Luda yã takada kↄ̃n Bokobaru yão MAAKU 7

Fɛɛakaarayã

(Mat 15:1-9)

1 Farisinↄ kↄ̃n ludayãdannɛri kɛ̀ aↄ̃ bↄ̀ Yerusalɛmu kenↄ mↄ̀ Yesu kiia, 2 ben aↄ̃ↄ è à ìba kenↄ e pↄ́ blee ↄpipisai. 3 Zaakɛ Farisinↄ kↄ̃n Yudanↄ ń píngi ń dezinↄ fɛɛakaarayã kũnamɛ, aↄ̃è pↄ́ ble ↄpipi a zɛ́a sairo. 4 Tó aↄ̃ bↄ̀ yàra wà sù, aↄ̃è pↄ́ ble zú'osairo. Aↄ̃ↄ fɛɛakaarayã pãndenↄ kũna pari. Lɛmɛ aↄ̃è togoonↄ kↄ̃n loonↄ kↄ̃n butanↄ pípi lɛ. 5 Ben Farisinↄ kↄ̃n ludayãdannɛri pìnↄ Yesu là wà bè: Bↄ́yãnzi n ìbanↄ ègↄ̃ wa dezinↄ fɛɛakaarayã kũnaziroo? Aↄ̃è pↄ́ ble ↄpipisai. 6 Yesu wèńla à bè: A mↄnafikideenↄ, Isaya annabikɛyã ò a mↄnafikideenↄ yã musu wásawasa lán à kɛ̃̀ Luda yãn nà à bè:

Bori beee è bɛ̀ɛ limɛ kↄ̃n lɛ́omɛ,

aↄ̃ swɛ̃̀ kúmaro.

7 Aↄ̃ègↄ̃ dↄnzi kɛɛmɛ pãmɛ,

gbɛ̃ntee yãzɛkparɛɛn aↄ̃è dańnɛ.

8 A pã kpà Luda yãdannɛnazi, ben á gbɛ̃ntee fɛɛakaarayã kũna. 9 Ben à bèńnɛ dↄ: A pã Luda yãnɛ lɛ à e àgↄ̃ a fɛɛakaarayã kũna maan yↄ́? 10 Musa bè, àgae bɛ̀ɛ lí a de kↄ̃n a daonɛ. À bè dↄ, gbɛ̃ kɛ̀ à a de ke a da kpɛ bↄ̀, wà adee dɛ. 11 Apinↄ sↄ̃, eè be tó gbɛ̃ bè a de ke a danɛ, pↄ́ kɛ̀ á vĩ à ń kpe dao nɛ́ Kↄbanimɛ, 12 à zɛ́ vĩ à a de kↄ̃n a dao kpe dao dↄro. Kↄbanin pↄ́ kɛ̀ wè kpá Ludaa ũ. 13 Lɛmɛ eè Luda yã kɛ famma a fɛɛakaarayã kɛ̀ eè dańnɛ yãnzi. Yã beee takanↄn eè kɛ pari.

Yã kɛ̀ è tó wàgↄ̃ gbãsĩ

(Mat 15:10-20)

14 Ben Yesu ɛ̀ara à parii sìsiazi à bè: À swã kpá à ma yã ma a píngi. 15 Pↄ́kee kuu kɛ̀ è gɛ̃ gbɛ̃ guu kɛ̀ è à kɛ gbãsĩro. Pↄ́ kɛ̀ è bↄ gbɛ̃ guu bé è tó àgↄ̃ gbãsĩ. 16 Gbɛ̃ kɛ̀ swã vĩ à ma. 17 Kɛ̀ à parii tò gwe à tà bɛ, ben à ìbanↄ à gbèka yã pì mìzi. 18 À bèńnɛ: A laasuu kpɛ́ yĩi seↄ́? Kɛ̀ pↄ́kee kuu kɛ̀ è gɛ̃ gbɛ̃ guu à tó àgↄ̃ gbãsĩro, á dↄ̃roo? 19 Pↄ́ pì è gɛ̃ a swɛ̃̀ guuro, sé à gbɛɛɛn, gbasa à bↄ mɛ̀n. Lɛn Yesu pↄ́ble píngi kɛ̀ blena pↄ́ ũ lɛ tɛ̃̀ sai. 20 Ben à bè: Yã kɛ̀ è bↄ gbɛ̃ guu bé è tó àgↄ̃ gbãsĩ. 21 Zaakɛ zaa gbɛ̃ntee swɛ̃̀ guun laasuu zaaa è bↄn: Pãpãkɛna, kpãi'ona, gbɛ̃dɛna, zinakɛna, 22 wãkũ, nↄ̀sɛzaaa, mↄnafiki, wísaiyã, sãnkara, gbɛ̃sↄ̃sↄ̃na, wada kↄ̃n mìsaiyão. 23 Yã zaaa pìnↄ è bↄ swɛ̃̀ guu píngi, àmbe è tó gbɛ̃ gↄ̃ gbãsĩ.

