimɛ. 22 Yudanↄ yã kɛ̀ Dii yeziroo kɛ̀, aↄ̃ à pↄↄ fɛ̃̀ dɛ ń dezinↄla ń píngi ń durun kɛ̀ aↄ̃ↄ kɛ̀ yãnzi. 23 Aↄ̃ tãagbãgbãkiinↄ bò ń zĩndanɛ sĩ̀sĩ lezĩ sãnda píngi musu kↄ̃n lí bíta sãnda píngi gbáruo, aↄ̃ gbɛ̀nↄ kↄ̃n línↄ pɛ̀ɛpɛɛn. 24 Baa se tãagbãgbãki kaaruanↄↄ kú Isarailinↄ bùsun gↄ̃gbɛ̃nↄ kↄ̃n nↄgbɛ̃nↄ. Lɛmɛ Isarailinↄ borii kɛ̀ Dii pɛ̀ḿmańnɛnↄ dà zaaanↄ sɛ̀ɛ lɛ píngi.

25 Kí Reoboamu kíblena wɛ̃̀ sↄↄrodee guun Igipiti kí Sisaki mↄ̀ à lɛ̀ɛ Yerusalɛmua. 26 À Dii ua auzikinↄ kↄ̃n kíbɛ pↄ́nↄ nàkↄ̃a à vura sɛngbango kɛ̀ Sulemanu pìnↄ sɛ̀ɛ píngi. 27 Ben kí Reoboamu sɛngbango pìnↄ gɛ̃ɛ pì kↄ̃n mↄ̀gotɛ̃o à nà a bɛ dogari dↄn'aɛdeenↄnɛ ń ↄzĩ a bɛ kpɛɛlɛ. 28 Tó kína e gaa Dii ua, dogari pìnↄ ègↄ̃ sɛngbango pìnↄ kũna. Tó aↄ̃ ɛ̀ara wà sù, aↄ̃è ɛara wà káɛ ń kpɛ́n.

29 Reoboamu yã kpaaanↄ kↄ̃n yã kɛ̀ à kɛ̀nↄ píngi kú Yudanↄ kínanↄ gĩayãkɛnanↄ takadan. 30 Reoboamu kↄ̃n Yeroboamuo ègↄ̃ zĩ̀ kaa kↄ̃o gurↄ píngi. 31 Kɛ̀ Reoboamu gà, wà à mira kpàkↄ̃zi kↄ̃n a dezinↄ pↄ́o Dauda wɛ́tɛ. À da tↄ́n Naama, Amↄni boriimɛ. Ben à nɛ́ Abia vɛ̃̀ɛ à gbɛ̀n.