Nↄgbɛ̃ zĩ̀tↄ Yesu náanɛkɛna

(Mat 15:21-28)

24 Yesu bↄ̀ gwe à gàa Taya bùsun, ben à pìta ua kea. À yezi wà a dↄ̃ro, mↄde èe e à a zĩnda ùtɛro. 25 Nↄgbɛ̃ kɛ̀ à nɛ́nↄkparɛ zĩn vĩi Yesu baaru mà, ben à mↄ̀ à dàɛ à aɛ gↄ̃ↄ. 26 Nↄgbɛ̃ pì sↄ̃ Giriki gbɛ̃mɛ wà à ì Siria Fenisia bùsun. À wɛ́ɛ kɛ̀ Yesua lɛ à zĩn goare a nɛ́a. 27 Ben Yesu bènɛ: Ǹ tó wà pↄ́blee kpá nɛ́nↄa gĩa, zaakɛ à maa wà nɛ́nↄ pↄ́blee sɛ́ wà zu gbɛ̃ɛnↄnɛro. 28 Ben nↄgbɛ̃ pì wèàla à bè: Dii, baa gbɛ̃ɛ kɛ̀ aↄ̃è daɛńzinↄ è nɛ́nↄ pↄ́ble buru sɛ́sɛ. 29 Yesu bènɛ: Kɛ̀ n yãwenlana maa yãnzi, ǹ tá, n nɛ́ zĩn gòa. 30 Kɛ̀ à kà bɛ, à a nɛ́ è daɛna pɛ̀a, zĩn pì gòa.

Swãdo kɛ̃kↄ̃ana

31 Ben Yesu fɛ̀ɛ Taya bùsun à gàa Sidↄ̃, ben à bↄ̀ɛ kↄ̃n Wɛ́tɛmɛnkuri bùsuo ai à gàa à kà Galili sɛ̀bɛzi. 32 Ben wà mↄ̀nɛ kↄ̃n swãdo bebekario, wà wɛ́ɛ kɛ̀a lɛ à ↄ kɛa. 33 Yesu bↄ̀ parii guu kↄ̃n swãdoo pìo à a ↄnɛtee pɛ̀pɛ à swãn. Kɛ̀ à lóu sù, ben à ↄ kɛ̀ à nɛ́nɛa. 34 À wɛ́ɛ sɛ̀ musu à wesaa kàkↄ̃a à bò, ben à bènɛ: Ɛfata. Yã pì bè ǹ wɛ̃. 35 Zaa gwe gↄ̃ↄ gↄ̃gbɛ̃ pì swã wɛ̃̀ à nɛ́nɛ gùɛ, ben à yã ò wásawasa. 36 Yesu bèńnɛ aↄ̃ton o gbɛ̃ke maro, mↄde dian èe giińnɛ nà, lɛmɛ aↄ̃ↄe à kpàakpa kɛɛńnɛ lɛ. 37 Yã pì bↄ̀ ń saɛ maamaa à gɛ̃̀ onala, ben aↄ̃ bè: À yã píngi kɛna ègↄ̃ maamɛ. È tó baa swãdoonↄ yã ma, ben è tó bebekarinↄ yã o.

MAAKU
<
7
>